Vivegam - விவேகம்

இன்பத் தமிழ் அமுது

2008-01-04T01:52:00.000+08:00

தமிழ்க்கூறு நல்லுல்கில் தமிழ்மக்களால் புரட்சிக்கவி என்றழைக்கப்படும் பாரதிதாசனால் இன்தமிழ், 'இன்பத் தமிழ்' எனும் கவிதை இயற்றப்பட்டது. தமிழைப்பற்றி இவர் வடித்த கவிதைகளில் இஃது மிகவும் பிரபலமாவதற்கு ஊடகம் முக்கியப்பங்காற்றியுள்ளது என்றால் மிகையாகாது. அவர் இயற்றிய அக்கவிதையின் விளக்கத்தைக் காண்போமா?

அமுதம் இனிமை மிக்கது; உண்டவரை நெடு நாள் சிறப்புற்று வாழ வைக்கும் தன்மையை உடையது. தமிழும் கற்பவருக்கு அத்தகைய நன்மைகளைப் பயக்கும் என்பதால் அமுது என அழைக்கப்படுகிறது. இனிமை மிக்க தமிழ், அம்மொழியைப் பேசும் தமிழர்களுக்கு உயிருக்குச் சமமானதாகும். நிலவின் குளிர்ச்சியான ஒளி உடலுக்கு இதமளிப்பதைப் போன்று, கற்போரின் உள்ளத்திற்குத் தமிழ் இதமாக இருப்பதால், அத்தமிழ் நிலவென அழைக்கப்படுகிறது.

இனிமை மிக்க தமிழ்,சமுதாயம் எனும் பயிர் விளைவதற்கு ( முன்னேற்றத்திற்கு ) நீர் போன்றதாகும். தமிழ்மணம் எனவும் அழைக்கப்படுகிறது. அதுவே தமிழர்களின் வாழ்வை உறுதி செய்யத்தக்க ஊருக்குச் சமமாகும். தமிழைக் கற்போர் அதன் ஆற்றலால் சொக்கி, இன்ப மயக்கம் அடைவதால், அத்தமிழை மது என அழைக்கிறோம். இன்பம் தரும் தமிழ் எங்களுடைய உரிமை எனும் செழிப்பான பயிருக்கு வேர் போன்று அவசியம் மிக்க ஒன்றாக விளங்குகிறது.

தமிழ், எங்கள் சமுதாயம் என்றும் இளமை குன்றாது துடிப்போடு செயல்பட ஆற்றலை வழங்கும் பாலுக்குச் சமமானது. இனிமை மிக்க தமிழ் சிறப்புற்று விளங்கும் புலவர்களின் ஆற்றலை வெளிப்படுத்தும் ஆயுதமாக விளங்குகிறது. வானத்திற்கு எல்லை இல்லை. அது போல எல்லை இல்லா அளவிற்கு நாங்கள் முன்னேற்றமடைய தமிழ் அடிப்படையாக விளங்குகிறது. இனிமை மிக்க தமிழ் எங்கள் சோர்வைப் போக்கி புதுத்தெம்பை அளித்திடும் தேன் போன்றதாகும். தமிழராகப் பிறந்த எங்களுக்குத் தமிழ், தாயாக விளங்குகிறது. இன்பத்தமிழ் செம்மை மிக்க எங்கள் மனங்களின் ஆற்றல் மிக்க சக்தியாக விளங்குகிறது.

இவ்வாறு வரிக்கு வரி தமிழ்ச்சுவையைத் தெளித்துள்ளார் புரட்சிக்கவி பாரதிதாசன். இதோ அந்த அமுத வரிகள்....

தமிழுக்கும் அமுதென்றுபேர் ! - அந்தத்
தமிழ் இன்பத் தமிழ்எங்கள் உயிருக்குநேர் !
தமிழுக்கு நிலவென்றுபேர் ! - இன்பத்
தமிழ் எங்கள் சமுகத்தின் விளைவுக்குநீர் !
தமிழுக்கு மணமென்றுபேர் ! - இன்பத்
தமிழ் எங்கள் வாழ்வுக்கு நிருமித்தஊர் !
தமிழுக்கு மதுவென்றுபேர் ! - இன்பத்
தமிழ் எங்கள் உரிமைச்செம் பயிருக்குவேர் !
தமிழ் எங்கள் இளமைக்குப் பால் ! - இன்பத்
தமிழ் நல்ல புகழ்மிக்க புலவர்க்குவேல் !
தமிழ் எங்கள் உயர்வுக்கு வான் ! - இன்பத்
தமிழ் எங்கள் அசதிக்குச் சுடர்தந்ததேன் !
தமிழ் எங்கள் பிறவிக்குத்தாய் ! - இன்பத்
தமிழ் எங்கள் வளமிக்க உளமுற்ற தீ!

- பாரதிதாசன்.

ஆண்டவர்கள் கண்ட சுவர்ணபூமி - பகுதி 2

2007-12-08T14:29:00.000+08:00

( குறிப்பு: இக்கட்டுரை மலேசியாவில் 'விடியல்' வாரப்பத்திரிக்கையில் வெளியீடு கண்டுள்ளது. கட்டுரையாசிரியர் : சரஸ்வதி கந்தசாமி )

பகுதி - 2 ( நிறைவு)

ஏறத்தாழ 6ஆம் நூற்றாண்டில் இஸ்லாம் தோற்றுவிக்கப்பட்டது. மதப்பிச்சாரங்கள் வழி இஸ்லாம் உலக நாடு முழுவதும் பரப்பப்பட்டது. அது இந்தியாவிலும் பரவியது. இந்தியாவிலிருந்து வந்த மதப்பிரச்சாரர்கள் கிழக்கிந்திய நாடுகளில் இஸ்லாத்தை பரப்பினர். இதில் ஷேக் அப்துல்லா என்பவரின் மிகவும் கனிவான தொனியும் அவரது பேச்சாற்றலும் இங்குள்ளவர்களை மிகவும் எளிதில் கவர்ந்தது.

மாறனின் பேரனின் பேரனான, பிரான் மகா வாசன் தனது அரண்மனையில் நடந்த அவரது மதப் பிரச்சாரத்தில் மிகவும் கவர்ந்து, உடனே மதம் மாறினார். தனது பெயரை முஷபர் ஷா என்றும் மாற்றிக் கொண்டு இம் மண்ணின் முதல் இஸ்லாமிய சுல்தான் ஆனார்.'

அவரது மத மாற்றத்திற்கு பிறகு,இந்த பகுதி மக்கள் அரசன் எவ்வழி குடிகள் அவ்வழி என்று அவர்களும் இஸ்லாம் மதத்தை தழுவினர். இதன் வழி வட பகுதியில் இந்து சாம்ராஜ்யம் முடிவுற்றது, சுல்தான்கள் முறை தோற்றுவிக்கப்பட்டது. மேலும் மலாய்க்காரர்கள், இந்தியர்கள், சயாம்காரர்கள் அனைவரும் காலம் காலமாக ஏற்பட்ட கலப்பு திருணத்தின் மூலம் வந்த வழித் தோன்றல்கள்தான். அவரகள்தான் இன்றைய வட மாநிலத்து பெரும்பான்மையும் மக்களாகவும் இருக்கின்றனர்.

தென் மாநிலங்களில் ஸ்ரீ விஜயா என்ற பல மிக்க சாம்ராஜ்யம் ஒன்று இருந்து வந்தது. 700 ஆண்டுகள் ஸ்ரீ விஜயா மன்னர்கள் மலேசிய நிலப்பரப்பை ஆண்டுள்ளனர். பிறகு பற்பல காரணங்களினால், அவர்கள் பலமிழக்க நேரிட்டது. இந்தக் காலகட்டங்களில், அதிக எண்ணிக்கையில் வந்த பூகீஸ்காரர்கள் ஜோகூர் மற்றும் சிலாங்கூர் மாநிலங்களில் குடியேறினர். இவர்கள் ஆங்காங்கே வாழ்ந்த மக்களுடன் கலந்து அந்த மாநிலங்களிலும் புதிய ஆட்சி முறையை தோற்றுவித்தனர்.

14ஆம் நூற்றாண்டில் மலாக்காவை ஸ்ரீ விஜயா சாம்ராஜ்யத்தின் இளவரசர் பரமேஸ்வரா நிறுவினார். இவரது மகன் ஒரு பாரசீகப் பெண்ணை திருமணம் செய்து இஸ்லாம் மதத்தை தழுவினர். தனது பெயரையும் ராஜா இஸ்கண்டர் ஷா என்று மாற்றிக்கொண்டார்.மன்னர்களின் மதமாற்றத்தினாலும் இந்தோனேசியா மக்களின் ஆக்ரமிப்பினாலும் இந்து சாம்ராஜ்யங்கள் இம்மலேசிய மண்ணில் படிப்படியாக முடிவுக்கு வந்தன. ஆனால் இங்கே உள்ள மக்களில் பெரும் பகுதியினர் இந்திய வம்சாவளியினரின் கலப்பு வழித்தோன்றல்கள் என்பதுதான் பூர்வீக நிஜம்.

என்வே, இந்தியர்கள் ஒரு காலத்தில் இப்பிராந்தியத்தை ஆண்ட பரம்பரை. 3000 ஆண்டுகளாக நாகரிகம், வாழ்க்கை நடைமுறை, நீர்ப்பாசனம், விவசாயம், கால்நடை வளர்ப்பு, நகர நிர்மாணிப்பு, வியாபாரம், உலக வாணிபம், அரசியல்,கலை, கலாச்சாரம் என்ற வாழ்க்கையின் அனைத்து கூறுகளையும் கற்றுக் கொடுத்தவர்கள். ஒரு பரிணாம வளர்ச்சியையும் ஒரு அரசியல் அமைப்பையும் ஏற்படுத்திக் கொடுத்தவர்கள்.

ஆண்ட பரம்பரை மீண்டும் ஒருமுறை ஆள நினைப்பதில் என்ன குறை என்று நமது இன்றைய அரசியல் தலைவர்கள், பேச்சாளர்கள் கூறுவதில் சரித்திர உண்மை பொதிந்திருக்கிறது. பல நூற்றாண்டுகளுக்கு பின் பிரிட்டிஷ் ஆட்சியாளர்கள் காலத்தில், கடின உழைப்பு, விசுவாசமிக்க தொழிலாளர்கள் என்ற அடிப்படையில் ஆயிரமாயிரம் தென்னிந்திய தொழிலாளர்கள் இம்மண்ணிற்கு கொண்டுவரப்பட்டனர். இவர்கள் தான் இன்று இந்திய வம்சாவளியினர் என்று தனித்து கூறப்படுகிறது.

3000 ஆண்டிகளுக்கும் முன் வந்த இந்திய வர்த்தகர்கள் எப்படி இந்த மலேசிய மண்ணிற்கு ஒரு அடையாளத்தை பாரம்பரியத்தை ஏற்படுத்திக் கொடுத்தனரோ, அதே போல் கடந்த நூற்றாண்டுகளில் சஞ்சிக்கூலிகளாக தருவிக்கப்பட்ட தென்னிந்திய தொழிலாளர்கள் தங்கள் அயராத உழைப்பின் வழி மலேசியாவின் பொருளாதாரத்திற்கு அஸ்திவாரம் அமைத்துக் கொட்டுத்தனர்.

இந்த மண்ணிலே இந்திய சமுதாயத்திற்கு ஒரு தொன்மையான சரித்திரம் இருக்கிறது. மரியாதைக்குரிய ஒரு பாரம்பரியம் இருக்கிறது. நாம் வடித்த வியர்வை இருக்கிறது. நாம் போட்ட உழைப்பு இருக்கிறது. இருந்தும், இந்த சமுதாயம் தெருவுக்கு வந்தது ஏன் ?

- நன்றி : சரஸ்வதி கந்தசாமி, 'விடியல்' ( 5.12.2007-11.12.2007)

===================== முற்றும் ==========================

ஆண்டவர்கள் கண்ட சுவர்ணபூமி

2007-12-07T23:41:00.000+08:00

( குறிப்பு: இக்கட்டுரை மலேசியாவில் 'விடியல்' வாரப்பத்திரிக்கையில் வெளியீடு கண்டுள்ளது. கட்டுரையாசிரியர் : சரஸ்வதி கந்தசாமி )

பகுதி : 1

சுமார் 200 ஆண்டுகளுக்கு முன், பிரிட்டிஷ் ஆட்சியியாளர்களின் காலத்தில் வெறும் சஞ்சிக்கூலிகளாக கொண்டுவரப்பட்டதினால் தான் மலேசியாவிற்கும் இந்தியாவிற்கும் இடையே மக்கள் தொடர்பு ஏற்பட்டது என்ற ஒரு தவறான கருத்து நம்மிடையே உள்ளது. இது அழிக்கப்பட வேண்டும்.

சுமார் 3000 வருடங்களுக்கு முன்னரே தமிழ் வர்த்தகர்கள் அலெக்ஸாண்டியா, ரோமாபுரி, கிரேக்கம் முதலிய மேற்கத்திய நாடுகளுடன் வாணிபம் புரிந்தனர். கிழக்கே சீனா மற்றும் இதர நாடுகளுடனும் வாணிபம் நடத்தி வந்தனர். இந்திய நாட்டிலிருந்து வாசனைத் திரவியங்கள், துணிமணிகள், முத்து, வைரம், தேக்கு, அரிசி, யானைத்தந்தம் ஆகிய பொருட்களை முக்கிய ஏற்றுமதி பொருட்களாக கொண்டு சென்றனர். இதனால் தமிழ்மொழி-சமஸ்கிருத வார்த்தைகள் மற்ற மொழிகளில் கலந்தொலிக்கின்றன. உதாரணத்திற்கு அரிசி என்ற சொல் கிரேக்க மொழியில் 'ஒரைசா' என்றும் ஆங்கிலத்தில் 'ரைஸ்' என்றும், இஞ்சி வேர் என்ற தமிழ்ப்பதம் கிரேக்க மொழியில் 'ஜின்ஜிவா' என்றும் ஆங்கிலத்தில் 'ஜிஞ்ஜர்' என்றும் மருவி வழ்ங்கப்படுகிறது. மலாய் மொழியின் சொல்வளத்திற்கும், தமிழ்-சமஸ்கிருதம் பெரும் பங்காற்றியுள்ளன என்பதும் நாம் அறிந்ததுதான்.

வெகுகாலமாக இந்தியாவிலிருந்து சீனா மற்றும் அதைச்சுற்றியுள்ள பிரதேசங்களுக்குச் சென்று கொண்டிருந்த கப்பல்கள் மலாக்கா ஜலசந்தியைப் பயன்படுத்தின. இதனால் மலாக்கா ஜலசந்தியின்(நீரிணை) இரு கரைகளிலும் இந்திய வர்த்தகர்கள் பண்டக சாலைகள் உருவாக்கினர். பிறகு இந்த பண்டக சாலைகள் துறைமுகமாக உருவகம் பெற்றன. அதனால் 3000 ஆண்டுகளுக்கு முன்னரே மலாக்கா, சிங்கப்பூர், கெடா, சயாம் ( தாய்லாந்து ) போன்ற கடல்புற இடங்களில் இந்தியர்களின் குடியிருப்புகள் ஏற்பட்டன. இந்த குடியேற்றப் பகுதிக்கு இந்திய நாட்டிலிருந்து போர்வீரர்கள், புரோகிதர்கள், சிற்பிகள் என வந்து சேர்ந்தனர். இவர்களின் மூலம் இந்திய பழக்க வழக்கங்கள், அரசியல்முறை, சமயக் கோட்பாடுகள் இங்கே பரவின. மீன் பிடித்து, வேட்டையாடி, பரண் மீது குடியிருப்புகள் கட்டி வாழ்ந்து வந்த அக்கால மக்களுக்கு, இந்தியர்கள் முதன் முதலில் நாகரிக வாழ்க்கை முறைகளை கற்றுக் கொடுத்தனர். மேலும் பயிரிடுதல், நீர்ப்பாசனம் செய்தல், நெசவு செய்தல், வியாபார முறைகள், நாணயத்தின் உபயோகம், வீடு கட்டுதல்,வைத்திய சாஸ்திரங்கள் போன்றவற்றையும் அவர்களுக்கு அறிமுகப்படுத்தினர்.

ஆகவே நமது முன்னோர்கள் இம்மண்ணில் வாழும் மக்களுக்கு மட்டுமல்ல இந்த பிராந்தியத்தில் உள்ள நாடுகளுக்கும், வாணிபம், அரசியல், கலாச்சாரம், வாழ்க்கைமுறை போன்றவற்றை கற்றுக் கொடுத்தனர் என்பதை முதலில் நாம் புரிந்து பெருமைப்பட வேண்டும்.

எனவே, இந்தியர்கள் நேற்று பெய்த மழையில் இன்று பூத்த காளான்கள் என்ற பொய்யான தோற்றம் முதலில் அழிக்கப்பட வேண்டும். இம்மண்ணின் வளப்பதிற்கு இந்தியர்களின் பங்கு கடந்த இரண்டு நூற்றாண்டுகள் தான் என்ற மாயை நிராகரிக்கப்பட வேண்டும்.

மலேசியா அமைவதற்கும் முன், மலேயா உருவாவதற்கும் முன், பிரிட்டிஷ் மற்றும் போர்த்துகீசிய ஆட்சியாளர்கள் மலேயாவை ஆளுவதற்கும் முன், இஸ்லாம் இந்நாட்டிற்கு வருவதற்கும் முன், இஸ்லாம்,கிறுஸ்துவ மதம் தோன்றுவதற்கும் முன், கால் பதித்து, வாணிப வாய்ப்புக்கள் ஏற்படுத்தி ஆட்சிமுறை அமைத்து, துறைமுகப் பட்டினங்களை உருவாக்கி, உலக நாடுகளுடனான வாணிபத் தொடர்புகளை ஏற்படுத்தி இந்நாட்டை வளப்படுத்தி உலக வரைபடத்தில் மலேசியா-சிங்கப்பூருக்கு முதல் அடையாளத்தை ஏற்படுத்தி கொடுத்தவர்கள் இந்தியர்கள். இம் மண்ணிற்கு முதன் முதலில் "சுவர்ணபூமி" என்ற பெயரை சூட்டி மகிழ்ந்தவர்களும் இந்தியர்கள்தான், அதுவும் தென்னிந்தியர்கள்தான் என்ற பெருமையும் நமக்குள்ளது.

பண்டைக் காலத்திலேயே, தென் இந்தியாவின் கிழக்கு மலைத்தொடரை சார்ந்த பிரதேசங்களில் இருந்து வந்த தமிழர்கள் மலேசியா உட்பட அநேக கிழக்கிந்திய நாடுகளில் ராஜியங்கள் அமைத்து முழு வல்லமையுடன் ஆட்சி புரிந்தனர் என்பது சரித்திரம். அக்காலத்தில் இம்மண்னில் சிறுபான்மையாக இருந்த சுயகுடியினருக்கு முதன் முதலின் நாகரிகம் கற்றுக் கொடுத்தவர்கள் தமிழர்கள் தான் என்று பழைய சரித்திர நூல்கள் கூறுகின்றன.

கொந்தளிப்பான வங்காள வளைகுடாவை கடந்த பின்னர் இந்திய கப்பல்களுக்கு ஏற்ற இடமாக கெடாவில் உள்ள குனோங் ஜெராய் மற்றும் சற்று தெற்கே உள்ள சுங்கை பூஜாங் ஆகிய பிரதேசங்கள் நீர்வளம் மற்றும் நிலவளம் பொருந்தியவையாக இருந்ததால் இந்தியர்களின் முதல் குடியேற்றமும் அதைத் தொடர்ந்து இம் மண்ணில் முதல் சாம்ராஜ்யமும் அங்கேயே தோன்றியது. பூஜாங் நதிக்கரையில் முதல் பட்டினம் உருவானது. அதைத் தொடர்ந்து அப்பிரதேசத்தில் அடுத்தடுத்து பல குடியிருப்பு பகுதிகள் உருவாயின. அந்த குடியிருப்புகள் ஒருங்கிணைக்கப்பட்டு அந்த இந்துராஜ்யம் விரிவாக்கப்பட்டது. அது சயாமின் தென் பகுதி, பெர்லிஸ், கெடா,பட்டவொர்த் ஆகிய பகுதிகளுக்கு விரிந்து பரவி இருந்தது.

இம் மண்ணின் அந்த முதல் இந்து சாம்ராஜ்யத்தை 'தர்மராஜா' என்றழைக்கப்பட்ட மாறன் மகாவம்சன் ஆட்சி புரிந்தார். அதுதான் 'லங்காசுகா' என்ற முதல் இந்து சாம்ராஜ்யம். அரசர் மாறன், தனக்கும் தன்னை சார்ந்தவர்களுக்கும் ஒரு கோட்டையைக் கட்டி, ராஜாங்கத்தில் பல இலாக்காக்களை ஏற்படுத்தினார். நிர்வாகத்தில் சுய குடிகளையும் இந்தியாவிலிருந்து வந்த ஆட்களையும் நியமித்து நல்லாட்சி புரிந்தார். பள்ளிக்கூடங்களை நிறுவினார். முக்கியமாக சிவன் கோவில் கட்டி மக்களிடையே சமயப் பற்றை வளர்த்தார். இங்கே மீன்பிடித்து, வேட்டையாடி வாழ்க்கை நடத்தி வந்த மலாய் சமூகத்தினருக்கு ஆட்சியில் பணி புரியவும் இடமளித்தார்.

பேரரசர் மாறனின் மூத்த மகன் வடக்கே அயோத்தியா ( சயாம் ) என்ற சாம்ராஜ்யத்தை நிறுவி ஆட்சி புரிந்தான். இரண்டாவது மகன் தெற்கே கங்கா நகரம் (பேராக்) என்ற ஒரு ராஜ்யத்தை ஆண்டு வந்தான். மாறனின் அழகும் அறிவுமிக்க மகள், கிழக்கே பத்தினி ( பட்டாணி ) என்ற சாம்ராஜ்யத்தை அமைத்து ஆண்டு வந்தாள்.

.................( தொடரும் ).............................................................................................................................

யார்தான் சாட்சி?

2007-12-06T02:50:00.000+08:00

அங்கே யாருமில்லை சாட்சியாக
மனம்தான் கேள்வியாக
எனக்குள்ளே ஒருவன் நீதி தேவன்
கூண்டிலேற்றினான் குற்றவாளியாக!

- நன்றி - டார்டர் எம்.எஸ்.உ " உலகால் அறியப் படாத ரகசியம்" பக்.24

மலேசியாவில் புகைமூட்டம்!

2007-07-05T14:52:00.000+08:00

படம்: நேற்று காலை 10.00 , அலோர் ஸ்டார்

கடந்த சில நாட்களாகவே இங்கு பெரும்பாலான இடங்களில் சுற்றுச் சூழல் மாசுபட்டிருக்கிறது! சில இடங்களில் சுகாதாரக் கேடு ஏற்படக்கூடிய அளவிற்கு 'காற்று மாசு கணக்கீடு' - Air Pollutant Index (API)அடைந்துள்ளது பலரை வேதனையடையச் செய்துள்ளது.

வடக்கில், கெடா மாநிலத்தில் - சுங்கை பட்டானியில்லும் பினாங்கு மாநிலத்திலும் API அளவு, நேற்று அதிகரித்துள்ளது.

நேற்று வரை சுங்கை பட்டானியில் API அளவு 62 -ல் இருந்து 104-ஐ எட்டியுள்ளது. அலோர் ஸ்டாரில் 51-ல் இருந்து 62க்கு அதிகரித்துள்ளது.

கடந்த செவ்வாய் அன்று லங்காவியில் API கணக்கீடு 55 -ஆக இருந்து நேற்று 61-ஐ எட்டியுள்ளது.

பெர்லிஸ் மாநிலத்திலும் காற்று சுற்றுச் சூழல் மாசுபட்டிருக்கிறது. அங்கு செவ்வாய்க் கிழமை API - 51-ல் இருந்து 54க்கு ஏற்றம் கண்டுள்ளது.

நேற்று காலை மணி 11 வரை பினாங்கு மாநிலத்தில், மலேசிய அறிவியல் பல்கலைக் கழகம், பிறை மற்றும் செபெராங் ஜெயா ஆகிய இடங்களில் API அளவு முறையே - 65, 74 மற்றும் 91 ஆக இருந்தது.

ஒவ்வொரு முறையும் 'காற்று - சுற்றுச் சூழல் மாசு' ஏற்படும்போது பல காரணங்கள் கூறப்பட்டாலும் ( உதாரணத்திற்கு - இந்தோனேசியா காட்டில் பற்றவைக்கப்படும் தீ ) இதற்கு நிரந்தரத் தீர்வு காணப்படாதது மக்களை வேதனையடையச் செய்துள்ளது.

இயற்கை நம் தோழன்!

2007-06-05T16:34:00.000+08:00

கொஞ்சம் மேலே பாருங்களேன்......எத்தனை அற்புதங்கள் நிறைந்துள்ளன எல்லையில்லா இப்பிரபஞ்சத்தில்!

எல்லையற்ற வானம்......பிரபஞ்சம்......மௌனப் பரவெளி! அந்த மௌனப் பரவெளியில், அணுக்கூட்டங்களின் சங்கமம் + ஆட்டம் நடக்கின்றது.

இரவில் எத்தனை விண்மீன்கள் மின்னுகின்றன! அத்தனையும் நம் பிரபஞ்சப் பரவெளியில் நடக்கும் அதிசயங்கள்! உணர்ந்து பார்க்காதவரை அவை வெறும் நட்சத்திரங்களே! சாதாரணமாக அவற்றை நாம் கண்டுக்கொள்வதில்லை!

அடடா....காலையில் நாம் பார்க்கும் சூரியன் அவற்றுள் ஒன்று. சூரியக் கூட்டுக்குடும்பத்தில் நாம் வாழும் பூமி எப்படிப்பட்ட அதிசயம் என்று யோசித்ததுண்டா..?

இந்த அற்புதமான வான் சூழ்ந்த தோற்றத்தில் பால்வீதி மண்டலத்தைத் தாண்டி

விஞ்ஞானிகள் ஆராய்ச்சிகள் நடத்திக் கொண்டுதான் இருக்கிறார்கள். ஓய்ந்தபாடில்லை!

இயற்கைக் காட்சி மாறுகிறது.

மேலே வெண்மதி நிலவு வீசுகிறது.

கீழே எல்லையற்ற கடல் அலை வீசிக் குதிக்கிறது. கதிரவன் கதிர்கள் உலகைச் சித்தரிக்கின்றன; கடலிலிருந்து ஆவியை மேலே இழுத்து, மேகங்களை நெய்கின்றன; மேலிருந்து மழை பொழிகிறது. மண்ணுலகம் பசும் பொலிவெய்துகிறது; மக்கள் வயல் தோட்டங்களில் உழைத்துப் பிழைக்கின்றனர். பயிர்களை உண்டு உயிர்கள் பிழைக்கின்றன!

இயற்கை நண்பன் காட்சி மாறுகிறான்.

பொன்னிலங்காலை புலர்கிறது. விண்மீன்களின் பவனி மறைகிறது.

'கோ கோ! - சேவல்! கா கா - காக்கை! ( கோ - கடவுளே; கா - காப்பாய்)

கு கூ - குயில்; கி கீ - கிளி; ஆ ஆ -வானம்பாடி; சிக் சிக் - குருவிகள்.....இவ்வாறு புட்களின் பஜனை நடக்கிறது.

உதய சூரியன் சுடர் வீசி எழுந்து கதிர் வீசி நம்முன் நிற்கிறது.

அருட்பெருஞ்சோதி கண்டதுண்டா ?

இயற்கையை நண்பனாக நினைத்து ஒவ்வொரு நாளையும் வரவேற்றதுண்டா? இறைவன் இயற்கையாய்... தோழனாய்.... உதவிட காத்திருக்கிறான்.......கொஞ்சம் கண்டுக்கொள்ளுங்களேன்!

மனம் - ஜீவரேடியோ ?

2007-05-29T21:39:00.000+08:00

யூரிகெல்லர் என்ற இஸ்ரெல்காரர் ஒரு சமயம் தமது மன எண்ணங்களை ஒருமுகப்படுத்தி ஓர் உலோகத்துண்டை வளைத்துக் காட்டினார்.

எண்ணங்கள் நமது உடலை மாத்திரம் பாதிப்பதில்லை; பிற உயிர்களைப் பாதிக்கும், ஊடுருவும்; ஏன், உயிரற்ற திடப் பொருள்களைக்கூட ஆட்டிப்படைக்கும் வலிமை படைத்தவை அவை.

எனவே, நாம் நல்ல எண்ணங்களைப் பரவவிடுவது நல்லது.

உண்மையில் நம் மனம் ஒரு ஜீவ ரேடியோ போன்றது! அதிலிருந்து உற்சாகத்தையும், தைரியத்தையும், மகிழ்ச்சியும் பரப்பலாம் - அதன் வழி நாம் மகிழ்வுடன் இருக்கலாம் அல்லது நமது வானொலி மூலம் அழுகுரலை, துக்கத்தை, இயலாமையைப் பரப்பிக் கொண்டிருக்கலாம்.
இதன் மூலம் நொந்து, பிறரையும் நோகச் செய்யலாம்.

நாட்டில் ஓரிரு அழுகுரல் தலைவர்கள் இருந்தால் போதும்; எல்லாவற்றிலும் குற்றம் கண்டு வாழ்வையே நரகமாக அடித்துவிட முடியும்.

( டாக்டர் எம்.எஸ்.உ அவர்ளின் 'எண்ணங்கள்' புத்தகத்திலிருந்து )

எண்ணங்களே....வண்ணங்களாய்..!

2007-02-23T14:58:00.000+08:00

சும்மா... கண்ணை மூடிக்கொண்டு உங்களுக்குப் பழக்கப்பட்டவர்களை உங்கள் மனத்திரையில் கொண்டுவர முடியுமா ? முடிந்தால் மேலே படியுங்கள்; மனோவண்ணங்களைக் கண்டுபிடியுங்கள்!

மனத்திதையில் பிரதிபலிக்கும் வண்ணங்களின் தன்மைகளைக் கொண்டு ஒருவரது எண்ணங்களைப் புரிந்து கொள்ள முடியுமாம்!

அதற்கு முன், வண்ணங்கள் என்ன எண்ணங்களைக் குறிக்கின்றன என்று தெரிந்து கொள்ளுங்கள்.......இதோ வண்ணங்களின் தன்மைகள்:

சிவப்பு: தெளிவாக சிவப்பு ஒளி பிரகாசித்தால் நல்ல ஆரோக்கியத்தையும் அதிகமான ஆழமான பாலுணர்வையும் குறிக்கும். மங்கலான சிவப்பு வண்ணம் கோபம்-வெறுப்பு மற்றும் எதிர்மறை எண்ணங்கள் - வஞ்சத் தன்மைகளைக் குறிக்கும்.
ஆரஞ்சு: தெளிவாகவும் பிரகாசமாகவும் ஆரஞ்சு வண்ணம் தெரிந்தால் இவர்கள் மிகவும் கெட்டிக்காரர்களாகவும் மனவுறுதி படைத்தவர்களாகவும் இருப்பார்கள். மதிப்பு- மரியாதை ஆகிய பண்புகள் இவர்களிடம் இருக்கும். மங்கலான ஆரஞ்சு வண்ணம் - நம்பகமில்லாத தன்மைகளையும் மதிக்காத குணம் - தூக்கியெறிந்து பேசும் தன்மை மற்றும் அதிக விபரம் இல்லாதவர்களாகத்தான் இருப்பார்கள்.
மஞ்சள்: பிரகாசமான மஞ்சள் வண்ணம் நல்ல உடல்வாகு - கவர்ச்சி - மதிப்பு - மரியாதை ஆகிய குணங்களை வெளிப்படுத்துகிறது. மற்றும் பலரையும் உபசரித்து மகிழ்வதில் விருப்பம் உள்ளவர்களாக இருப்பார்கள். மங்கலான மஞ்சள் ஒளியுள்ளவர்கள் நம்ப முடியாது.நயவஞ்சகத் தன்மை உள்ளவர்கள். இவர்கள் செயல்களும் பதட்டம் அவசரத் தன்மை இருக்கும்.
பச்சை: நல்ல தெளிவான பச்சை வண்ணம் பிரகாசமாக இருந்தால் அது நேர்மை , நியாயம், அன்பு, பாசம் ஆகியவைகளைக் குறிக்கும். இவர்கள் உண்மையானவர்களாகவும் இருப்பார்கள். நமது வளர்ச்சிக்கும் உயர்வுக்கும் உதவி செய்வார்கள். மங்கலான பச்சை வண்ணம் - போட்டி, பொறாமைக் குணங்களைக் குறிக்கும்.
நீலம்:நல்ல பிரகாசமான நீல வண்ணம் உங்களுக்கு அமைதியையும் அன்பையும் தரக்கூடியது. கிரியாசக்திகள் நன்கு செயல்படுவதை இந்த பிரகாசமான நீல ஒளி குறிப்பிடுகிறது. இவர்கள் நல்லதையே செய்வார்கள். பிறருக்கு உதவி செய்வார்கள். மங்கலான நீல ஒளி சாதாரணமானவர்களாகத்தான் இருப்பார்கள்.
இண்டிகோ - கருநீலம்: இந்த வண்ணம் சூட்சும சக்திகளின் ஆற்றல்களை வெளிக்காட்டுகிறது. தெளிவான கருநீலம் உள்ளவர்கள் சூட்சும சக்திகளை இயக்கத் தெரிந்தவர்களாக இருப்பார்கள். உன்னத யோக நிலையை அடைந்தவர்கள். இவர்கள் ஞானிகள் யோக சித்திகள் அடைந்தவர்களாகவே அமைதியுடனும் ஆனந்தத்துடனும் அன்பு ஒளியை பரவச் செய்து கொண்டும் இருப்பார்கள்.
வயலட் - ஊதா: நல்ல தெளிவான ஒளி பிரகாசத்துடன் வயலட் வண்ணம் ( ஊதா / கத்தரிப்பூ) தெளிவாக இருப்பதால் இவர்கள் மகான்கள்தான். எல்லாம் அறிந்தவர்களாக இருப்பார்கள். வயலட் - தங்க வண்ணம் - பச்சை போன்ற வண்ணங்களையும் பிரகாசிப்பவர்கள். மக்களுக்கு வழிகாட்டியாகவும் ஆன்மீக குருமார்களாகவும் ஆற்றல் மிகுந்து திகழ்வார்கள்.

எண்ணங்கள்தான் காரணம் -விவேகம்

2007-02-21T10:36:00.000+08:00

நாம் இன்றைக்கு எப்படி இருக்கிறோம் என்பதற்கு நாம்தான் பொறுப்பு. அதாவது நம்முடைய எண்ணங்கள்தான் பொறுப்பு. நம்முடைய எண்ணங்களே நம்மை உருவாக்குகின்றன. நம்முடைய இன்றைய நடவடிக்கைகளுக்கு நேற்றைய சிந்தனைகளே காரணமாகின்றன.

ஆக ஒரு சமுதாயத்தின் எழுச்சியோ வீழ்ச்சியோ மனிதர்களின் நடத்தையினாலும் நடவடிக்கைகளையும் பொறுத்துத்தான் அமைகிறது. மனிதர்களின் நடத்தைக்கும் நடவடிக்கைகளுக்கும் அவர்களின் எண்ணங்களே காரணமாக அமைவதால் சமூகங்களின் நாகரிகங்களின் எழுச்சிக்கும் வீழ்ச்சிக்கும் எண்ணங்களே காரணமாகின்றன.

- விவேகச் சிந்தனை.

யாரோ சொன்னது.....- விவேகம்

2007-02-21T10:19:00.000+08:00

என்றும் வானம்
நீலமாகவே இருக்குமென்றோ
வாழ்க்கைப் பாதை நிறைய
பூக்களே பூத்திருக்கும் என்றோ
கடவுள் வாக்களிக்கவில்லை.

மழையில்லாத வெயிலோ
கவலையில்லாத மகிழ்ச்சியோ
வேதனையற்ற சமாதானமோ
உண்டாகும் என்றும்
கடவுள் வாக்களிக்கவில்லை.

ஆனால்
கடவுள் உறுதியளித்தது:
ஒருநாளுக்கான சக்தியை
உழப்பிற்கான ஓய்வை
பாதையை ஒளியை!

- நன்றி, அக்னிச் சிறகுகள்.

கல்வியின் பயன் யாது?

2007-02-20T23:12:00.000+08:00

கல்வி வேறு.படிப்பு வேறு.புத்தகத்தில் இருக்கும் விசயங்களை மண்டையில் தேக்கிக் கொள்வது படிப்பு. அது கல்வியாகாது!

புத்தியை எப்போதும் இதயத்திடம் பாடம் படித்து அடங்கி நடக்கச் செய்வதுதான் உண்மையான கல்வி.

வித்தையுடன் விநயசம்பத்தும் வெகு அவசியம்!

புத்தி இயதயத்துக்குப் பணியும் போதுதான் இதயத்தே உள்ள அகவொளி புலனாகும். அதுவே ஆண்டவன். அதை அறிவதே கல்வியின் பயனாகும்.

- யாரோ ஒரு மகான்.

வார்த்தையை மாற்றுங்கள், வாழ்க்கை மாற்ம்!

2007-02-20T21:17:00.000+08:00

"எண்ணத்தில் கவனமாய் இருங்கள்;
ஏனெனில் எண்ணங்கள்தாம் சொற்களாகின்றன.

சொல்லில் கவனமாய் இருங்கள்;
ஏனெனில் சொற்கள்தாம் செயல்களாகின்றன.

செயலில் கவனமாய் இருங்கள்;
ஏனெனில் செயல்கள்தாம் பழக்கங்களாகின்றன.

பழக்கத்தில் கவனமாய் இருங்கள்;
ஏனெனில் பழக்கங்கள்தாம் ஒழுக்கங்களாகின்றன.

ஒழுக்கத்தில் கவனமாய் இருங்கள்;
ஏனெனில் ஒழுக்கம்தான் உங்கள் வாழ்வை வடிவமைக்கின்றது!"

- அருட்தந்தை வேதாத்திரி மகரிஷி

மழை @ வரலாறு காணா வெள்ளம் - ஜொகூரில்!

2007-01-26T19:30:00.000+08:00

மழை / / / / / / / / / / / / / / / / / / / / // / / / / // / / / / /
விடாது மழை / / / / / / / / // / / / / / / / / / / / / / / / / / / / / / /
நேற்று மழை! இன்றும் மழை! / / / / / / / / / / / / / / / / / / / / / /
///////////////////////////////////////////////////////////////////////////////////
வானிலை ஆய்வு கழகம்
அறிக்கை விடுத்துள்ளது...
'மூன்றாவது அலை' வர வாய்ப்புள்ளது
என்று.

கடந்த டிசம்பர் மாதத்தில் 'முதல் அலை' ஏற்பட்டு மக்கள் அவதிக்குள்ளாயினர் - குறிப்பாக எங்கள் ஜொகூர் மாநிலத்தில் பெருவாரியான இடங்களில் வரலாது காணாத ( கடந்த 100 ஆண்டுகளில் - உண்மையா என்று தெரியவில்லை ! ) வெள்ளம்! 19.12.2006 முதல் ஜொகூரில் எங்கு பார்த்தாலும் வெள்ளம். வெள்ள நீர் மட்டம் குறைதாது 1 மீட்டர் முதல் 5 மீட்டர் வரை - சில இடங்களில் (ஒரு தரை வீட்டை மூழ்கடிக்கும் அளவு என்றால் பார்த்துக்கொள்ளுங்களேன் ! )

சிகாமாட் மாவட்டத்திலுள்ள லாபிஸ், சா'ஆ பட்டணங்கள் வெள்ளத்தால் பாதிக்கப்பட்டன. குறிப்பாக சிகாமட் பட்டணம் வெள்ளத்தால் போக்குவரத்து முதல் மின்சாரம் வரை அனைத்தும் துண்டிக்கப்பட்டது.

அதனை அடுத்து குளுவாங், பத்து பகாட், ஜொகூர் பாரு மற்றும் கோத்தா திங்கி மாவட்டங்களில் வெள்ள துயர் துடைப்போர் மையங்களில் தஞ்சம் புகுந்தவர்களின் எண்ணிக்கை 100,000 ஐயும் தாண்டியது.

வெள்ளத்தின் கொடூரம் பார்த்திராத பச்சிளம் குழந்தைகள், சிறுவர்கள், இளைஞர்கள் பெரும் அதிர்ச்சிக்குள்ளாயினர்! பெரியவர்கள் இம்மாதிரியான அபூர்வ வெள்ளத்தைத் தம் வாழ்நாளில் சந்திப்பது இரண்டாவது முறை என்று கருத்துரைத்தனர்.

கோத்தாதிங்கி பட்டணம் முழுதும் வெள்ளத்தால் மூழ்கியது - முதல் அலையில்.

வெள்ளம் சற்று வடிந்த இரண்டாவது வாரத்தில் ( ஜனவரி, 2007 )மீண்டும் இரண்டாவது அலை - வெள்ளம்! இம்முறை ஜொகூர் மாநிலத்தைத் தவிர்த்து அடுத்த மாநிலங்களான மலாக்கா மற்றும் பகாங் பாதிப்புக்குள்ளாயின.

முதல் கட்ட வெள்ளத்தில் இழப்பீடு முன் அனுமானத்தின் தொகை 100 மில்லியன் என்று கூறப்பட்டது. இரண்டாவது வெள்ளத்தின் காரணமாக இழப்பு / சேதத்தின் தொகை இன்னும் கூடும்.

ஆச்சரியம் என்னவென்றால், டிசம்பர் பிற்பகுதியிலிருந்து வானம் மழை மேகங்களை போர்த்தியிருந்ததால் சூரியனை காணமுடியவில்லை!
பொங்கல் ரிலீசாக புதுப்படங்கள் வருவது போல் ( கோபிக்க வேண்டாம் )
சூரிய பகவான் சரியாக பொங்கலன்று மக்களுக்கு தரிசனம் தந்தார்!

அதன் பிறகு அவ்வப்போது வந்து போய் கண்ணா மூச்சியாட்டம் தான்!

அப்பாட....வெள்ளம் கொஞ்சம் தனிந்து இருக்கின்ற சமயத்தில் மீண்டும்
'மூன்றாவது அலை' வரும் என்ற அறிவிப்பு மக்களை பீதிக்குள்ளாக்கியுள்ளது!

இன்றுவரை பத்து பகாட்டில் வெள்ள நிவாரண மையங்களில் தங்கியிருப்போர் எண்ணிக்கை 40,000 க்கும் மேல்! பிற இடங்களில் வெள்ளம் வடிந்து நிலைமை வழக்க நிலைக்கு வந்துள்ளது.

இன்று எங்கள் இடைநிலைப் பள்ளியில் எழுந்துள்ள கேள்வி:
"நாளை மழை வருமா ?"
நாளை எங்களுக்கு சிறப்பு பள்ளிநாள் ( சீனப் புத்தாண்டு சிறப்பு விடுமுறைக்கு - முன்னதாக மாற்று(ஈடு செய்யும்) பள்ளிநாள் )

மழை தொடர்ந்தால், நாளை ஏற்பாடாகியிருக்கும் அனைத்து மாணவர்களுக்கான புறப்பாட நடவடிக்கைகளில் ஒன்றான 'தடை எதிர்ப்பு ஓட்டம்' ஒத்திவைக்கப்படும்!

வெளியே தூரல் நின்ற பாடில்லை!

விவேகச் சிந்தனை

2007-01-03T22:55:00.000+08:00

வாழ நினைத்தால் வாழலாம்....!

பார்க்கத் தெரிந்தால் பாதைத் தெரியும்
பார்த்து நடந்தால் பயணம் முடியும்
பயணம் முடிந்தால் கதவு திறக்கும்
கதவு திறந்தால் காட்சி கிடைக்கும்
காட்சி கிடைத்தால் கவலை தீரும்
கவலைத் தீர்ந்தால் வாழலாம்

வாழ நினைத்தால் வாழலாம்
வழியா இல்லை பூமியில்..!

போராடு மனிதா..!

"கீழே விழுந்த நாம் எழுந்திருக்க வேண்டும்.
மறுபடியும் போராட வேண்டும்.
எத்தனை முறை விழுந்தாலும் எழுந்து எழுந்து போராட வேண்டும்.
உற்சாகத்துடன் போராட வேண்டும்.

போராட வேண்டியது நமது கடமை.
அது ஒன்றே நாம் செய்வதற்கு உரியது.
பலனை அளிப்பவன் இறைவன்.
நாம் முயற்சி என்னும் சாம்ராஜ்யத்தின் மன்னர்கள்
இறைவனே பலன் என்னும் சாம்ராஜ்யத்தின் சக்ரவர்த்தி..!"

உங்களுக்குள் ஒரு தலைவன்!

2006-12-31T21:03:00.000+08:00

வரும் 2007-ம் ஆண்டை வரவேற்க இதோ சில தன்னம்பிக்கையுடன் வாழ வைக்கும் வார்த்தைகள் - வாழ்வியல் சிந்தனை முத்துக்கள்!

முதலில் நீங்கள் செயல்படத் துவங்குங்கள், அதன் பின்பு அனைத்தும் சரியாகிவுடும்.
வழக்கத்திற்கு மாறாக சற்று மாறுபட்டு இருப்பதுதான் சாதாரணமானவற்றிற்கும் அசாதாரணமானவற்றிற்கும் உள்ள வித்தியாசம்.
கற்பனையானது அறிவை விட மிகவும் முக்கியமானது. -[அல்பர்ட் ஐன்ஸ்டின்]

உங்கள் தினசரி நடவடிக்கைகளின் போது கீழ்க்கண்டவைகளைக் கடைபிடியுங்கள்:

மனோரீதியான எண்ணக்கட்டுப்பாடு: உங்கள் தினசரி செயல்பாடுகளில் இறங்கும் போது எண்ணங்களைத் தொடர்ந்து கவனித்து வாருங்கள். உங்கள் உள்மனதில் மற்றும் ஆழ்மனநிலைகளில் எதிர்மறையான எண்ணங்கள் உருவாவதற்கு முன்பு அழித்துவிடுங்கள். அனைத்தையும் குறித்து நேர்மறையான மனோநிலையைப் பராமரியுங்கள்.

மனோரீதியான பேச்சுக்கட்டுப்பாடு: நீங்கள் என்ன பேசிக்கொண்டிருக்கிறீர்கள். எப்படிப் பேசிக்கொண்டிருக்கிறீர்கள் என்பதைப் பற்றி தொடர்ந்து எச்சரிக்கையுடன் கண்காணியுங்கள்.எதிர்மறையான பேச்சுக்களையும், தீய வார்த்தைகளையும் தவிர்த்து விடுங்கள். நேர்மையாகவும் உண்மையாகவும், திட நம்பிக்கையுடன் பேசுங்கள்.

எண்ணங்களை மனக் காட்சியாகப் பார்த்தல்: விருப்ப எண்னங்கள் உங்கள் மனதில் உட்புகும் ஒவ்வொரு நேரமும் உடனடியாக நீங்கள் ஏற்கனவே மனதில் கொண்டிருந்த காட்சிகளை நீங்களாகவே மனக்காட்சியாக காணுங்கள்.

உடனடி தியானம்:எப்பொழுதெல்லாம் ஓய்வு அல்லது புத்துணர்வு தேவைப்படுகிறதோ அப்பொழுது சற்றுநேரத்தை உடனடியாக தியானப்பயிற்சிக்கு ஒதுக்குங்கள்.

ஆக்கப்பூர்வமான ஒளிகொண்ட மனக்காட்சி:தியானப்பயிற்சியை மேற்கொண்ட பிறகு ஆக்கப்பூர்வமான மனக்காட்சியைத் தினமும் ஒரு வேளைவ்வது பயிற்சியாக செய்து பழகுங்கள்.

ரெங்கம் தமிழ்ப்பள்ளியின் மாணவர் புறப்பாடப் பணி முகாம்.

2006-10-30T19:41:00.000+08:00

குளுவாங் பட்டணத்திலிருந்து சுமார் 25 கி.மீ தூரத்தில் இருக்கும் ரெங்கம் (ஊரின் பெயர்) தமிழ்ப்பள்ளியின் மாணவர் புறப்பாடப் பணி முகாம் அக்டோபர் 30 & 31 இல் பள்ளி வளாகத்திலே நடைபெறுகிறது. இன்று பிற்பகல் சுமார் 2 மணி அளவில் தொடங்கிய பணி முகாமில் சுமார் 80 மாணவ மாணவிகள் பங்கெடுக்கின்றனர். அவர்கள் படிநிலை 2 ( ஆண்டு 4,5 & 6 ) உட்பட்ட மாணவர்களாவர்.

புறப்பாட நடவடிக்கைகளில் ஒன்றான இப்பணி முகாம் ஆண்டுதோறும் நடைபெற்று வருகிறது. ரெங்கம் பள்ளியின் பெற்றோர் ஆசிரியர் ஆதரவில் நடைபெறும் இப்பணி முகாமை திறந்து வைக்க EBOR Research Centre (CEP Rengam) - சி.இ.பி ஆய்வு மையத்தின் நிர்வாக இயக்குநர், திரு.R.கிருஷ்ணன் அழைக்கப்பட்டுள்ளதாகப் பள்ளியின் தலைமையாசிரியர் திரு.கெ.முனுசாமி அவர்கள் தெரிவித்தார். இந்நிகழ்வு இன்று இரவு 8.00 மணிக்கு திறப்பு விழா காணவிருக்கின்றது.

தமிழ்ப்பள்ளிகளின் மாணவர் நலன் கருதி சில தனியார் நிறுவனங்கள், தமிழ் ஆர்வலர்கள் ஆதரவு தந்து கணிசமான நிதியுதவியும் செய்து வருவதாக பணி முகாம் பொறுப்பாளர் திரு.A.முரளி கூறினார்.

இம்முகாம் சிறப்பாக நடைபெற பள்ளியின் 20 ஆசிரியர்களும் , மாணவர்களுக்குப் பயிற்சிகள் வழங்க டத்தோ ஹசி ஹஸான் யூனோஸ் ( SMK Dato Hj.Hassan Yunus ) இடைநிலைப்பள்ளி சாரணர் இயக்க மாணவர் 10 பேர் கலந்து சிறப்பிக்கிறார்கள்.

இப்பணி முகாமின் நோக்கங்கள் மூன்று : அவை யாதெனில் , மாணவர்கள் நடைமுறை பிரச்னைகளை எதிர்கொள்ள சுயகாலில் நிற்கும் திறன் அடைதல், காலம் தவறாமல் நடவடிக்கைகளில் பங்கெடுத்து சிறப்பாக செய்து முடித்தல் மற்றும் மாணவர்களின் கட்டொழுங்கை நிலைநாட்டுதல் ஆகும்.

பணி முகாமில் மாணவர்கள் கூட்டுமுயற்சியில் கூடாரம் அமைத்து, சுயமாக சமைத்து, போட்டிகளில் கலந்து, தடைகளை வென்று, மனவுறுதி ஏற்பட நல்ல வாய்ப்பு ஏற்பட்டுள்ளதாக பொறுப்பாசிரியர் திரு.D.வாசு அவர்கள் தெரிவித்தார்.

( மேலே படங்களில்,மாணவர்கள் இன்று மாலை பெய்த மழையையும் பொருட்படுத்தாமல் பணி முகாம் நடவடிக்கைகளில் ஆர்வமுடம் கலந்து கொள்வதைப் பார்க்கலாம் )

குழந்தைக் கவிஞர்- அழ.வள்ளியப்பா

2006-10-25T22:31:00.000+08:00

திரு அழ.வள்ளியப்பா எனும் கவிஞரைப் பற்றி முழுமையாக அறியும் முன்னே அவர் எழுதிய சிறுவர்களுக்கான கவிதைகளைப் படித்திருக்கிறேன். தமிழ்ப்பள்ளி ஆறாம் ஆண்டு ( 12 வயது ) இறுதியில் என்னைத் 'தலைச்சிறந்த மாணவன்' என்று தேர்ந்தெடுத்து பரிசு வழங்கினார்கள். எனக்குக் கிடைத்த பரிசு - 'மலரும் உள்ளம்' எனும் சிறார் கவிதைப் புத்தகம். குழந்தைக் கவிஞர் அழ.வள்ளியப்பா அவர்கள்தான் எழுதியிருந்தார்.

கவிஞரின் நடை; இனிய சொற்கள்; உயர்ந்த கருத்துக்கள் இவையாவும் அவரது படைப்புகளில் காணலாம்.

இயல்பாகவே அவரது கவிதைகளைப் படிக்கும் சிறுவர்கள் கவிநயத்தில் அல்லது சந்தச் சொற்களில் ஈர்க்கப்படுவர். குழந்தைகளின் வயதையும், அவர்களது மனப் போக்கையும் நன்கு அறிந்தவர்களால் மட்டுமே குழந்தைகளுக்கான கவிதையைப் புனைய முடியும்! திரு. வள்ளியப்பா அவர்களுக்கு இக்கலை கைவந்தது என்றால் மிகையாகாது.

சொல்லப்போனால், கவிஞரின் குழந்தை உள்ளத்தில் மலர்ந்தவை அவரது கவிதைகள். இவற்றில் இயற்கையின் அழகைக் காட்டுகிறார்; நன்னெறிப் பண்புகளைப் புகட்டுகின்றார்; உயிர்களிடத்தில் அன்பு வைக்கும்படி கூறுகிறார். அதோடு மாத்திரமல்லாமல் மேலான உயர்ந்த எண்ணங்களைக் குழந்தைகளின் மனத்திலே ஆழமாகப் பதிய வைத்து விடுகிறார்.

'உலக வாழ்விற்கு அன்பு இன்றியமையாதது என்னும் உண்மையைப் பலவாறாகப் பாடியுள்ளனர்'. இவ்வுண்மையைக் குழந்தைகளுக்கு ஏற்ற முறையில் கவிதை இயற்றியுள்ளார் இக்கவிஞர். சிறுபிள்ளைகள் பார்த்து அறிந்த நகைகளையும், மலர்களையும் ஒன்றன் பின் ஒன்றாக நினைவு படுத்தி இறுதியாக, அன்பின் நலன்களைக் கூறுகிறார்:

பட்டை போடப் போடத்தான்
பளப ளக்கும் வைரமே;
மெருகு கொடுக்கக் கொடுக்கத்தான்
மினுமி னுக்கும் தங்கமே;
அரும்பு விரிய விரியத்தான்
அளிக்கும் மணத்தை மலருமே;
அன்பு பெருகப் பெருகத்தான்
அமைதி அடையும் உலகமே!

இன்றை நாளில் உலக மக்களை அல்லற்படுத்தும் (அணு ஆயுத) போர் முதலிய பல்வேறு நாச வேலைகள் ஒழிந்து, அமைதி நிலவ வேண்டுமென்றால் 'அன்பு' என்னும் மக்கட் பண்பு இவ்வுலகில் பெருக வேண்டும் என்று ஆசைப்படுகிறார் கவிஞர். இன்றைய சூழலுக்கும் வெகுவாய்ப் பொருந்துகிறது பாருங்கள்!

நன்றி "மலரும் உள்ளம்" -குழந்தைப் பாடல்கள், ஒன்பதாம் பதிப்பு: செப்,1975

பற்றிவிடு மோனத்தை!

2006-10-13T23:34:00.000+08:00

உள்ளும் புறமும் இருளகற்ற
பற்றவை தீபத்தை!
ஒளிரும் நயனம் பரப்பும்
மோன மிச்சத்தை!

நம் இதயம் இருட்டாகிக் கிடப்பதை எப்போது உணர்கிறோம்? எப்போது கடைசியாய் இது பற்றிச் சிந்தித்தோம்? இதில் அறிவு மின்னலாய்ச் சுருங்கிப்போனது. அறிவின் தன்மை பற்று வைப்பதுதானே. அறிவை அறிய முயன்றதுண்டா? வாலறிவு படைத்ததை எதனுடனாவது ஒப்பிடலாகுமா?

நினைத்தது கிடைக்கவில்லையே என்று வருந்துவதில் பயனில்லை;கிடைத்ததில் மகிழ்வோம்! மனதை சாட்சி வைப்போம். எது நிரந்தரமோ அதுவே ஆனந்தம்.எது ஆனந்தமோ அது வீடு. இப்போதே விட்டு விடு கவலை முட்டைகளை! தட்டி விடு சுந்தரச் சிந்தையை! அவன் அருளாலெ அவன் தாள் வணங்கு. அறிமுகமாகும் மோனவெளி. இடைவிடாது பற்ற வேண்டியது மோனத்தை மட்டுமே!

சீடன் தயாராக இருக்கும்போது குரு தோன்றுவார்!

2006-09-17T22:49:00.000+08:00

கடந்த வாரம் பத்து பகாட்டில் வாழும் விரிவுரைஞர் உயர்திரு.மோகன் அவர்களைச் சந்தித்து உரையாடினேன். சுமார் மூன்று ஆண்டுகளுக்கு முன்பு நான் பினாங்கு மாநிலத்துக்கு மேற்கல்விக்காக சென்றது முதல் அவரின் தொடர்பு தற்காலிகமாக இல்லாமல் இருந்தது. அவர் பத்து பகாட் ஆசிரியர் பயிற்சிக் கல்லூரியில் பணியாற்றி வருகிறார். அவர் தற்போது முனைவர் பட்டத்திற்கு ஆய்வு செய்துகொண்டிருக்கிறார்.

அன்றைய சந்திப்பு அசாதாரணமானது. வழமையாக பொதுவான பணி, சமூக ஈடுபாடு, தொழில் நுட்பம் என்ற வட்டத்தைத் தாண்டி 'ஆன்மீகம்' எங்கள் உரையாடலில் முக்கிய விசயமாக இருந்தது. அவர் சில மாதங்களுக்கு முன்பு இந்தையாவுக்குச் சென்றதாகவும். அங்கு அவர் 'ஆன்மீகப் பயணம்' மேற்கொண்டதாகவும் குறிப்பிட்டார். தெய்வாதீனமாக, அவரின் குருவுடன் சுமார் ஒரு மாத காலம் பயணித்த ஆன்மீக விசயங்களைப் பகிர்ந்து கொண்டார். குரு என்றேன் அல்லவா? அவர் வேறு யாருமல்ல. இப்போது இந்திய நாட்டில் மட்டுமல்லாமல் வெளிநாடுகளிலும் 'வாழ்வியல் கருத்தரங்குகளை' தீர்கத்துடன் உபதேசித்து வருகின்ற சுவாமிஜி - பரமஹம்ச ஸ்ரீநித்யானந்தர் அவர்கள்தான்.

நான் சுவாமிஜி - பரமஹம்ச ஸ்ரீநித்யானந்தர் பற்றி அச்சு ஊடகங்கள் வழிதான் கேள்வி பட்டிருக்கிறேன். அவர் 'குமுதம்' இதழில் எழுதி வரும் 'மனதைத் திற மகிழ்ச்சி பொங்கட்டும்' எனும் ஆன்மீகக் கட்டுரைத் தொடர் படித்திருக்கிறேன். அவ்வளவே. விரிவுரைஞர் திரு.மோகன் அவர்கள் 'குரு'வைப் பற்றி சிலாகித்துப் பெசிக்கொண்டிருந்தார். நிச்சயமாக குருவை நேரில் சந்தித்து ஆன்மீக உரையைக் கேட்கும் பாக்கியம் சிலருக்கே அமைவதுண்டு. 'சீடன் தயாராக இருக்கும்போது குரு தோன்றுவார்' எனும் வாசகம் என்றும் பொய்த்ததில்லை!

மறுநாள் பள்ளியில் சக ஆசிரியர் நண்பர் - அறைக்கு அலுவல் காரணமாக சென்றபோது அவர் மேசையில் இருந்த ஒரு 'சீடி' கண்ணில் பட்டது. எட்டுத்துப் பார்த்தேன். என்ன ஆச்சரியம் - பரமஹம்ச ஸ்ரீநித்யானந்தரின் 'வாழ்வியல் போதனைத் தொடர்தான் அது. 'இது audio CDயா? video CDயா?" என்று நண்பரிடன் கேட்டேன். "VCD" என்று பதிலளித்தார்.

என் கேள்வியின் நோக்கத்தைப் புரிந்து கொண்டார் போலும். "வேண்டுமென்றால் எடுத்துச் செல்லுங்கள்" என்று புன்னகைத்தார்.
மகிழ்ச்சியுடன் 'நன்றி' தெரிவித்து இரவல் வாங்கி வந்தேன்.

(தொடருவேன்)

உன்னால்தான் மலேசியா - 49வது தேசிய தினம்

2006-08-31T11:51:00.000+08:00

49ஆம் ஆண்டு சுதந்திர நாள் நிறைவு விழா கொண்டாட்டக் காலக் கட்டத்தில் மக்கள் அனைவரும் மகிழ்ந்திருக்கும் வேளையில் நாடு அடைந்துள்ள வளர்ச்சியினைக் கண்டு நாம் பெருமிதப்படுவது உண்மை.

மலேசியா பல்லின மக்கள் வாழும் அமைதிப் பூங்காவாக விளங்கும் அரிய நாடு.

"என்ன வளம் இல்லை, இந்தத் திருநாட்டில் ஏன் கையை ஏந்த வேண்டும் வெளிநாட்டில்," என்ற பாடல் வரிகள் கூறுவது போல எல்லா வகை வளங்களும் நிறைந்த நாடுதான் நம் மலேசியா.

தேசிய தினச் சிறப்புச் செய்தியில் " நாட்டின் வலிமைக்கு எல்லோரும் இணைவீர்!" என்று பிரதமர் வலியுறுத்தியுள்ளார்.

நாடு நலம்பெறவும், மேலும் வலிமை பெற நாட்டு மக்கள் அனைவரும் ஒன்றுபட்டு பாடுபடவேண்டுமென்று பிரதமர் டத்தோஸ்ரீ அப்துல்லா அகமட் படாவி நேற்று நாட்டு மக்களுக்கு விடுத்த தேசிய தினச் செய்தியில் வலியுறுத்தினார்.

சுதந்திர காலம் தொட்டு நாடு அனுசரித்து வரும் இந்த வலிமையை நிலைநாட்ட வேண்டும். நாம் பெற்ற மேம்பாடும் வளர்ச்சியும் நாட்டு மக்களின் இன, மத பாகுபாடு இல்லாத ஒன்றுபட்ட உணர்வால் உருவானவை என்றார் பிரதமர்.

உலக நாடுகளில் மலேசியா என்ற நாடு புகழ்வாய்ந்த நாடாக இன்று விளங்குவதற்குக் காரணம், இந்நாட்டில் ஏற்பட்டிருக்கின்ற பொருளாதார நிலைத்தன்மையும், அரசியல் நிலைத்தன்மையும், பல்லின மக்களின் ஒற்றுமையும், சிறந்த தலைமைத்துவமுமே ஆகும். இவை அனைத்தும் ஒன்றோடு ஒன்று பின்னிப் பிணைந்தவை.

இந்த வேளையில் நாட்டின் தேசிய கோட்பாடுகளை நினைவுகூர்ந்து பார்ப்பது சாலச் சிறந்தது.

1) இறைவன் மீது நம்பிக்கை வைத்தல்.
2) பேரரசருக்கும் நாட்டிற்கும் விசுவாசம் செலுத்துதல்.
3) அரசியலமைப்புச் சட்டத்தை உறுதியாகக் கடைபிடித்தல்.
4) சட்ட முறைப்படி ஆட்சி நடத்துதல்.
5) நன்னடத்தையும் ஒழுக்கத்தையும் பேணுதல்.

மலேசியர் என பெருமை கொள்வோம்!
உன்னால்தான் மலேசியா!

2006-08-11T09:29:00.000+08:00

ஜோகூர் மாநில இடைநிலைப்பள்ளி தமிழாசிரியர் மன்றத் தலைவர் :
திரு. N.தமிழ்வாணன் ( SMK Skudai, Johor.)

"இம்மாதிரியான கருத்தரங்கின் வழி பல்வேறு தகவல்களை பரிமாறிக்கொள்ள சந்தர்ப்பம் ஏற்படுகிறது. முதல் நிகழ்வாக தகவல் தொழில் நுட்ப அடிப்படையில் எவ்வாறு கற்றல் கற்பித்தலை இன்னும் சிறப்பாக நடத்தலாம் என்பதைப் பற்றிய விளக்கம் அளிக்கப்பட்டது. இதனால், இதுவரை தகவல் தொழில் நுட்பத்தைத் தங்கள் கற்றல் கற்பித்தலில் பயன்படுத்தாத ஆசிரியர்கள்கூட மிகுந்த ஆர்வத்தோடு காணப்படிகின்றனர்.

அடுத்த நிகழ்வாக, மாணவர்கள் தேர்வில் சிறப்பாகத் தேர்ச்சியடைய வழிவகை செய்ய பல்வேறு விளக்கங்கள் அளிக்கப்பட்டன. இதன்வழி ஆசிரியர்கள் மேலும் தங்கள் மாணவர்களின் அடைவு நிலையை உயர்த்த முயற்சி எடுப்பதற்கான வாய்ப்பு ஏற்பட்டுள்ளது.

அதோடு, ஆசிரியர்கள் ஒரு குடும்ப சூழலில் தமது ஆசிரியர் பணி தொடர்பான பல்வேறு உத்திகளையும் கருத்துகளையும் பரிமாறிக்கொள்ள இக்கருத்தரங்கு ஒரு களம் அமைத்துக் கொடுத்ததென்றே கூறவேண்டும்.

இக்கருத்தரங்கை ஏற்பாடு செய்ய எல்லா வகையிலும் முயற்சிகள் மேற்கொண்ட ஜோகூர் மாநில இடைநிலைப்பள்ளி தமிழாசிரியர்கள் செயற்குழுவினருக்கு எனது நன்றியைத் தெரிவித்துக் கொள்கிறேன்".

2006-08-10T09:44:00.000+08:00

ஜோகூர் மாநில இடைநிலைப்பள்ளி தமிழாசிரியர்களுக்கான தகவல் தொழில் நுட்பக் கருத்தரங்கில் நேற்று சுமார் 90 தமிழாசிரியர்கள் பங்கெடுத்தனர். மாநில அளவில் நடைபெற்று வரும் இப்பயிலரங்கில் குறிப்பிட்ட சில தேர்ந்தெடுக்கப்பட்ட ஆசிரியர்களே பங்கெடுக்க வகைசெய்யப்பட்டுள்ளது.

பொதுவாக பெரும்பாலான ஆசிரியர்கள் அடிப்படை தகவல் தொழில் நுட்ப அறிவைப் பெற்றிருக்கின்றனர். ஆனாலும் கூட அதைக் கற்றல் கற்பித்தலில் பயன்படுத்துவது மிகக் குறைவு. மாற்றம் நடைபெற வேண்டும் என்பதற்காகவே இக்கருத்தரங்கு ஏற்பாடு செய்யப்பட்டுள்ளது.

மாற்றத்திற்கு தமிழாசிரியர்கள் தயாரா ?

தகவல் தொழில் நுட்பப் பயிலரங்கு

2006-08-08T13:47:00.000+08:00

ஜோகூர் மாநில இடைநிலைப் பள்ளி தமிழாசிரியர்களுக்கான தகவல் தொழில் நுட்பக் கருத்தரங்கு இன்று , ஆகஸ்ட் திங்கள் 8-ஆம் நாள் முதல் 11-ஆம் நாள் வரை, மலாக்காவிலுள்ள ஸ்திரேட் மெரீடியன் விடுதியில் ஏற்பாடு செய்யப்பட்டுள்ளது.

இக்கருத்தரங்கில் / பயிலரங்கில் மாநிலத்திலுள்ள 90 தமிழாசிரியர்கள் கலந்து கொள்ள விருக்கிறார்கள் என்று மாநில கல்வி அமைச்சின் தமிழ் மொழிப் பிரிவு துணை அதிகாரி திரு. விஜயன் இராமசாமி தெரிவித்தார்.

தகவல் தொழில் நுட்பத்தை கற்றல் கற்பித்தலில் பயன்படுத்தும் முறைமை,
பயிற்றுத் துணைக் கருவிகள் இவற்றோடு கற்பித்தலில் புதிய யுக்திகளையும் அடையாளம் காணும் கருத்தரங்காக அமையும் என்று நிகழ்வு ஏற்பாட்டுக் குழுத் தலைவருமாகிய திரு.விஜயன் இராமசாமி கூறினார்.

பி.கு: இப்பயிலரங்கில் 'தமிழ் கற்றல் கற்பித்தலில் பல்லூடகத் தகவல் தொழில் நுட்பத்தின் பயன்பாடு' - (7-வது உலகத் தமிழாசிரியர் மாநாட்டில் படைக்கப்பட்ட கட்டுரை) மற்றும் 'தகவல் தொழில் நுட்பத்தில் வலைப்பூவும் மின்தமிழும்' எனும் இரண்டு கட்டுரைகள் அடியேன் வழங்க விருக்கின்றேன்.

வால் மட்டும் நுழையவில்லை!

2006-06-19T20:07:00.000+08:00

ஓர் ஆசிரியர் தம் மாணவனுக்கு அறிவுரைகளைக் கூறிக் கொண்டிருந்தார்; அப்போது மாணவன்,ஓர் எலி அதன் வளைக்குள் நுழைவதைக் கண்டான்.பின் அதையே உன்னிப்பாகப் பார்த்துக் கொண்டிருந்தான்; அதனால் குரு கூறியதே அவனுக்குத் தெரியாது போயிற்று.
குரு அறிவுரை கூறி முடிந்ததும்," மணவா, எல்லாம் நுழைந்ததா?" என்றார்.
மாணவன்," எல்லாம் நுழைந்தது, வால் மட்டும் நுழையவில்லை!", என்றான்.

குறிப்பு:
இங்கு 'வலைக்குள்' பதிவை நுழைப்பதில் பிரச்னை ஏற்படுகிறது.

மேலும் சில உ.த.மாநாட்டுக் காட்சிகள்-2

2006-06-13T16:06:00.000+08:00

மிக அதிகமான எண்ணிக்கையைக் கொண்ட ( நூற்றுக்கும் மேற்பட்டோர் ) வெளிநாட்டுப் பேராளர்களாக - சிங்கை தமிழாசிரியர்கள் மற்றும் கல்விமான்கள்

தஞ்சாவூர், தமிழ்நாட்டைச் சார்ந்த திரு.ஜோன் பிரிட்டோ தாம் எழுதிய புத்தகத்தை டத்தோ ஸ்ரீ ச.சாமிவேலு அவர்களிடம் காண்பிக்கிறார்.

சிங்கப்பூர் பிரதிநிதி, நினைவுப் பரிசைப் பெறுகிறார்.

மொரிசியஸ் நாட்டுப் பேராளர்கள்

தென் ஆப்பிரிக்காவைச் சார்ந்த பேராளர், டாக்டர் ஏ.எம்.பிள்ளை,நினைவுப் பரிசைப் பெறுகிறார்.

ஏற்பாட்டுக் குழுத் தலைவருடன்(வலம்), சிங்கையச் சார்ந்த திரு.பொன்.சுந்தரராசு மற்றும் திரு.T.வேணுகோபால்(இடம்)

சிங்கப்பூர் கட்டுரைப் படைப்பாளர் திரு.முகமட் ஷாரிப்ஃ( இடம்) அவர்களுடன் வலைப்பதிவாளர்.

உலகத் தமிழாசிரியர் மாநாட்டுக் காட்சிகள்

2006-06-13T00:54:00.000+08:00

மாநாட்டுத் திறப்புவிழாவிற்குப் பிறகு பன்னாட்டுப் பேராளர்கள் சிலருடன் பொதுப்பணி அமைச்சர் டத்தோ ஸ்ரீ ச.சாமிவேலு அவர்கள்.

சிறப்பு வ்ருகையாளர்கள்:இடமிருந்து வலம் ( டத்தோ முனைவர் த.மாரிமுத்து, துணை அமைச்சர் டத்தோ ஜி.பழனிவேல் & டான்ஸ்ரீ K.R.சோமசுந்தரம்.

ஏற்பாட்டுக் குழுவினர்: திரு.சோ.சுப்பிரமணி(வலம்) & திரு.எம்.முத்துசாமி(இடம்)

ஏற்பாட்டுக் குழுவினர்:இடமிருந்து வலம்( திரு.எம்.புருஷொத்மன்,திரு.எம்.சுப்ரமணியம்&திரு.V.பரமசிவம்

மலேசியப் பேராளர்கள்

இந்தோனேசியா பேராளர் -மேடானில் தமிழ் கற்றல் மையம் ( Medan Tamil Learning Centre )பொறுப்பாளர் திரு.நீலமேகனுடன் வலைப்பதிவாளர்.

தலைமையுரை - ஏற்பாட்டுக்குழு தலைவர் -7-வது உ.த.மா

2006-06-12T00:38:00.000+08:00

இணைப் பேராசிரியர் முனைவர் என்.எஸ்.இராஜேந்திரன், மலேசியா.
தலைமையுரை

அகர முதல எழுத்தெல்லாம் ஆதி பகவன் முதற்றே உலகு (1)

என்னை நன்றாக இறைவன் படைத்தனன்
தன்னை நன்றாகத் தமிழ் செய்யுமாறே!

மாண்புமிகு அமைச்சர் பெருமகனார் டத்தோ ஸ்ரீ ச.சாமிவேலு அவர்களே,
மாபுமிகு துணை அமைச்சர்களே, பெருமதிப்பிற்குரிய டான்ஸ்ரீ K.R.சோமசுந்தரம் அவர்களே..

இன்று மலேசியத் தமிழ்க்கல்வி வரலாற்றிலே ஒரு பொன்னாள்! இன்று வரலாறு படைக்கப்படுகின்றது. மலேசியத் தமிழர்களுக்கும் இத்திருநாட்டிற்கும் சுமார் 1000 ஆண்டுகள் வரலாறு உண்டு. இராஜேந்திரச் சோழனின் ( என் பெயரைக் கொண்ட ) வருகையும் அவன் ஆண்ட அரசின் சான்றுகளும் இன்றும் கடாரத்தில் உள்ளன.

எனினும் அதிகமான தமிழர்கள் பெரும் எண்ணிக்கையில் 19-ஆம் நூற்றாண்டின் முற்பகுதியில் இந்நாட்டிற்கு வரத்துவங்கினர். அதே நூற்றாண்டின் பிற்பகுதியில் மேலும் அதிகமான தமிழர்கள் இந்நாட்டிற்கு வந்தனர். 20-ஆம் நூற்றாண்டிலும் ஆயிரக்கணக்கில் தமிழர்கள் இந்நாட்டிற்கு வந்தனர்.

'தேமதுரத் தமிழோசை உலகமெலாம் பரவும்வகை செய்தல் வேண்டும்' என்றான் பாரதி. மீசைக்கவிஞனின் வாக்கு இன்று நனவாகிக் கொண்டிருக்கிறது.

மலேசியத் தமிழ்க்கல்வி வரலாற்றில் இன்று ஒரு பொன்னாள்; நன்னாள். பொன்னெழுத்துக்களால் பொறிக்கப்பட வேண்டியத் திருநாள்.

அன்பு பேராளர்களே...,

1816-ஆம் ஆண்டு வரையறுக்கப்பட்ட தமிழ் கற்றல் கற்பித்தல் அணுகுமுறை வருகின்ற 2016-ஆம் ஆண்டோடு 200 ஆண்டுகள் எட்டிப்பிடிக்கவிருக்கின்றது. இந்த வரலாறு பதிவேட்டில் மட்டுமல்லாது நம் நினைவேட்டிலும் பதிக்கப்பட வேண்டும்.

தமிழர்கள் பல்வேறு நாடுகளிலிருந்து மலேசிய மண்ணில் தஞ்சம் புகுந்து 1000 ஆண்டுகள் ஆகின்றன என வரலாற்றுச் சான்றுகள் சான்றியம் இருக்கின்றன. கடந்த 200 ஆண்டுகளில் தமிழ் கற்றல் கற்பித்தல் ஒரு பரிணாம வளர்ச்சியை நம்மால் காணமுடிகின்றது.

நம்முடைய மாநாட்டின் நோக்கங்களான தமிழ்மொழி கற்றல் கற்பித்தலில் புதிய செல்நெறிகளை அறிவதும், எதிர்படும் சவால்களை அடையாளம் கண்டு அதனைத் தீர்ப்பதும், பன்னாட்டுத் தமிழ்க் கல்வியாளர்களுடன் கருத்துப் பரிமாற்றம் செய்வதுமே முதன்மை நோக்கங்களாக அமைகின்றன.

மூன்று நாள் நடைபெறக்கூடிய இம்மாநாடு சீரிய சிறப்போடும் புதுப்பொலிவோடும் நடைபெறுவதற்கு முக்கிய காரணம் ஒற்றுமை என்கின்ற அந்த 'மை'தான்.

உதிர்ந்த இந்த 'மை' நம் செயலக நிலைமையை வளமையாக்கியது. பேராளர்களின் கட்டுரைகளைத் தின்மையாக்கியது. மொத்தத்தில் நம் மாநாட்டை செழுமையாக்க்கியது.

இந்த மூன்று நாட்களில் ஆரோக்கியமான கலந்துரையாடல்களும் விவாதங்களும் சிறப்பாக நடந்தேற உள்ளன. இந்தக் கருத்துப் பரிமாற்றங்கள் நிச்சயமாக தமிழ் கற்றல் கற்பித்தலில் ஒரு பரிணாம வளர்ச்சியையும் நிச்சயம் ஏற்படுத்தும். பல்வேறு நாடுகளில் ஏற்படும் சவால்களை அவ்வப்போது ஒரு தொடர் நடவடிக்கையாக இருந்து சில திட்டங்களை வரையறுக்க இச்செயலகம் முடிவு கொண்டுள்ளது.

மாநாட்டுச் சிறப்புகள்:

* பேராளர்களின் எண்ணிக்கை ( 500க்கும் மேற்பட்டோர் )
* ஆய்வடங்கல் (60 கட்டுரைகள் இடம்பெறுகின்றன )
* நாடுகளின் பங்கேற்பு ( சிங்கப்பூர் , தமிழ் நாடு, பாண்டிச்சேரி, கனடா, மொரிசியஸ், தென்
ஆப்பிரிக்கா, இந்தோனேசியா, மலேசியா )

அன்பு வெளியூர் பேராளர்களே,

மலேசிய நாடு ஓர் அழகிய நாடு. இயற்கை அன்னை இயல்பாகவே வீற்றிருக்கும் ஒரு பொன்னாடு. வந்தவர்களை வாழ வைக்கவும் அரவணைக்கவும் வழிகாட்டும் திருநாடு. பல இடங்களில் நீங்கள் சுற்றிப்பார்க்கக்கூடிய தளங்கள் இருக்கின்றன.

இந்த 7-வது மாநாடு கோலாலம்பூரில் ஏற்று நடத்த பல்வேறு தரப்பினர் தங்கள் பங்கை ஆற்றியுள்ளனர்.

இந்நிகழ்வுக்கு அரனாக இருந்து புரவலராக வீற்றிருக்கும் தமிழ்த்திரு மாண்புமிகு டத்தோ ஸ்ரீ ச.சாமிவேலு அவர்களை இருகரம் கூப்பி வணங்குகிறேன். டத்தோ ஸ்ரீ யின் முழு ஆதரவு பெருமளவிலான நிதி உதவியும் நல் ஆலோசனையுமே இம்மாநாடு வெற்றி அடைய வழிவகுத்தது. அதுமட்டுமன்றி தேசிய நில நிதி கூட்டுறவுச் சங்கம் குறிப்பாக அதன் நிவாகத் தலைவர் பெருமதிப்பிற்குரிய டான்ஸ்ரீ டத்தோ K.R.சோமசுந்தரம் அவர்கள் அளித்த ஆதரவு நன்றிக்குரியது; நனைவுக்குரியது.

14 ஆண்டுகளுக்கு முன் சிங்கப்பூரில் தொடங்கிய இப்பயணம் இன்று கோலாலம்பூரில் இளைப்பாருகிறது.

உலகத் தமிழாசிரியர் மாநாடு இரண்டாவது முறையாக மலேசியாவில் ஏற்பாடு செய்யப்பட்டிருப்பதைக் கண்டு பெருமகிழ்வடைகின்றோம். பன்னாட்டுத் தமிழ்க் கல்வியாளர்கள் இங்குக் கூடியிருப்பதைக் கண்டு உள்ளம் பூரிப்பதோடு, இதுபோன்ற சந்திப்புகளும் நட்பும் தொடர வேண்டும், மேலும் இதனை மேம்படுத்துவதற்கான அனைத்து முயற்சிகளும் மேற்கொள்ளப்பட வேண்டும் என்று வேண்டிக்கொள்கிறோம்.

"கைத்திறச் சித்திரங்கள்,
கணிதங்கள் வான நூற்கள்,
மெய்த்திற நூற்கள், சிற்பம்,
விஞ்ஞானம், காவியங்கள்
வைத்துள தமிழர் நூற்கள்
வையத்தின் புதுமை என்னப்
புத்தகசாலை எங்கும்
புகுந்தநாள் எந்நாளொ' -( பாரதிதாசன் )

நன்றி, வணக்கம்.

மலேசியாவில் உலகத் தமிழாசிரியர் மாநாடு :ஒரு கண்ணோட்டம்

2006-06-11T20:56:00.000+08:00

ஆக்கம் : திருமிகு. எ.சகாதேவன்,
கௌரவச் செயலாளர்,7-வது உலகத் தமிழாசிரியர் மாநாடு.

1992-ஆம் ஆண்டு முதலாவது உலகத் தமிழாசிரியர் மாநாடு சிங்கப்பூரில் நடைபெற்றது. இம்மாநாட்டைச் சிங்கப்பூர்த் தமிழாசிரியர் சங்கம் ஏற்று நடத்தியது. மாநாடு ஏற்பாட்டுக் குழுவின் தலைவராகச் சகோதரர் வி.ஆர்.பி.மாணிக்கம் இருந்தார்.

இம்மாநாட்டில் மலேசியாவிலிருந்து ஐந்து பேராளர்கள் கலந்துகொண்டனர். மாநாட்டின் இறுதியில் இரண்டாவது மாநாட்டை மலேசியா ஏற்று நடத்த வேண்டுமென முடிவு செய்யப்பட்டது. சிங்கப்பூரில் மாநாட்டில் தேசிய ஆசிரியர் பணியாளர் சங்கச் சார்பில் பேராளராகக் கலந்து கொண்ட சகோதரர் கோ.இராதாகிருஷ்ணன் அவர்களிடம் அப்பொறுப்பு ஒப்படைக்கப்பட்டது.

1994-ஆம் ஆண்டு ஜூண் திங்கள் 9-ஆம் நாள் முதல் 12-ஆம் நாள் வரை, 'தகவல் யுகத்தில் தமிழ் கற்றல் கற்பித்தல்' எனும் கருப்பொருளில் இரண்டாவது உலகத் தமிழாசிரியர் மாநாடு மலாயாப் பல்கலைக்கழகத்தில் நடைபெற்றது. இம்மாநாட்டைக் கல்வியாளர்களோடு ஆசிரியர் சங்கங்களும் முன்னின்று நடத்தின. நன்னெஞ்சர்கள் பலர் நன்கொடைகளை வழங்கி இம்மாநாட்டுச் செலவின் ஒரு பகுதியை ஏற்றுக்கொண்டனர். பொதுப்பணி அமைச்சர் மாண்புமிகு டத்தோ ஸ்ரீ ச.சாமிவேலு அவர்களும், கல்வி அமைச்சர் டத்தோ சுலைமான் டாவுட் அவர்களும் இம்மாநாட்டுத் திறப்பு விழாவில் கலந்து சிறப்பித்தனர். மலேசியத் தலைமை கல்வி இயக்குநர் டான்ஸ்ரீ டாக்டர் வான் ஜாஹிட் நூர்டின் அவர்கள் மாநாட்டை அதிகார பூர்வமாக நிறைவு செய்து வைத்தார். இம்மாநாட்டின்வழி மலேசியத் தமிழாசிரியர்கள் உலக அங்கீகாரம் பெற்றனர்.

இம்மாநாட்டிற்குப் பிறகு பன்னாட்டுத் தமிழ்க் கல்வியாளர்களுடன் தொடர்பு உருவானது. தமிழாசிரியர்களின் பணித்திறம் உயர்வதற்கான வழிமுறைகள் ஆராயப்பட்டன. இதன் தொடர்பில் உலகத் தமிழாசிரியர்களின் மலேசியச் செயலகம் அமைக்கப்பட்டது. திரு.எ.சகாதேவன் மலேசிய நிகராளியாக நியமிக்கப்பட்டார்.

1996-ஆம் ஆண்டு மொரிசியஸ் நாட்டில் மூன்றாவது உலகத் தமிழாசிரியர் மாநாடு நடைபெற்றது. அம்மாநாட்டில் மலேசியாவிலிருந்து 35 பேராளர்கள் கலந்து கொண்டனர். இம்மாநாட்டில் மலேசியச் செயலகம் வாசிப்புத் திறன் பற்றிய ஆய்விதழ் ஒன்றனை வெளியிட்டது.

நான்காவது மாநாடு 1998-ஆம் ஆண்டு சென்னையில் நடைபெற்றது. இம்மாநாட்டில் 45 மலேசிய பேராளர்கள் கலந்து கொண்டனர். அம்மாநாட்டின் தொடர் நடவடிக்கையாக இணையம்வழி தமிழ்மொழி பயில்வதற்கான 'தமிழ்க்களம்' எனும் அகப்பக்கம் உருவாக்கப்பட்டது. சென்னையிலுள்ள தொடக்க பள்ளி ஆசிரியர் கூட்டணி அலுவலகத்திலிருந்து இது செயல்படுகிறது. அதன் செலவுத் தொகைக்காக மலேசியச் செயலகம் 300,000 ரூபாய் உதவி நிதி வழங்கியது. ஒவ்வொரு நாKஉம் 20,000 பேர் அதன்வழி தமிழ் பயின்று வருகின்றனர்.

ஐந்தாவது மாநாடு 2000-ஆம் ஆண்டு சிங்கப்பூரில் நடைபெற்றது. அம்மாநாட்டில் மலேசியாவிலிருந்து 60 பேராளர்கள் கலந்து கொண்டனர். ஆறாவது மாநாடு 2002-ஆம் ஆண்டு தென் ஆப்பிரிக்காவில் நடைபெற்றது. அம்மாநாட்டில் 15 மலேசியப் பேராளர்கள் கலந்து கொண்டனர். ஏழாவது மாநாட்டை ஸ்ரீலங்கா ஏற்று நடத்த இயலாத சூழ்நிலையில் மலேசியச் செயலகம் இப்பொறுப்பை ஏற்று தேசியப் பணியாளர் சங்கம், தேசிய தமிழாசிரியர்கள் சங்கம், தலைமையாசிரியர் மன்றம் ஆகியவற்றுடன் இணைந்து நடதுகிறது.

உலகத் தமிழாசிரியர்கள் மாநாடுகளின் தொடர் நடவடிக்கைகளில் புதுவை மொழியியல், பண்பாட்டு மையத்திலும், தஞ்சைத் தமிழ்ப் பல்கலைக்கழகத்திலும் பல பணியிடைப் பயிற்சிகள் ஏற்பாடு செய்யப்பட்டன. மலேசியாவிலிருந்து நாற்பதுக்கும் அதிகமான கல்வியாளர்கள் அவற்றில் கலந்து பயன்பெற்றனர். மாநாட்டிற்கு முன்பே ஆய்வுக்கட்டுரைகள் தொகுக்கப்பட்டு ஆய்வடங்கலாக வழங்கப்படுவது அரிது. ஆனால், மலேசியச் செயலகம் ஆய்வடங்கலை முன்கூட்டியே தயாரித்துப் பேராளர்களுக்கு வழங்கியுள்ளது.

இம்மாநாட்டை முன்னிட்டு மலேசியத் தமிழ்ப்பள்ளிகளைப் பற்றிய ஒரு முழுமையான வரலாற்று நூல் தயாரிப்பில் உள்ளது. தமிழ்ப்பள்ளி தலைமையாசிரியர்களின் முழுமையான ஒத்துழைப்புடன் இத்தொகுப்பு விரைவில் வெளிவரும்.

ஏறக்குறைய இருநூற்றைம்பதாயிரம் ரிங்கிட் செலவில் இம்மாநாடு நடைபெறுகிறது. டத்தோ ஸ்ரீ ச.சாமிவேலு அவர்கள் இம்மாநாட்டிற்கு RM 50,000 வழங்கி உதவியுள்ளார். தேசிய நிலநிதி கூட்டுறவுச் சங்கம் RM 20,000 நிதி உதவி வழங்கி உதவியுள்ளது.தமிழ் ஆர்வலர் பலர் நிதியுதவி செய்துள்ளனர். மலேசியக் கல்வி அமைச்சு 250 ஆசிரியர்களை இம்மாநாட்டுக்குத் தன் செலவில் அனுப்பி வைத்துள்ளது.

உலகத் தமிழாசிரியர் மாநாட்டை அடுத்த சுற்றிலும் மலேசியா ஏற்று இதனினும் சிறப்பாக நடத்த வேண்டும். அதற்குத் தமிழாசிரியர்கள் இப்பொழுதே தயாராகிவிட்டார்கள்.

எ. சகாதேவன்.
கௌரவச் செயலாளர்,
7-வது உலகத் தமிழாசிரியர் மாநாடு.

7-வது உலகத் தமிழாசிரியர் மாநாடு

2006-06-11T15:41:00.000+08:00

கடந்த ஜூன் 4 முதல் ஜூன் 7-ஆம் திகதி வரை கோலாலம்பூர், மலேசியாவில் "7-வது உலகத் தமிழாசிரியர் மாநாடு" மிகச் சிறப்பாக நடைபெற்றது. இம்மாநாடு மலேசியாவில் நடைபெறுவது இது இரண்டாவது முறை. ஏற்கனவே, 1994-இல் 2-வது மாநாட்டை மலேசியா ஏற்று நடத்திய அனுபவம் உள்ளது. கடந்த காலத்தைக் காட்டிலும் இம்முறை ஏற்பாடு மிக விமரிசையாகவும் நேர்த்தியாகவும் இருந்தது.

தேசிய ஆசிரியர் பணியாளர் சங்கம், மலாயா தமிழ் ஆசிரியர்கள் மன்றம் மற்றும் தமிழ்ப்பள்ளிகளின் தலைமையாசிரியர்கள் மன்றம் ஆகியவை ஒன்றிணைந்து நடத்தி 500க்கும் மேற்பட்ட உள்நாட்டு மற்றும் வெளிநாட்டுப் பேராளர்களை மகிழ்ச்சிக் கடலில் ஆழ்த்தியது.

1992-இல் சிங்கப்பூரில் ( முதலாவது மாநாடு ), 1994-இல் மலேசியாவில் ( 2-வது ), 1996-ஆம் ஆண்டு மொரிசியஸ் நாட்டிலும் ( 3-வது ), நான்காவது மாநாடு 1998-இல் சென்னையிலும், 5-வது மாநாடு 2000-ஆம் ஆண்டில் மீண்டும் சிங்கப்பூரிலும், 6-வது மாநாடு 2002-இல் தென் ஆப்ரிக்காவிலும் முறையே நடைபெற்றது.

அதன் தொடர்ச்சியாக 2004-இல் இலங்கையில் நடைபெறவிருந்தது; நடைபெறவில்லை. உலகத் தமிழாசிரியர் செயலகம் கேட்டுக் கொண்டதற்கிணங்க இரண்டாவதது முறையாக மலேசியாவில் " தமிழ்மொழி கற்றல் கற்பித்தல்: புதிய சவால்களும் அணுகுமுறைகளும் " எனும் கருப்பொருளுடன் 2006-இல் 7-வது உலகத் தமிழாசிரியர் மாநாடு மிகச் சிறப்பாக நடைபெற்றது.

மாநாட்டை மாண்புமிகு பொதுப்பணி அமைச்சர் டத்தோ ஸ்ரீ ச. சாமிவேலு அவர்கள் அதிகாரப்பூர்வமாகத் திறந்து வைத்தார்; திறப்புரையாற்றினார்.

இம்முறை 7-வது உலகத் தமிழாசிரியர் மாநாட்டு ஏற்பாட்டுக்குழுத் தலைவராக இணைப்பேராசிரியர் முனைவர் என்.எஸ்.இராஜேந்திரன் அவர்களும், கௌரவச் செயலாளராகத் திரு. ச.சகாதேவன் அவர்களும் பொறுப்பேற்றிருந்தனர்.

"மனித உறவுகளை இணைப்பது மொழி. மொழி இல்லையெனில் உறவுகள் இல்லை. அந்த உறவுகளும் - அந்த மொழியும் நிலைத்து நின்றால்தான்,அடுத்துவரும் தலைமுறையினர் நமது பாரம்பரியத்தை அறிந்து கொள்ளவும் - பொருள் செறிந்த நமது பண்பாடுகளைப் புரிந்து நன்னெறி மிக்க மனித சமுதாயத்தை உருவாக்க முடியும்!" என்று மாண்புமிகு அமைச்சர் வாழ்த்துச் செய்தியில் குறிப்பிட்டுள்ளார்.

நடைபெற்ற இந்த 7-வது உலகத் தமிழாசிரியர் மாநாடுக்கு மலேசியாவிலிருந்து 300க்கும் மேற்பட்ட ஆசிரியர்களும் ( பேராளர்கள் ), வெளிநாட்டிலிருந்து சுமார் 200 கல்வித் துறையைச் சார்ந்த பேராளர்களும் கலந்து பயனடைந்தனர். இம்முறை கனடா, சிங்கப்பூர், தமிழ்நாடு, பாண்டிச்சேரி, மொரிசியஸ், தென் ஆப்ரிக்கா, இந்தோனேசியா போன்ற நாடுகளிலிருந்து பேராளர்கள் வந்து ஆய்வுக்கட்டுரைகள் படைத்தனர்.

சுமார் 61 ஆய்வுக்கட்டுரைகளின் தொகுப்பாக சிறப்பனதொரு ஆய்வடங்கல் வருகைப்புரிந்த அனைத்துப் பேராளர்களுக்கும் மாநாடு துவங்குவதற்கு முன்பே வழங்கப்பட்டது தனிச்சிறப்பு!

தமிழ்ப்பள்ளிகளின் தேசிய நடவடிக்கை மன்றம்

2006-05-17T21:17:00.000+08:00

தமிழ்ப்பள்ளிகளின் தேசிய நடவடிக்கை மன்றம் மாண்புமிகு டத்தோ ஸ்ரீ ச.சாமிவேலு அவர்களால் 2000ஆம் ஆண்டு தோற்றுவிக்கப்பட்டது.இம்மன்றத்தின் தலைவராக பேராசிரியர் டத்தோ டாகடர் த.மாரிமுத்து பொறுப்பேற்றுள்ளார்.சமூக வியூக அறவாரியம் இம்மன்றத்தின் செயலகமாகச் செயல்பட்டு வருகிறது.

கல்வி அமைச்சின் பிரதிநிகள், மாநில நிலையிலான தமிழ்ப்பள்ளிகளின் அமைப்பாளர்கள், தமிழ்மொழி பிரிவின் துணை இயக்குநர்கள், மாநில நிலையிலான தமிழ்ப்பள்ளி தலைமையாசிரியர் மன்ற தலைவர்கள், மலாயா பல்கலைக்கழக இந்திய ஆய்வியல் துறை விரிவுரையாளர்கள், மலாயா தமிழ் ஆசிரியர் சங்க பிரதிநிதிகள் மற்றும் தேசிய ஆசிரியர் பணியாளர் சங்க பிரதிநிதிகள் ஆகியோர் இம்மன்றத்தில் உறுப்பினர்களாக உள்ளனர்.

தமிழ்ப்பள்ளிகள் எதிர்நோக்கும் பிரச்சினைகளைப் பற்றி விவாதிப்பதும், தமிழ்ப்பள்ளி மேம்பாட்டிற்கான செயல் திட்டங்களை அமல்படுத்துவதும், தமிழ்ப்பள்ளிகளின் தேசிய நடவடிக்கை மன்றத்தின் முக்கிய நோக்கமாகும். இந்நோக்கத்தை அடைய பல நடவடிக்கைகள் எடுக்கப்பட்டுள்ளன. அவற்றில் ஒன்று, தமிழ்ப்பள்ளி தலைமையாசிரியர்களின் தலைமைத்துவத் திறனை உயர்த்துவதற்கும் தமிழ்ப்பள்ளிகள் எதிர்நோக்கும் பிரச்சினைகளை விவாதிப்பதும் இப்பயிலரங்கம் நடத்தப்படுகிறது.

இதைத் தவிர, 2000ஆம் ஆண்டில் தமிழ்ப்பள்ளிகளின் நிலை குறித்து,ஓர் ஆய்வு மேற்கொள்ளப்பட்டது. இவ்வாய்வில் பெறப்பட்ட விவரங்களைக் கொண்டு, " 21ம் நூற்றாண்டிற்கான தமிழ்ப்பள்ளிகளின் செயல் திட்டம்" வரையப்பட்டு முன்னால் கல்வி அமைச்சர் டான் ஸ்ரீ மூசா முகமட் அவர்களிடம் சமர்ப்பிக்கப்பட்டது.

மேலும், தமிழ்ப்பள்ளி மாணவர்களின் தேர்ச்சி நிலையை உயர்த்துவதற்கு, யூ.பி.எஸ்.ஆர் பயிற்சி புத்தகங்கள் தயாரிக்கப்பட்டு மாணவர்களுக்கு இலவசமாக வழங்கப்பட்டுள்ளன. 7 பாடங்கள் அடங்கிய 15,000 பிரதிகள் அச்சிடப்பட்டு 2003 மற்றும் 2004 இல் ஆறாம் ஆண்டு மாணவர்களுக்கு வழங்கப்பட்டுள்ளன.

ஆசிரியர்களே..! வாழ்த்துகள்..!

2006-05-16T20:46:00.000+08:00

ஆசிரியர்களே..! வாழ்த்துகள்..!

ஆசிரியர்களே
அன்பிற்குரியவர்களே
ஆசானாக அனைத்தும்
கற்பித்தவர்களே

நிலையான வாழ்வு
கல்வி அன்றி இல்லை
நீங்கள் அன்றி
உலகில் நிபுணர்கள் இல்லை

தன்னலமில்லா
உழைப்பின்
தகைமையாளர்களே

தனிமனிதனுக்கு
தகுதியைத்
தந்தவர்களே

எழுத்தறிவித்ததினால்
இறைவன் என
அழக்கப்படுபவர்களே

பகுத்தறிவு
பாசறைகளே
பண்பாளர்களே

நன்மை எது?
தீமை எதுவென
நயம்பட உரைத்தவர்களே

நல்வழியே
காட்டியவர்களே;
நற்சீலர்களே

ஆசிரியர் தினத்தில்
எனது அன்பு
வாழ்த்துகள்

ஆசிரியர் பணியை
அகிலம் புகழ
தொடருங்கள்...

( ஆக்கம்: மாண்புமிகு டத்தோஸ்ரீ ச.சாமிவேலு, மலேசிய பொதுப்பணி அமைச்சர்)
பி.கு:மலேசியாவில் ஓவ்வொரு ஆண்டும் ஜூன்,16 ஆசிரியர் தினம் கொண்டாடப்படுகிறது.

தமிழ்ப்பள்ளி பிரச்னைகளுக்குத் தீர்வு காணுங்கள்!

2006-04-14T20:02:00.000+08:00

மலேசியா முழுதும் உள்ள 524 தமிழ்ப்பள்ளிகளில் சுமார் 150 தமிழ்ப்பள்ளிகளின் நிலை மோசமாக உள்ளது என்றும், இன்னும் "பந்துவான் மோடாலில்" தள்ளப்படுவதாகவும், மாவட்டக் கல்வி இலாகாவில் தமிழ் அதிகாரிகள் இல்லையென்றும் மற்றும் தலைமை அமைப்பாளர் நியமிக்கப்படவில்லையென்றும் 'என்யூடிபி' ஆசிரியர் பணியாளர் சங்கத்தின் தலைமைச் செயலாளர் திருமதி லோக் இம் பெங் கூறியுள்ளார்.

இப்படி எத்தனையோ பிரச்சனைகள் தமிழ்ப்பள்ளிகளில் நிலவுவதை அறியாமல் 524 தமிழ்ப்பள்ளிகளில் 50 தமிழ்ப்பள்ளிகளுக்கு மட்டுமே வருகை புரிந்துள்ள கல்வியமைச்சின் நாடாளுமன்றச் செயலாளர் திருமதி கோமளா கிருஷ்ணமூர்த்தி, ஆசிரியர்களின் வேதனை சுமை தெரிந்திருக்க நியாயமில்லை என்று திருமதி லோக் இம் பெங் சாடியுள்ளார்.

அவர் மேலும் ...

ஆசிரியர்கள் மாதத்தில் நான்கு சனிக்கிழமைகளிலும் பணியாற்ற வேண்டிய நிர்பந்தம் உள்ளது எனவும், சனிக்கிழமைகளில் பணியாற்றுவது தொடர்பான சுற்றறிக்கை தெளிவானதாயில்லை என்பதால் தலையாசிரியர்களும், மாவட்ட கல்வி அதிகாரிகளும் தங்களுக்கு சாதகமாக எடுத்துக் கொள்வதாகவும் கூறினார்.

ஆசிரியர்களுக்கு ஏற்பட்டுள்ள பணிச்சுமை, மன அழுத்தம், ஓய்வின்மை ஆகிய பல்வேறு பிரச்னைகள் தக்க ஆதாரத்துடன் கல்வியமைச்சின் நாடாளுமன்றச் செயலாளர் திருமதி கோமளா கிருஷ்ணமூர்த்தி அவரது கவனத்திற்கு கொண்டு செல்லப்படும் என்று கருத்துரைத்தார்.

குறிப்பு: இந்த சித்திரைப் புத்தாண்டிலாவது தமிழ்ப்பள்ளிகள், பள்ளிகளில் நிலவும் 220 தமிழாசிரியர் பற்றாக்குறை போன்ற பல்வேறு பிரச்னைகளுக்கு தீர்வு கிடைக்குமா என்று பார்ப்போம்!

நானே பொறுப்பு!

2006-04-12T21:29:00.000+08:00

அனைவருக்கு கனிந்த வணக்கம்.

நீண்ட இடைவெளி....
என்ன செய்வது....
இப்படி எழுதி சமாதானப் படுத்திக் கொள்வதுதான்!

"எதையும் ஏற்றுக் கொள்கின்ற மண்போல நாம் இருக்க வேண்டும்! விதை புதைந்து வெளியே முளைக்கின்ற இளம் தளிர் போல புதிய விசயங்களைக் கற்றுக் கொள்கிற ஆர்வம்,முயற்சி,பொறுமை இவற்றை ஏற்படுத்திக் கொள்ள வேண்டும். கற்றுக் கொள்கிற ஒரு விசயம் பற்றி விளக்க முயல்வது ஆபத்தானது. எனவே, கற்கும் போது நாம் கவனிப்பவர்களாக இருக்க வேண்டும்.

எப்படி கற்றுக் கொள்வது? அமைதியாக கூர்ந்து கவனித்தல் மட்டுமே போதுமானது. எந்த விசயத்தைப் பற்றியும் முன்கூட்டியே கருத்துகளை வளர்த்துக் கொள்ளாமல் திறந்த மனத்துடன் அதை அணுகுவோம். சிந்திக்காமல் ஒரு விசயத்தை அது எப்படி தோன்றுகிறதோ அப்படியே ஆரம்பிப்போம், அவதானிப்போம்.

இதுவரை தவறான அணுகுமுறையினால் நம் வாழ்க்கை அலைக்கழிக்கப்பட்டிருக்கலாம். எதிர் காலத்தில் நம்வாழ்க்கை எப்படி அமைய வேண்டும் என்பது இப்போதே தீர்மானிக்கப்பட்டதாக இருக்க வேண்டும். திட்டமிடாமல் செய்யும் எந்தக் காரியமும் முழுமையடைவதில்லை. நம்முடைய கருத்துக்கள் சரியானதாக இருந்தாலும் நடைமுறைப் படுத்துவதில் சிக்கல்கள் ஏற்படக் காரணம் திட்டமிடாமல் செயல்படத் தொடங்குவதுதான். நம்முடைய ஒவ்வொரு செயலுக்கும், அதன் விளைவுகளுக்கும் நாம்தான் பொறுப்பேற்க வேண்டு."

எனவே, இவ்வளவு காலம் இங்கு பதிவு செய்யாததற்கு நானே பொறுப்பு!

அன்புடன்,
எல்.ஏ.வாசுதேவன்.

உள்நோக்கியப் பயணம் உங்களை விழிப்படையச் செய்யும்!

2006-01-24T22:39:00.000+08:00

'மனத்துக்கண் மாசிலன் ஆதல் அனைத்துஅறன்
ஆகுல நீர பிற'..( குறள்: 34 )

'உள்ளுவதெல்லாம் உயர்வுள்ளல்' என்பது சான்றோர் வாக்கு. உண்மையொளி உதிக்கும் இடமும் உள்ளம்தான். வெளியில் தோன்றும் யாவும் உள்வெளிப்பாடுதான் என்பதை சித்தர் பாடல்....

'அண்டத்திலுள்ளதே பிண்டம்
பிண்டத்திலுள்ளதே அண்டம்
அண்டமும் பிண்டமும் ஒன்றே
அறிந்துதான் பார்க்கும் போதே!" ...கூறுகிறது.

அன்றாட வாழ்க்கையில் நிகழும் சம்பவங்களுக்கும், சவால்களுக்கும் ஈடுகொடுக்க ஓடுகிறோம்; வெளிநோக்கியப் பயணத்தில்.நவீன வாழ்க்கையின் கவர்ச்சி நம்மை அதிவேகமாக ஓட வைக்கிறது -- இலக்கை நோக்கி. ஒரு வகையில், இவ்வெளிநோக்கியப் பயணத்தில் பழகிவிடுகிறோம். காலவோட்டத்தில் இது இயந்திரத்தனமான வாழ்க்கைப் பயணமாகிறது.

காலையில் எழுந்தது முதல், இரவு நித்திரை கொள்ளும்வரை எல்லாமே விரைவு, வேகம், அவசரம் எனும் சார்புடைய சொற்களில் வாழ்க்கை அடங்கிவிட்டதோ! என்று எண்ணத் தோன்றுகிறது. பல வேளைகளில் அளவுக்கு அதிகமான வெளி விசயங்களில் மூழ்கித் தவிக்கிறோம். நிலை தடுமாறி விழவும் செய்கிறோம். உள்ளம் உறுதி பெற்றவர் எழுகிறார்; தடுமாற்றம் அடையும் பலர் மீள முடியாமல் தவழ்கிறார். சிக்கல் ஏற்பட்ட உள்ளம் தளர்ச்சியடைகிறது. அதனால் விரக்த்திக்குள்ளாகின்றனர், பலர். அவர்கள் பார்வைக்கு 'வழ்க்கைப் பாதை' மங்கலாகத் தெரிகிறது. அலை போல் வரும் பிரச்னைக் கடலில் தத்தளிக்கின்றனர்.

இவற்றுக்கெல்லாம் தீர்வு ஏதும் உண்டா..? என்று நெஞ்சம் விம்முகிறது; ஓசை எழாமல் உள்ளுக்குல் அழுகிறது.

எங்கிருந்து வெளிநோக்கியப் பயணத்தைத் தொடர்ந்தார்களோ -- அங்கிருந்தே வருகிறது தீர்வு காணும் நல்வழி --- சரியான பாதையைக் காண்பிக்கிறது -- ஆறாம் அறிவாகிய 'மனம்'. எவ்வாறு ?
ஆன்மீகப் பயணமாக.....உள்நோக்கியப் பயனத்தில்.

அங்கிங்கெனாதபடி...உள்ளத்தில் -- மனதின் மையத்தில் இருக்கிறது -- அற்புதமான விசை!
அது கொஞ்சம் தூசு படிந்திருக்கிறது. தட்டுங்கள் மன விசையை! அபரிதமான அற்றல் வெளிப்படும்.

மெய்ஞ்ஞான உணர்வுக்கு வழிகாட்ட உள்நோக்கியப் பயணம் அவசியம்! நல்வாழ்வுக்கு சுடர் ஏற்றி -- உள்ளொளியைக் காட்டவே உள்நோக்கியப் பயணம். உயர் பண்பை வளப்படுத்தி வாழ்க்கையின் தாத்பரியத்தை உணர்த்தவே உள்நோக்கியப் பயணம்.

மன சாந்தி - அமைதி - பேரானந்த நிலை இவற்றில்தான் வாழ்வின் உன்னதம் பொதிந்துள்ளது. யதார்த்த வாழ்வின் இலக்கு -- இலட்சியம் முக்கியம்தான். அதற்கு, போகின்ற பாதை 'சுமை' குறைந்ததாகவும் அன்றாட நிகழ்வுகள் 'சுவை'நிறைந்ததாகவும் அல்லவா இருக்க வேண்டும்!

அவ்வாறு மாற்றி அமைப்பதற்கான ஒரு சூட்சும விசை நம் மனதில் இருப்பதை அறிந்து, உணர்ந்து தெளிவோம். வாழ்வில் அனைத்து நலன்களையும் பெறுவோம்!

எனவே....வாருங்கள் 'மனத்துக்கண் மாசிலன்' ஆவோம்.

அன்புடன்,

எல்.ஏ.வாசுதேவன்,
மலேசியா.

நேர்மை இல்லாதவன் பிளவுபட்ட மனிதன்!

2006-01-17T19:17:00.000+08:00

எண்ணம், சொல், செயல் இவை மூன்றும் ஒன்றாக இல்லாவிட்டால் என்ன ஆகிவிடும்? நேர்மை இல்லாதபோது நாம் பிளவு பட்டவராகிறோம்.We become split personalities.நம் மதிப்பீடுகள் போல், எண்ணம் போல், சொல் இல்லாதபோது எண்ணுபவருக்கும்,பேசுபவருக்கும் இடையே பிளவு ஏற்படுகிறது.எண்ணம் போல் செயல் இல்லாதபோது எண்ணுபவருக்கும், செயல்படுபவருக்கும் இடையே பிளவு ஏற்படுகிறது.அம்மாதிரியே சொல்வது போல் செயல்படாவிட்டால் பேசுபவருக்கும் செயல்படுபவருக்கும் இடையே பிளவு ஏற்படுகிறது.இப்படி நம்மிடம் பிளவுகள் ஏற்படும்போது மனம் அமைதி இழக்கிறது. நம் மனதில் குற்ற உணர்வுகளும் சுய வெறுப்பும் உண்டாகின்றன. நம்மை நாமே நம்ப முடியாமல் போகிறது.

இம்மாதிரியான மனம் எந்தவிதமான கல்வியைப் பெறுவதற்கும் தகுதியானதல்ல. எதை சாதிப்பதற்கும் தகுந்ததல்ல!

குறிப்பு:
நன்றி, 'தர்மத்தின் மதிப்புதான் என்ன?'- ஸ்வாமி தயானந்த ஸரஸ்வதி.

அறிவியல் பல்கலைக்கழகத்தில் 'பொங்கல் விழா 2006'

2006-01-15T22:20:00.000+08:00

அனைவருக்கும் பொங்கல் வாழ்த்துக்கள்!

" உழுதுண்டு வாழ்வாரே வாழ்வார் மற்றெல்லாம்
தொழுதுண்டு பின் செல்பவர்".

என திருவள்ளுவர் கூறியுள்ளார்.

இயற்கையோடு ஒன்றித்து வாழ்ந்தவர்கள் பழந்தமிழர்கள். நம் முன்னோர் பெரும் மகிழ்ச்சியோடும் மிகச் சிறப்பாகவும் கொண்டாடிய விழாக்களில் பொங்கல் விழாவும் ஒன்று. தைப்பிறந்தால் வழி பிறக்கும் என்னும் பழமொழிக்கொப்ப தைமாதத்தின் முதல் நாளில் கொண்டாடப்படும் பொங்கல் விழா தமிழர் வாழ்வில் தனிச்சிறப்பைக் கொண்டது.

மலேசியாவில் பொங்கல் விழா:

நேற்று நாடு தழுவிய அளவில் மலேசிய தமிழர்கள் பொங்கல் விழாவை மிக விமரிசையாகக் கொண்டாடி மகிழ்ந்தனர். புலம் பெயர்ந்த தமிழர்களில் மலேசியத் தமிழர்களும் தொடர்ந்து பண்டைய தமிழகத்தின் பண்பாட்டின்படி அறுவடைத் திருவிழாவாகவும், புதிய நற்காரியங்களைத் தொடங்குவதற்கான ஒரு மங்கள நாளாகவும் கொண்டாடி வருகின்றனர்.

ஐயாயிரம் ஆண்டுகள் பெருமை வாய்ந்த அறுவடைத் திருநாளான பொங்கலை மலேசிய பாணியில் கொண்டாடுமாறு இந்திய சமூகத்தினரை ம.இ.கா வின் தேசியத் தலைவரும் பொதுப்பணி அமைச்சருமான டத்தோ ஸ்ரீ ச.சாமிவேலு அவர்கள் முன்னதாக வானொலியில் சிறப்பு பொங்கல் வாழ்த்துச் செய்தியில் குறிப்பிட்டார்.

" இது போன்ற நிகழ்வுகளின் வழியாகத்தான் நாம் இந்தியர்களின் பாரம்பரியத்தை பிற இனங்களுக்கு அறிமுகப்படுத்த முடியும்!" என அவர் தமது பொங்கல் வாழ்த்துச் செய்தியில் கூறினார்.

மலேசிய அறிவியல் பல்கலைக்கழக வளாகத்தில் பொங்கலிடும் போட்டி:

அக்கூற்றை மெய்ப்பிக்கும் வகையில் மலேசிய அறிவியல் பல்கலைக்கழகத்தின் - இந்திய பண்பாட்டுக் கழகத்தினர் பிற இன மாணவர்களைக் கவரும் வகையில் "பொங்கலிடும் போட்டி" ஏற்பாடு செய்தனர்.
முதன் முறையான முயற்சி என்றாலும் பிற இன மாணவர்கள் குறிப்பாக மலாய்க்காரர்கள் மற்றும் சாபா மாநிலத்தினர் கலந்து கொண்டு நிகழ்ச்சிக்கு ஆதரவு வழங்கினர்.

நிகழ்வு நடைபெற்ற வளாகத்தைச் சுற்றிலும் மாவிலை தோரணம், வாழை மர அலங்காரம் கலைகட்டியது. இந்திய மாணவர்கள் குறிப்பாக பெண்கள் பாரம்பரிய உடையில் காட்சியளித்தனர். ஆண்கள் அனைவரும் வேட்டி கட்ட வில்லை என்றாலும் கால்சட்டை ஜிப்பா அணிந்திருந்தனர். வேட்டி ஜிப்ப சகிதம் இருந்தவர்களில் ஏற்பாட்டுக் குழுத் தலைவர் திரு. அன்பரசனும் ஒருவர்! தமிழர் பண்பாடு தென்பட்டது.

விழா சீருடன் நடைபெற முதல் பருவ மாணவர்கள் சிலர் ஏற்பாட்டுக் குழுவினருக்கு உறுதுணையாக இருந்துள்ளனர். பிரதான மேடையின் பக்கத்தில் பிற இன மாணவர்களுக்கு பொங்கலின் தத்துவத்தை விளக்க கண்காட்சி பகுதியும் பலரைக் கவர்ந்தது.இந்திய மாணவர்களின் கைவண்ணம் தெரிந்தது. இணையத்தில் திரட்டிய பொங்கல் பற்றிய ஆங்கில விளக்கமும் அங்கு ஒட்டப்பட்டிருந்தது.

அடியேன் பார்த்து இரசித்த மற்றொன்று கோலம்.தாமரை மலரின் மேல் விளக்கு - பல வர்ணங்களிலான அரிசி கோலம். அழகாகவும் பண்பாட்டைப் பிரதிபலிக்கும் வகையிலும் இருந்தது.

மலேசிய அறிவியல் பல்கலைக்கழகத்தின் இணைப் பேராசிரியர் திரு. சுரேஷ்வரன், இந்திய பணியாளர் சங்கத் தலைவர் திரு. முனியாண்டி, பேராசிரியர் திரு. சுரேஷ் மற்றும் பல்கலைக்கழக மன்ற பதிவு அதிகாரி திரு. நஸ்ருல் மற்றும் சில பிரமுகர்கள் கலந்து நிகழ்ச்சிக்கு சிறப்பு சேர்த்தனர்.

சுமார் 150 இந்திய மாணவர்களோடு இணைந்து பிற இன ( சீன, மலாய் ) மாணவர்களும் கலந்து கொண்டனர். பொங்கலிடும் போட்டியில் கலந்து கொண்ட 22 குழுக்களில்( ஒவ்வொரு குழுவிலும் 4 - 6 மாணவர்கள் ), 4 குழுக்கள் முழுக்க பிற இனத்தவர் ஆவர். போட்டி இரு பிரிவினர்க்கும் ஏதுவாக நடத்தப்பட்டது. இந்தியர் அல்லாத பிரிவில் கலந்து கொண்ட 3 குழுக்கள் வென்று பரிசையும் தட்டிச் சென்றனர். இந்திய குழுக்களில் மூன்று குழுக்கள் வென்றன. "மச்சி" குழு பொங்கலிடும் போட்டியில் முதலிடம் வகித்தது இங்கு குறிப்பிடத்தக்கது.

போட்டியில் கலந்து கொண்ட குழுக்கள் முன்னேற்பாடோடுதான் வந்திருந்தனர் போலும். செங்கல் அடுப்பிட்டு, தீ மூட்டி, மண்சட்டியில் பாலூற்றி 'பொங்கும்' போது குழுவாக 'குலவி' ஓசை எழுப்பினர். சில குறும்பு ஆண் மாணவர்கள் சற்று கூடுதலாகவே கூச்சல் எழுப்பினர். ( அந்த காலத்து அமெரிக்க ஆங்கில படங்களில் சிவப்பு இந்தியர்கள் ஒரு வித ஓசையிடுவார்களே ..அதை ஞாபகப்படுத்தி விட்டனர்) போட்டி விதிமுறைகளில் குழுவினர் ஒத்துழைப்பு, அலங்காரம், பொங்கலின் சுவை என பல கூறுகள் இருந்தன. 22 குழுக்களில் 21 குழுக்கள் பக்குவமாக பொங்கலிட்டு நீதிபதிகளை அழைத்து சுவை பார்க்க்குமாறு ஏற்பாடு செய்திருந்தனர்.

ஏற்பாட்டுக் குழுத் தலைவர் திரு. அன்பரசன் அவர்களுக்கு இரட்டிப்பு மகிழ்ச்சி! பொங்கலன்றே அவருடைய பிறந்த நாள்! நிகழ்ச்சியை ஓரளவு வெற்றிகரமாக நண்பர்களின் உதவியோடு நடத்திக் கொண்டிருக்கிறோம் என்ற எண்ணம் அவர் முகத்தில் தெரிந்தாலும் ஒருவித படபடப்பு இருக்கவே செய்தது. திட்டமிட்டப்படி அனைத்து காரியங்களும் நடைபெற்று நிறைவெய்த வேண்டும் என்ற எண்ணமாக இருந்திருக்க வேண்டும். ( அல்லது, இந்த வாசுதேவன் சார் வேறு வந்து நிறைய குறை நிறைகளைச் சுட்டிக் காட்டுகிறாரே...! என்று கூட இருக்கலாம் !)விழா நிறைவுறும் தருவாயில் அன்பரசனுக்கு நண்பர்கள் பிறந்த நாள் வாழ்த்து ( ஆங்கிலத்தில் ) பாடி 'கேக்' ஊட்டி மகிழ்வித்தனர்.

வருகைப்புரிந்த ஆலோசகர்களில் இணைப்பேராசிரியர் திரு.சுரேஷ்வரன் அவர்கள் தலைமையுரை ஆற்றினார். இரத்தினச் சுருக்கமா இருந்தது அவரது உரை. "இவ்வாண்டு மாணவர்களின் பங்கேற்பும் ஆரதவும் நிறைவளிக்கும் வகையில் அமைந்திருக்கிறது. இந்திய மாணவர்களோடு பிற இன மாணவர்களும் கலந்து பொங்கலிட்டது கண்டு மகிழ்ச்சி. இது எதிர்வரும் காலங்களில் தொடர வேண்டும். மகிழ்ச்சியாக பொங்கல் திருநாளைக் கொண்டாடுங்கள்" என்று கேட்டுக்கொண்டார்.

யூ.எஸ்.எம் பல்கலைக்கழக இந்திய பணியாளர் சங்கத் தலைவர் திரு.முனியாண்டி அவர்களிடம் பேச சற்று நேரம் கிடைத்தது.அவர், " இம்மாதிரியான பல்லின மாணவர்களின் ஒற்றுமையை வலுப்படுத்தும் நோக்கத்தில் ஏற்பாடு செய்யும் எந்த நிகழ்ச்சிக்கும் பல்கலைக்கழக நிர்வாகம் அனுமதியும் நல்லாதரவும் வழங்கி வருகிறது. நம் கலாச்சாரத்தை பிற இனத்தவர்களுக்குக் காண்பிக்க இது ஒரு நல்ல வாய்ப்பு" என்றார்.மேலும் அவர்"இது முதல் முயற்சிதான். இனி வரும் காலங்களில் நாம் பெரிய அளவில் பொங்கல் விழா ஏற்பாடு செய்ய இவ்விழா வழிவகுத்துள்ளது" என்று கருத்துரைத்தார்.

ஏற்பாட்டுக் குழுத் தலைவர் திரு.அன்பரசன் அவர்களிடம் உரையாடும்போது " இந்த விழா சிறப்புடன் நடைபெற ஒத்துழப்பு வழங்கிய அனைவருக்கும் நன்றி தெரிவித்தார். குறிப்பாக பிற இன மாணவர்கள் கலந்து கொண்டது தமக்கு பெரும் மகிழ்வை உண்டாக்கியுள்ளது" என்றார். ஏற்பாட்டுக் குழு செயலர் குமாரி மனிமொழி சுப்பையா போட்டி முடிவுகளை தேசிய மொழியிலும் தமிழிலும் கவரும் வண்ணம் அறிவித்தார். முன்னதாக நிகழ்ச்சியைத் தொகுத்து வழங்கியவரின் பணியும் சிறப்பகவே இருந்தது.

ஒட்டு மொத்தத்தில் இவ்வாண்டின் பொங்கல் விழாவை ஏற்று வழி நடத்திய ஏற்பாட்டுக் குழுவினரை வெகுவாகப் பாராட்டுகின்றேன். நல்ல முயற்சி!

அன்புடன்,
எல்.ஏ.வாசுதேவன்,
மலேசியா.

வலைப்பதிவாளர்களுக்குப் பொங்கல் வாழ்த்துக்கள்!

2006-01-13T23:35:00.000+08:00

கனிந்த வணக்கம்.

அனைவருக்கும் எமது இனிய பொங்கல் நல்வாழ்த்துக்கள் !

"பொங்கலோ ! பொங்கல் ! பொங்கலோ ! பொங்கல் !

பொங்கி வருகுது பொங்கி வருகுது
நல்லெண்ணம் - இனிநாளும்
தங்கி நிலைத்திட தங்கி நிலைத்திட
நல்வாழ்க்கை - இனிதுன்பம்
வென்று மகிழ்ந்திடு வென்று மகிழ்ந்திடு
மனமே!

அன்புடன்,

எல்.ஏ.வாசுதேவன்,
மலேசியா.

தமிழ்ப் பள்ளிகளுக்குப் பொற்காலம்!

2006-01-07T01:22:00.000+08:00

மலேசியத் திருநாட்டில், கடந்த ஜனவரி, 3-ஆம் நாள் தமிழ்ப் பள்ளிகளின் வரலாற்றில் குறிப்பிடத்தக்க நாள். அன்று, 2006 -ஆம் ஆண்டின் பள்ளி துவக்க நாள். நாடு முழுவது அன்று பள்ளிகள் திறக்கப்பட்ட வேளையில், முதலாம் ஆண்டில் 17 ஆயிரத்திற்கும் அதிகமான மாணவர்கள் தமிழ்ப் பள்ளிகளில் சேர்ந்துள்ளனர்!

ஆரம்பமே அமோகம்! இன்ப அதிர்ச்சியில் தமிழ்ப்பள்ளிகள்!

இந்தப் புத்தாண்டில் கெடா, பேரா, ஜொகூர், நெகிரி செம்பிலான், கூட்டரசுப் பிரதேசம் ஆகிய மாநிலங்களில் தமிழ்ப்பள்ளிகளில் முதலாம் ஆண்டு மாணவர்களின் எண்ணிக்கை பெருமளவில் அதிகரித்து இருப்பதாக மலேசியத் தமிழ்ப்பள்ளிகளின் பிரதான அமைப்பாளர் திரு.வி.விக்ரமசூரியா விளக்கமளித்துள்ளார்.

நாடு முழுவதிலுமுள்ள 524 தமிழ்ப்பள்ளிகளில் கடந்த 2005-ஆம் ஆண்டில் ஏற்கனவே பயிலும் 90 ஆயிரம் மாணவர்களோடு மேலும் 10 ஆயிரம் மாணவர்கள் புதிதாகச் சேர்ந்தனர். 2006-இல், மேலும் 17 ஆயிரம் மாணவர்கள் தமிழ்ப்பள்ளிகளில் சேர்ந்திருப்பதன் வழி, தமிழ்ப்பள்ளிகளில் மானவர்களின் எண்ணிக்கை ஒரு இலட்சத்தையும் தாண்டிச் சென்று கொண்டிருக்கிறது. இன்னும் அனேகப் பெற்றோர்கள் தங்கள் பிள்ளைகளைப் பதிந்து கொண்டிருப்பதால், இவ்வாரக் கடைசியில் 17 ஆயிரத்து 500 ஆக அதிகரிக்கலாம் என்று எதிர்பார்ப்பதாக மலேசியத் தமிழ்ப்பள்ளிகளின் தலைமை அமைப்பாளர் திரு.வி.விக்ரம சூரியா கூறியுள்ளார்.

இந்த எதிர்ப்பாராத பன்மடங்காக மாணவர்களின் எண்ணிக்கை அதிகரித்திருப்பதற்குப் பல காரணங்கள் இருப்பினும், முதன்மையாகக் கருதப்படுவது கடந்த ஆண்டு யூ.பி.எஸ்.ஆர் ( 6-ஆம் ஆண்டு அடைவு நிலை தேர்வு ) தேர்ச்சி முடிவுளும் அடங்கும்.

"கடந்த சில ஆண்டுகளாக பெற்றோர்கள் தமிழ்ப்பள்ளிகளின் மீது காட்டும் ஆர்வமும், சமூகம் தமிழ்ப்பள்ளிகளின் மீது வைத்திருக்கும் நம்பிக்கையும் அதிகரித்து வருகின்றது. தமிழ்ப்பள்ளி ஆசிரியர்கள் அர்ப்பணிப்பு உணர்வுடன் பணியாற்றக் கூடியவர்கள். பிள்ளைகளின் கல்வித்தரம் தமிழ்ப்பள்ளிகளில் உயர்வு கண்டுள்ளது. இதற்கு கடந்த ஆண்டின் யூ.பி.எஸ்.ஆர் தேர்ச்சி விகிதம் சான்று பகர்கின்றது" என ஜோகூர் மாநில தமிழ்ப்பள்ளிகளின் அமைப்பாளர் திரு.கே.நடராஜா கருத்துரைத்துள்ளார்.

அதோடுமட்டுமல்லாமல் பெரும்பாலான தமிழ்ப்பள்ளிகளில் இப்பொழுது பாலர் பள்ளிகளும் இயங்கி வருவதால் நேரடியாக ஆண்டு 1-இல் சேர்க்கப்படுகின்றனர்.

மேலும், அண்மைய காலத்தில் இந்தியர்கள் சார்ந்த அரசியல் கட்சிகள், பொது நல சமூக அமைப்புக்கள், அரசு சார்பற்ற கல்வி, கலை கலாச்சார அமைப்புகளும் எடுத்துக் கொண்ட அக்கறையும் விழிப்பும் நல்ல பலன் கொடுத்திருக்கின்றது எனலாம்.

அடிப்படையில் பெற்றோரிடையே சிந்தனை மாற்றமும் விழிப்புணர்வும் ஏற்பட்டிருக்கிறது. தமிழ்ப் பள்ளிகளுக்குப் பிள்ளைகளை அனுப்புவதன் வழி 'தமிழ்மொழி' கற்பதோடு தமிழ்ப் பண்பாடு, கலை கலாச்சாரத்தோடு சேர்ந்து வளரும் தமிழ் மாணவர்கள் - சிறந்த கல்வியும் ஒழுக்கமும் உள்ள மாணவர்களாக உருவாகிறார்கள் என்பதை அனுபவ ரீதியில் பெற்றோர் உணரத் தொடங்கி விட்டனர் என்றால் அது மிகையாகாது.

முதலாம் வகுப்பில் அதிக எண்ணிக்கையிலான மாணவர்கள் சேர்ந்துள்ளாதால் சில பள்ளிக்கூடங்களில் புதிய வகுப்பறைகள் நிர்மாணிக்கப்பட வேண்டிய அவசியம் ஏற்பட்டுள்ளது. வகுப்பறைப் பற்றாக்குறையைச் சமாளிக்கச் சில தலைமையாசிரியர்கள் புதிய அணுகுமுறையைக் கையாண்டு முதலாம் ஆண்டு மாணவர்களை மாலைப் பள்ளியில் கல்வி பயில ஏற்பாடு செய்துள்ளனர்.

தமிழ்ப்பள்ளிகளில் இடப் பற்றாக்குறை பிர்ச்னைகளுக்குத் தீர்வு காண கல்வி அமைச்சு உடனடியாக உரிய நடவடிக்கையில் இறங்க வேண்டும். தமிழ்ச் சமுதாயமும் எதிர்பார்க்கிறது!

இனிய புத்தாண்டு வாழ்த்துக்கள்-2006

2006-01-01T02:17:00.000+08:00

வலைப்பதிவாளர்கள் மற்றும் வாசகர்கள் அனைவருக்கும் எமது இனிய புத்தாண்டு வாழ்த்துக்கள்!

"உங்கள் வாழ்வு
புத்துணர்வு பெற,
தெளிவு பெற,
தெய்வீகம் பெற,
உயர் இலட்சியங்களை
நாடவும் அடையவும்
என் மனமார்ந்த நல்வாழ்த்துக்கள்!"

அன்புடன்,
எல்.ஏ.வாசுதேவன்
மலேசியா.

கற்றல் கற்பித்தலில் மொழி விளையாட்டு

2005-12-12T00:21:00.000+08:00

விளையாட்டு முறையை பயிற்றியலில் மேற்கொள்வதன் மூலம் விளைபயன்மிக்க நன்மைகளை அடைய முடியும்.தற்போது தோன்றும் புதிய கல்வி முறைகள் பெரும்பாலும் விளையாட்டை அடிப்படையாகக் கொண்டுதான் தோன்றுகின்றன.இவ்விளையாட்டு முறையினால் கற்றலில் பல மாறுதல்கள் ஏற்படுகின்றன.இம்முறையில் காணப்படும் கட்டாயமின்மையினால் மாணவர்கள் ஆர்வத்தோடும் பற்றோடும் கற்றலில் ஈடுபடுகின்றனர்.

மொழி விளையாட்டானது விளையாட்டு முறையின் ஒரு கூறாகும்.மாணவர் எளிய முறையில் மொழியைக் கற்கவும்,மொழித் திறனை அடையவும், மொழி அறிவை வளர்த்துக் கொள்ளவும் மேம்படுத்தவும் இம்மொழிவிளையாட்டு ஓர் இன்றியமையாத பயிற்றியல் கருவியாகப் பயன்பட்டு வருகிறது.

கற்றல் கற்பித்தலில் மொழி விளையாட்டு என்பது மாணவர்களின் ஆர்வத்தையும் தூண்டுதலையும் கொண்டு குறிப்பிட்ட உபகரணங்களுடன் நடைபெறும் ஒரு நடவடிக்கையாகும்.மொழி விளையாட்டு, மாணவர்கள் கேட்டல், பேச்சு, வாசிப்பு அல்லது எழுத்து போன்ற அடிப்படைத் திறன்களைப் பயன்படுத்தி மொழித்திறனை வளப்படுத்தவும் மேம்படுத்தவும் வாய்ப்பளிக்கிறது.

மாணவர்கள் சோர்வடையும் வேளையில் இம்மொழி விளையாட்டானது அவர்களுக்குக் கிளர்ச்சியூட்டி ஆர்வத்துடன் பங்கேற்க வழிவகுக்கின்றது.மொழி விளையாட்டினைப் பயன்படுத்துவதன் மூலம் கொடுக்கப்படும் பிரச்னைகளுக்கு குறிப்பிட்ட நேரத்தில் சிந்தித்துத் தீர்வு கண்டறிவதால் மாணவர்களின் அறிவு வளப்படுத்தப்படுகின்றது.

இம்மாதிரியான விளையாட்டின் போது மாணவர்கள் ஆர்வமாகப் பங்கேற்று ஒருவருக்கொருவர் நல்லுறவை ஏற்படுத்திக் கொண்டு பிரச்னைகளுக்குத் தீர்வு காண்கிறார்கள்.மொழி விளையாட்டு மகிழ்ச்சிகரமான கற்றல் கற்பித்தல் சூழலை உருவாக்கி மொழித் திறனை மேம்படுத்த வழிவகுக்குகிறது.

மொழி விளையாட்டின் போது எல்லா மாணவர்களும் பொறுப்பை ஏற்கின்றனர்; தனிப்பட்டவர்களின் உரிமைகள் நன்கு மதிக்கப் பெறுகின்றன; சகோதரத்துவம் வளர்ச்சியடைகின்றது; வற்புறுத்தாமலேயே கூட்டுணர்ச்சியை எல்லோரும் மேற்கொள்கின்றனர். மேலும் கற்றலில் வெறுப்பும் சலிப்பும் ஏற்படுவதில்லை.மாணவர்கள் ஆர்வத்தோடும் பற்றோடும் கற்றலில் பங்கேற்க நல்லதொரு தூண்டுதலாக அமைகிறது.

மொழி விளையாட்டின் போது மாணவர்கள் பல்வேறு பட்டறிவை அடைகின்றனர்.இவ்வளளையாட்டின் போது ஏற்படும் பிரச்னைகளுக்குத் தீர்வு காண ஏரணமாகவும், புதுமையாகவும் நுணுக்கமாகவும் சிந்திக்கத் தூண்டுகிறது. வகுப்பறையிலும் வெளியிலும் ஒரே மாதிரியான சவால் மிகுந்த கற்றல் நடவடிக்கையில் ஈடுபட வாய்ப்புண்டாக்குகிறது.

கணினி வழி மொழி கற்பித்தல்

2005-12-10T01:37:00.000+08:00

இக்கால மாணவர்கள் பள்ளிக்குச் செல்லாமலேயே இருந்த இடத்திலிருந்தே கல்வி கற்கும் யுகத்தில் வாழ்கிறார்கள். வானொலி,தொலைகாட்சி,கணினி, இணையம் மற்றும் அவை சார்ந்த மென்பொருள் முதலியன பெருகிவிட்டன. பயிற்றுக்கருவிகளும் பல்கி விட்டன.நவீன தொழில் தொழில்நுட்ப வளர்ச்சி இதற்கு அற்புதமான வழி அமைத்து விட்டன என்றால் மிகையாகாது.

பலபயன் கருவியாக விளங்கும் ஒரு சாதனத்தைத் தமிழ் கற்பித்தலுக்கும் பயன்படுத்த ஆசிரியர்கள் முன்வரவேண்டும்! கணினியில் பாடங்களையும் பயிற்சிகளையும் தயாரித்து மாணவக்களிடம் கொடுக்கும்போது, அதை அவர்களே செய்து பழக வாய்ப்பு இருக்கிறது.மாணவக்களின் தேவைக்கு ஏற்பப் பயிற்சிகள் அமையும்போது மாணவர்கள் மிகுந்த நன்மையைப் பெறுவர்.இதை ஆசிரியர் தனியொருவராகச் செய்ய வசதி இல்லை என்றால், ஒரு சிலர் சேர்ந்து செய்யலாம்.பள்ளி நிர்வாகம் இத்தகைய தன்னார்வ ஆசிரியர்களை ஊக்குவித்தால் பல நன்மைகள் அடைய வழி வகுக்கும்.

இப்போது வர்த்தக ரீதியில் கணினி மென்பொருளில் நிறையத் தமிழ்ப் பயிற்சிகளைத் தயாரித்து விற்கிறார்கள். அவற்றையும் வாங்கிப் பயன்படுத்தலாம்.எழுத்துக்களின் உருவும் ஒலியும் ஒரு சேரத் தோன்றும் பயிற்சிகளும் இப்போது வர ஆரம்பித்துவிட்டன. இது தமிழுக்கு ஒரு விடிவுகாலம் எனலாம்.

தமிழாசிரியர்களும் பிறமொழி ஆசிரியர்களைப் போல கணினியை இயக்கத் தெரிந்தவர்களாகவும் அதில் தமிழ்ப் பயிற்சியளிக்க அறிந்தவராகவும் இருந்தால், மாணவர்கள் தமிழ் கற்பதில் பெருமை கொள்வர்.தமிழாசிரியர்களைப் பற்றிய மதிப்பீடும் உயரும்.இதனால், தமிழ் கற்றலிலும் கற்பித்தலிலும் புதுமை ஊடுருவி, புத்தம் புதிய நீரோட்டமும் ஏற்படும். இதனால், மலேசியத் தமிழாசிரியர்கள் கற்றல் கற்பித்தலில் பல்லூடகத் தகவல் தொழில் நுட்பப் பயன்பாடு சற்று பின்தங்கிய நிலையில் உள்ளனர் என்ற கருத்தைத் திருத்தி எழுத வாய்ப்பு ஏற்படும்.

மலேசியத் தமிப்பள்ளிகளின் மொழி ஆசிரியர்கள் விவேகம் கொள்வார்களா..?

செறிவான தலைமத்துவம் - தலைமையாசிரியர்களுக்கு!

2005-11-12T20:09:00.000+08:00

மலேசியத் தமிழ்ப்பள்ளிகளின் தலைமையாசிரியர்களே...கனிந்த வணக்கம்.

செறிவான தலைமைத்துவத்தின் அடிப்படை பள்ளியின் மேம்பாடாகும். ஆசிரியர் திறனை வலுப்படுத்துதல், பாடத்திட்டத்தை முறைப்படுத்துதல், பள்ளி நிர்வாக அமைப்பை சீர்படுத்துதல், பெற்றோரின் ஈடுபாடு மற்றும் சமூகத்தினரின் பங்கேற்பு போன்றவை செறிவான தலைமைத்துவத்தின் நான்கு முக்கியக் கூறுகளாகும்.

பள்ளியில் செறிவான தலைமைத்துவத்தை வழங்கும் முதன்மையான தனிநபர் தலைமையாசிரியர்தான். ஒவ்வொரு பள்ளியிலும் ஆதரவான பள்ளி பண்பாட்டையும், சுற்றுச் சூழலையும் உருவாக்குவதில் தலைமையாசிரியர்கள்தான் மற்றவர்களைவிட முக்கியத்துவம் வாய்ந்தவர்களாகத் திகழ வேண்டும்!அவ்வாறு சில தமிழ்ப்பள்ளிகளில் சில தலைமையாசிரியர்கள் திகழ்கிறார்கள்.அவர்களுக்கு என் மனமார்ந்த பாராட்டுகளும், வாழ்த்துக்களும் உரித்தாகுக.

அன்பார்ந்த தமிழ்ப்பள்ளி தலைமையாசிரியர்களே....இன்றைய பல்லூடகத் தகவல் தொழில் நுட்பத்தை பள்ளிகளில் புழங்கச் செய்ய என்னென்ன ஆக்ககர நடவடிக்கைகளில் ஈடுபட்டுள்ளீர்கள் என்பதை தயவு கூர்ந்து எழுதுங்கள்.

எனதருமை சக வலைப்பதிவாளர்களே...நீங்களும் உங்கள் கருத்துக்களைத் தெரிவிக்கலாம்!

தீபாவளி நல்வாழ்த்துக்கள்

2005-11-01T15:55:00.000+08:00

அமைதி, நிம்மதி, நேசம், ஒற்றுமை என்பதே உண்மையான கொண்டாட்டம்.

உங்களின் தூய உள்ளத்திலிருந்து வழங்குவதே வாழ்க்கையின் மகிழ்ச்சியாகும்.

அனைவரது உள்ளங்களிலும் தீபஒளி குதூகலம், கலகலப்பை பரப்பட்டும்.

உள்ளூற பிரகாசிக்கின்ற ஒளியே மகத்தானது.

உங்கள் அனைவருக்கும் இனிய தீபாவளி நல்வாழ்த்துக்கள்.

எழுத்தறிவித்தவன்...

2005-10-26T23:26:00.000+08:00

நல்ல ஆசிரியர் என்பவர் மாணவர்களின் அறிவுக் கண்களைக் மட்டும் திறக்காமல் அவர்களுக்கு நல்லொழுக்கத்தையும் பண்பினையும் மனித நேயத்தையும் புகட்டுபவராவார். இது பழங்காலத்தில் நல்ல குடிமகனாக ஆக்க வேண்டிய மகத்தான பொறுபுடையவர் ஆசிரியர்.

டாக்டர் இராதாகிருஷ்ணன் அவர்கள் சொல்வதைக் கேளுங்கள்: "ஆசிரியர்கள் தெய்வப் பிறவிகளாக இருத்தல் அவசியம். நல்லொழுக்கம், நற்பண்புகள், மனித நேயம், மாணவர்கள் பால் அன்பு ஆகியவற்றைக் கொண்ட தொயாக சீலராக இருக்க வேண்டும்." அத்தகைய ஆசிரியர்கள் மீது மாணவர்கள் அளவற்ற பக்தியும் மரியாதையும் கொண்டு ஒழுகுவர்.

- நன்றி : அம்புலிமாமா, செப்.2005

மேற்குறிப்பிட்ட கட்டுரையை வாசிக்கும் போது பல எண்ணங்கள் எழுத்தன. இன்றைய நவ நவீன உலகில் ஆசிரியர்கள் பணி பல்வேறு திறன் மேம்பாடுகளை உள்ளடக்கியுள்ளது. மேலெழுந்த வாரியாக ஆசிரியர்கள் பாடங்களை மட்டும் கற்பிபார்களானால் - மாணவர்கள் நல்ல மதிப்பெண்களை மட்டும் பெறக்கூடும். அது முழுமையான கல்வியாகாது. ஆசிரியர் தம் மாணாக்கர் மீது தூய்மையான அன்பு பாராட்ட வேண்டும்; நல்ல எடுத்துக்காட்டாகத் திகழ வேண்டும்; மாணவர்களின் பண்பு நலனில் அதிக அக்கரைக் காட்ட வேண்டும்; உண்மையாக நடந்து கொள்ள வேண்டும்!

தம் விருப்பு வெறுப்புக்கு அப்பாற்பட்டு நடுநிலைமையை வழியுறுத்தி மாணவர்களுக்கு சத்தியத்தின் தீர்க்க தரிசனத்தை உணரச்செய்தல் வேண்டும். சுற்றுச் சூழல் பாதகமாக இருப்பினும், மாணவர்களின் அறிவு, சிந்தனையைத் தட்டியெழுப்பி இதயத்தின் அடிநாதத்தில் நல்லெண்ணங்களைப் பதனப்படுத்தும் சூட்சுமத்தைக் கற்றுத்தர வேண்டும்.

இவ்வாறு நல்லதையே எக்காரியத்திலும் செய்யத் தூண்டுதல் வேண்டும். பிறருக்கு எந்த வகையிலாவது நல்லதைச் செய்து விட வேண்டும் என்ற எண்ணமானது, இயல்பாகவே மாணவர்களிடையே 'மனித நேயத்தை' வளர்க்கும்.

வழிகாட்டும் மொழிகள்!

2005-09-14T13:20:00.000+08:00

1. எப்போதெல்லாம் நீங்கள் இழப்புக்கு உள்ளாகுகிறீர்களோ, அப்போதெல்லாம் நீங்கள் இன்னும் முன்னேறிச் செல்லும் வாழ்க்கையை வாழுங்கள்!- வில் ரோஜர்ஸ் ( 1879 - 1935 )

2. வெற்றியின் இரகசியம் நோக்கத்தைக் கைவிடாமல் இருப்பது!- பெஞ்சமின் டிஸ்ரலி, இங்கிலாந்தின் முன்னால் பிரதமர் ( 1804- 1881 )

3. வாழ்க்கை என்பது துணிச்சல் மிகுந்த தீரச் செயல் அல்லாமல் வேறு ஒன்றல்ல.ஹெலன் கெல்லர் ( 1880 - 1968 )

4. ஏழு முறை கீழே விழு! எட்டு முறை எழுந்து நில்!- ஜப்பானியப் பழமொழி

5. மனித மனம் எதையும் கட்டுப்படுத்தக் கூடியது. ஏனென்றால், ஒவ்வொன்றும் அதில் உள்ளது. எல்லாவித இறந்த காலத்தைப் போலவே எல்லாவித எதிர்காலத்தையும் உடையது.
- ஜோசப் கான்ரட், நாவலாசிரியர் ( 1857 - 1924 )

ஆழ்நிலைத் தியானம்

2005-08-22T23:40:00.000+08:00

இன்று உலகெங்கிலும் ஆயிரக்கணக்கான தியான முறைகள் கற்றுத் தரப்படுகின்றன. அவற்றுள் முக்கியமாக மூன்று வகைகளைக் குறிப்பிடலாம்:
1) மனதை ஒருமுகப் படுத்தும் ( Concentration ) தியானம்;
2) மனதைக் குவியச் செய்யும் ( Contemplation ) தியானம்;
3) மனதை ஆழ்நிலைப் படுத்தும் ( Transdental ) தியானம்.
இதில் ஆழ்நிலைத் தியானத்தைப் பொறுத்தவரை பழக்க வழக்கங்கள் எதையுமே மாற்றிக் கொள்ளத் தேவைவில்லை .( அடடே இதைத் தானோ இவ்வளவு நாள் தேடிக்கொண்டிருந்தோம் என்கிறீர்களா...)எந்த வாழ்க்கை முறையில் நீங்கள் இருக்கிறீர்களோ அதை மாற்றாமல் இந்த தியானத்தைச் செய்யலாம்.

ஆழ்நிலைத் தியானம் செய்து, மனதை ஒருமுகப் படுத்தி, சிந்தை தெளிவு பெறுகிறது. அப்போது தன்னலம், அகங்காரம், பேராசை, காமம், கோபம் ஆகிய கீழான குணங்கள் நம்மைவிட்டு அகல்கின்றன. இவற்றிற்கு நேர் எதிரான நற்குணங்களைப் பழகும் போது மனதில் நிரந்தர அமைதி தோன்றுகிறது.

தியானம் செய்வதென்பது எங்கோ காட்டில் சென்று உட்கார்ந்து விடுவதல்ல. மனிதனை அழுத்தும் குறைபாடுகளை நீக்கிக்கொள்ள ஒரு மகானாலோ, முனிவராலோ தான் முடியும் என்பதல்ல. சாதாரண மனிதனாலும் முடியும். சாதாரண மனிதனுக்கு உள்ளேயும் அவனை ஓர் ஒப்பற்ற மேதையாக உருவாக்கும் சக்தி இருக்கிறது. அந்த சக்தியை எழுப்புவதற்குச் செய்யும் முயற்சிதான் இந்த ஆழ்நிலை தியானம். இதைப் பழகுவதென்பது ஒரு சுகமான அனுபவம்!

காலம் எனும் கோலம்

2005-08-20T01:07:00.000+08:00

காலங்களே தருகின்றன
அவையே பறிக்கின்றன

காலங்களே சிரிக்கச் செய்கின்றன - பிறகு
அழவும் வைக்கின்றன..

நாம் அனைவரும் - காலச்சக்கரத்தின்
மையத்தில்
வாழ்விலும் மறைவிலும்!

பி.கு: இப்போது அடிக்கடி கேட்கும் பாடல்...." சில நேரம் சில பொழுது....சோதனை வரும் பொழுது..
நம்பிக்கையாய்...நம்பிக்கையாய்...
வானில் உன் பெயரெழுது..!

USM பட்டமளிப்பு விழாவில்....(2)

2005-08-14T19:35:00.000+08:00

இவர் தவசீலன் த/பெ சுப்ரமணியம். ஜொகூர் மாநிலத்திலுள்ள குளுவாங் வட்டாரத்தைச் சார்ந்தவர். இவர் தமது 3 ஆண்டு கல்வியை ( Ilmu Kemanusiaan ) மலேசிய அறிவியல் பல்கலைக்கழகத்தில் முடித்துள்ளார். தமது இந்த வெற்றிக்கு உந்துதலாகவும் ஆதரவாகவும் இருந்தவர்கள் பெற்றோர்கள் தான் என்கிறார்.

மேலும் கடந்த மூன்று ஆண்டுகளில் தம்முடன் எல்லா தருணத்திலும் உடனிருந்து ஒத்துழைத்த 'ஹரப்பான்' (HARAPAN) - விடுதி நண்பர்களையும் நன்றியோடு நினைவு கூர்ந்தார். 2-வது படத்தில் தவசீலனுக்குப் பக்கத்தில் நண்பர்கள் முறையே :முத்து மற்றும் அலேக்ஸ் - பட்டமளிப்பு அங்கியில் மகிழ்ச்சியுடன் காட்சியளிக்கின்றனர். உடனிருப்பவர்கள் Harapan - விடுதி ஜூனியர்கள்.

மலேசிய அறிவியல் பல்கலைக்கழகத்தின் 34-வது பட்டமளிப்பு விழா

2005-08-13T22:52:00.000+08:00

1.இவர் திரு முத்துச்செல்வன் த/பெ தண்ணீர்மலை. கோலாகங்சார் இவர் பூர்வீகம். சிறப்புக்குறிய விசயம்..இவர் தமிழ்ப்பள்ளி ஆசிரியர். ஆசிரியர் துறையில் 12 ஆண்டு கால அனுபவம் உண்டு. இன்னொரு முக்கியமான தகவல் யாதெனில், 1994-ஆம் ஆண்டு முதல் 1997-ஆம் ஆண்டு வரை அடியேன் இவருடன் இணைந்து ஜொகூர், கூலாய் பெசார் தமிழ்ப்பள்ளியில் பணியாற்றியிருக்கின்றேன். அந்த இனிய நினைவுகளுடன் பரஸ்பரம் பகிர்ந்து கொண்டேன்.
திரு.த.முத்துச்செல்வன் கடந்த வியாழன் அன்று மலேசிய அறிவியல் பல்கலைக்கழகத்தில்(USM) PJJ ( தொலை தூரக்கல்வி ) வழி மனித வளத்துறையில் ( Ilmu Kemanusiaan ) 4 ஆண்டு கல்வியை வெற்றிகரமாக முடித்து இளங்கலைப் பட்டம் பெற்றார். தம் தாயார் திருமதி சாலாட்சி நடேசன் அவர்களுக்கு நன்றியைத் தெரிவித்துக் கொள்ளும் வேளையில், மறைந்த தம் தந்தையாரின் ஆசீர்வாதம் தான் தமக்கு உத்வேகம் அளித்தது என்றார். மேலும் தம் குடும்பத்தினர்க்கும் நண்பர்களுக்கும் நன்றியைத் தெரிவித்தார். அடுத்து தாம் முதுகலைப் படிப்பைத் தொடரப் போவதாக உறுதியுடன் கூறினார்.

பி.கு : பழகுவதற்கு இனியவரானவர் திரு.முத்துச்செல்வன்.இவர் மாணவர்களுக்குப் போதிக்கும் கலையை சற்றே எட்டி நின்று பார்த்து வியந்திருக்கின்றேன். மாணவர் நலன் கருதி போதனையை நடத்தியவர்; நல்லாசிரியர்.உழைப்பு நிச்சயம் ஒரு நாள் உயர்வைத் தரும் என்பது மீண்டும் மெய்ப்பிக்கப்பட்டுள்ளது!

2. இவர் வளர்ந்து வரும் ஆசிரியை. தற்போது தற்காலிக ஆசிரியையாகப் பணி புரிவதாகத் தெரிவித்தார் குமாரி மீனாட்சியம்மாள் த/பெ நடராஜன். இவர் கூலிம், கெடா மாநிலத்தைச் சார்ந்தவர். ஆரம்பக்கல்வியை லாடாங் பாகான் செனா, தமிழ்ப்பள்ளியில் கற்றார். எதிர்காலத்தில் சிறந்த ஆசிரியையாக வருவதே இவர் இலட்சியம் என்கிறார். இவரும் USM-இல் 4 ஆண்டு கல்வியாக Ilmu Kemanusiaan - மனிதவளத் துறையில் பட்டம் பெற்றுள்ளார். தமது வெற்றிக்கு முழு காரண கர்த்தாவாக இருப்பவர் தமது அம்மா தான் என்று கூறுகிறார். கடின உழைப்பு, சுய முயற்சி, அம்மாவின் ஆசி மற்றும் சமுதாயப் பற்றே தம்மை இவ்வளவு தூரம் உயர்த்தியுள்ளது என்று கூறுகிறார் குமாரி மீனாட்சியம்மாள்.

பிரார்தனை

2005-08-10T21:53:00.000+08:00

என்னுள்ளே உறையும் இறைவனே! உன்பால்
வரிசையாய்க் கேட்பது வலிமைசேர் உடலும்,
தவயோகத்தில் தானமர்ந் திடலும்,
ஆக்க வழியிலே அனைத்தையும் எண்ணவும்,
ஆக்க முறையிலே அனைத்தையும் செய்யவும்,
உறுதியும் தெளிவும் உதவுக - உறுதியாய்!

இறைவா!

நீயெனக் கருளும் நிறை வரம் மூன்றாம்
ஐயா, நீ! எனக்கு உதவுக நிதியம்,
அறந்தன்னைக் காத்திடும் திறமும் அருளுக,
தவநெறி மேன்மையும், தானருளிடுக;
மக்கள் ஆட்சி மலர்ந்திடும் சமூகம்
பொதுநல உடைமை போற்றும் சமூகம்
எனப் பொய்யாய்ப் பலர் சாற்றும் இன்றைய உலகு
ஆன்மக் கனிவும் ஆன்மிகப் பொலிவும்
சார்ந்திடும் சால்புடைச் சமூகமாய் மலரவும்
தவயோகத்தில் தானமர்ந் திடற்கும்
ஆக்கச் சிந்தனை அதன்வழிப் பிறக்கவும்
அருளுக இறைவா! அருளுக இறைவா!

இவ்வகை மூன்று இனிய வரங்களை
ஐயனே - மெய்யுள் ஒளியனே அருள்கவே!"

- தவயோகி C.K.சிவராமகிருஷ்ணன்.

மலர் பேசும் மொழி!

2005-07-28T10:02:00.000+08:00

பூவைப் பார்க்கின்றேன் - ஆனால்
பூ தெரியவில்லை.
மகிழ்வு பரப்பும் மனத்தை
நினைவின் இனிமையில் நுகர்கின்றேன்.

பூவே, நீ வெறும் தாளல்ல
தாளினால் வரையப்பட்ட நிழற்படமல்ல.
இருபரிமாணட்டு நீள அகலமல்ல.
நான்காம் பரிமாணத்து நறுமணம்.

காயாகாமல் கனியாகாமல்
மலர்ப் பருவத்துடன் வாழ்வை முடிக்கும்
மணம்தரு மலரே
நீ தியாகத்தின் சின்னம்!

அழகின் உச்சத்தில் மலராகி
ஆன்மாவில் பரப்பும் ஆனந்தம். நீ.
மலர்பேசும் மொழிதான் என்ன?

உன்னைக்கொடு, உலகை உயர்த்து.
அன்பால், தொண்டால் ஜீவனை மலர்த்து!

மனமே..கலக்கமேன் ?

2005-07-11T01:03:00.000+08:00

"திறமையில்லா வல்லமை பயனில்லை. திறமைக்கு மன அமைதியும், நிதானமும் தேவை. மனம் கலக்கமோ, பதட்டமோ கொள்ளலாகாது. கடந்த காலத்தை நினைத்து, எதிர்காலத்தை கற்பனை செய்வதால் நம் மனம் பதட்டமடைகிறது. எனவே கடந்த காலத்தை மறந்து, எதிர்காலத்தைக் குறித்து கவலைப்படாமல் இருத்தல் வேண்டும். நிகழ்காலத்தைப் பொறுத்தவரை, சோதனையைத் திடமாய் எதிர்த்து, துணிவோடு,சிரசுக்கு மேல் இறைவன், நம்முள் மனம் இருக்கின்றனவென்று எண்ணிச் செயல்பட வேண்டும். தயக்கம் வேண்டாம். மன் ஓர்மையுடன் இறைவனிடம் சரணடைந்து கடமையைத் திறமையுடன் ஆற்றல் வேண்டும். சகலமும் நலமடையும்," என்கிறார் சுவாமி சின்மயானநதா.

சிந்தனை:நம் வாழ்வின் துயருக்கெல்லாம் காரணம் நமக்குள் இருக்கும் கோளாருதான். நம்முள் உள்ள கோளாருகளால் விளையும் துயருக்கெல்லாம் மாற்றம் நம்முள் தான் இருக்கிறது. நம்முள்ளே இருக்கும் கடவுளை உணர்வதுதான் துயர் நீக்க உதவும். நம்முள்ளேயே கடந்து உள்ளதாய், உள்ளிருந்து இயக்குவதாய் உள்ள கடவுள், நம் ஆளுமையிலேயே பதிந்து புதைந்துள்ளது. அது நம்மைக் கிளர்தெழச் செய்ய வல்லது; நம் ஆளுமையை மலரச்செய்வது.

கடவுள் சக்தி நம்முள்ளே இருப்பதை உணர்வது தான் கவலைகளிலிருந்து விடுபடுவதற்கு முதல்வழி!

எது விவேகம் ?

2005-06-22T22:30:00.000+08:00

நம் காதில் விழுகின்ற ஒவ்வொரு வார்த்தையையும், நாம் கேள்விப்படுகின்ற ஒவ்வோர் அபிப்பிராயத்தையும் அப்படியே நம்பிவிடக்கூடியவர்கள் பலர் இருக்கின்றனர். எல்லாவற்றையும் அப்படியே நம்பிவிடுவது விவேகமல்ல.

ஒவ்வொன்றையும் ஏன் நாம் நிதானமாக எடைபோடாமல் விட்டு விடுகிறோம்? எந்தக் கூற்றானாலும் அவை சுயநலமின்றிக் கூறப்படுகின்றனவா, அறநெறிப் படி உள்ளனவா என்று சற்று அவதானிக்க வேண்டும்.

பிறரைப் பற்றிக் கூறப்படும் அவதூறுகளை நாம் உடனே நம்பிவிடுகிறோம்; அதே அளவிற்கு நாம் ஒருவரைப் பற்றிக் கூறப்படும் நல்ல, உண்மை விசயத்தை நம்புவதில்லை! என்னே! எதிர்மறை மனக்குறைபாடுடன் உள்ளோம்.

ஆனால் வாழ்க்கையில் பக்குவப்பட்டவர்கள் பிறர் கூறும் அவதூறு மற்றும் நிந்தனைப் பேச்சுகளை எளிதில் நம்பிவிட மாட்டார்கள். பிறரைப் பற்றிப் புறஞ் சொல்வதும், தாழ்த்திப் பேசுவதும் எந்த மனிதனுக்கும் உள்ள பலகீனம்தான் என்பதைப் பக்குவப்பட்டவர்கள் அறிந்தே வைத்திருக்கிறார்கள்.

சிவகங்கை சுத்தானந்த பாரதி

2005-06-13T13:17:00.000+08:00

அச்சமற்ற உண்மை - கிளியே
ஆண்மையுள்ள நெஞ்சம்.

கொச்சையற்ற பேச்சு - நல்ல
கொள்கை கொண்ட நட்பு.

இன்னலற்ற சாந்தம் - யார்க்கும்
இனிது செய்யும் பொறுமை

தன்னலத் தவிர்ப்பு - கிளியே
தருமமாகும் இவையே!

குறிப்பு: பாட்டுக்கொரு புலவன் எட்டயபுரம் சுப்பிரமணிய பாரதி மட்டுமில்லை; சிவகங்கை
சுத்தானந்த பாரதியும்தான். பாரதி பாடல்கள் போலவே படித்த மாத்திரத்தில் பாடம் ஆகிவிடுபவை அவருடைய பாடல்கள்.

அமெரிக்க இந்தியப் பழங்குடி மக்களின் பிரார்த்தனை!

2005-05-31T20:18:00.000+08:00

ஒஜிப்வா - அமெரிக்க இந்தியப் பழங்குடி மக்களின் பிரார்த்தனை!

எங்களின் அருமையான மூத்த பெரியவரே!
உடைந்து உருக்குலைந்து இருக்கும் எங்களைப்பார்.

இறைவனின் படைப்பில் உள்ள
எல்லாவற்றிலும் மனித இனம் மட்டுமே
பிரபஞ்சப்பாதையிலிருந்து விலகிச் செல்கிறது.

இது எங்களுக்கு நன்றாகத் தெரிகிறது.
அதிலிருந்து பிரிந்து நிற்கிறோம், அறியாமையால்.

பிரபஞ்சத்தின் தெய்வீகப் பாதையில் மீண்டும் நடக்க
நாங்கள் தான் ஒன்றுசேர வேண்டும்.

எங்கள் மூத்த தாத்தாவே!
நீங்கள் புனிதமானவர்; தெய்வீகம் நிறைந்தவர்;
அன்புடனும் கருணையுடனும் நாங்கள் பெருமையோடு
வாழக் கற்றுக் கொடுங்கள்.

பிறந்த பூமியின் காயங்களை குணப்படுத்த வேண்டும்.
பரஸ்பரம் ஒருவரை ஒருவர் குணப்படுத்த
மருந்து தடவ வேண்டும்.

குறிப்பு: நன்றி: 'தன்னை அறியும் அறிவு' (டாக்டர் எம்.எஸ்.உ) ..எனும் புத்தகத்திலிருந்து.

துன் அமினா தமிழ்ப்பள்ளியில் கணினி வகுப்புகள்

2005-05-31T09:50:00.000+08:00

சில பத்தாண்டுகளுக்கு முன்பு, தமிழ்ப்பள்ளிகளில் கணினிப் பயன்பாடு என்பது நடைமுறையில் இல்லை. அப்படியே இருந்தாலும் அது பள்ளி நிர்வாக நடவடிக்கைக்கு மட்டுமே சாத்தியமாக இருந்தது. ஆயினும் இப்போது பெரும்பாலான தமிழ்ப்பள்ளிகளில் கணினிக்கூடங்கள், மையங்கள் தென்படுகின்றன. மாணவர்களுக்கு அடிப்படை கணினி மற்றும் தொழில் நுட்பத்தைப் போதிக்க அரசாங்கமும் சில தமிழ்ப்பள்ளிகளுக்கு கணினி மையங்களை அமைத்திருக்கின்றது. அவ்வப்போது ம.இ.கா தலைவர்கள், அரசு சார்பற்ற இயக்கங்கள், மற்றும் தமிழ்ப்பற்று மிக்க தொழில் அதிபர்கள் இலவசமாக சில கணினிகளைத் தமிழ்ப்பள்ளிகளுக்கு அன்பளிப்பாக வழங்கியுள்ளனர்.

இடம், கணினி வசதி எல்லாம் இருந்தாலும் தகவல் தொழில் நுட்பத்தைப் போதிக்க ஆசிரியர்கள் இல்லை. தன்னார்வம் கொண்ட சில தமிழ்ப்பள்ளி ஆசிரியர்கள் தலைமையாசிரியரின் வழிகாட்டுதலுக்கிணங்க கணினி வகுப்புகளை 'புறப்பாட நடவடிக்கையாக' போதிக்கின்றனர். ஏனெனில், தமிழ்ப்பள்ளிகளுக்காக பிரத்தியேக கணினி பாடத்திட்டங்கள் இன்னும் உருவாக்கப்படவில்லை!

பள்ளிப் பாட நேரத்திலேயே கணினி வகுப்புகளை - ஆண்டு 1 முதல் 6 வரை - உள்ள மாணவர்களுக்கு நடத்துவது என்பது விவேக முயற்சி! அவ்வாறு போதிக்கும் ஆசிரியர்களுக்கு அப்பள்ளியின் பெற்றோர் ஆசிரியர் சங்கம் சம்பளமும் வழங்கி வருகின்றது என்பது பாராட்டக்கூடிய ஒன்று. ஜொகூர் மாநிலத்தில் சில தமிழ்ப்பள்ளிகள் இம்முயற்சியில் ஈடுபாடு காட்டுவது வரவேற்கத்தக்கது. அப்பட்டியலில் துன் அமினா தமிழ்ப்பள்ளியும் இடம்பெற்றிருக்கிறது.

அப்பள்ளியின் கணினி மையத்தில் 38 கணினிகள் உள்ளன. பகுதி நேர ஆசிரியர்களாக தற்போது இருவர் பணியாற்றுகின்றனர். வாரத்தில் சராசரி 1 மணி நேரப் பாடமாக ஆண்டு 1 முதல் 6 வரை பள்ளி நேரத்திலேயே போதிக்கப்படுகின்றது. 'சுமார் 5 ஆண்டுகளாக குமாரி வள்ளி என்பவர் கணினி ஆசிரியராகவும் தற்போது ஆசிரியர் ராஜசேகர் சில மாதங்களாக உதவியாகவும் இருக்கின்றார்", என்று அப்பள்ளியின் ஆசிரியர் திரு சுலைமான் அவர்கள் தெரிவித்தார். பெ.ஆ.சங்கத்தின் ஆதரவில் தற்போது சுமார் 8,000 ரிங்கிட் செலவில் கணினி மையம் புதிய தோற்றம் காண ஏற்பாடுகள் செய்து வருவதாக ஆசிரியர் திரு ராஜசேகர் தெரிவித்தார்.

பொது நலச் சேவையில் துன் அமினா தமிழ்ப்பள்ளி முன்னுதாரணம்!

2005-05-25T16:32:00.000+08:00

Sumbangan Makanan Kering - Sempena Sambutan Hari Guru Peringkat N.Johor 2005.
SJK(T) Tun Aminah, Skudai, Johor.

ஜொகூர் மாநிலத்திலேயே அதிக மாணவர் எண்ணிக்கையைக் ( 1400 மாணவர்கள் ) கொண்ட தமிழ்ப்பள்ளியாகத் திகழும் துன் அமினா தமிழ்ப்பள்ளி இன்று பள்ளி வரலாற்றில் இடம்பெறத் தகுந்த நிகழ்வினை ஏற்பாடு செய்துள்ளது.

பேறு குறைந்த மாணவர்களுக்காகவும் மற்றும் சுமார் 8 அனாதை இல்லங்களுக்கும் ( )- உணவுப் பொருட்களைத் திரட்டி சம்பந்தப்பட்ட இயக்கங்களுக்கு வழங்கியிருக்கிறது. போற்றத்தகுந்த இந்நிகழ்வு இன்று காலை ( 25.05.2005 ) அப்பள்ளியில் நடைபெற்றது. மாவட்டக் கல்வி இலாக்கா துணை அதிகாரி உயர்திரு அனாஃவி அவர்கள் வருகை தந்து சிறப்புரையாற்றினார்.

நிகழ்ச்சி ஏற்பாட்டுக்குழு பொறுப்பாளர் திரு. லக்க்ஷ்மண ராவ் அவர்கள் " முதன் முறையாக ஒரு தமிழ்ப்பள்ளி மாநில அளவிலான 'ஆசிரியர் தின' நடவடிக்கைகளில் ஓர் அங்கமாக 'சமூக மனப்பான்மையுடன்' இந்நடவடிக்கையை ஏற்று நடத்துகிறது" என்றார். மேலும் அவர், " எங்கள் முயற்சிக்கு ஜொகூர் வட்டாரத்திலுள்ள சுமார் 216 ஆரம்ப, இடைநிலைப் பள்ளிகள் துணை வந்தன. தேசிய வகை மலாய், சீன மற்றும் தமிழ்ப்பள்ளிகள் நல்லெண்ண நோக்குடன் சமூக அக்கரையுடன் ஆதரவு நல்கியது உண்மையிலேயே வரவேற்கத்தகுந்தது" என்று கருத்துரைத்தார்.

ஆசிரியர்கள் பணி கற்றல் கற்பித்தலோடு நிறைவு பெறுவதில்லை. பள்ளி சூழலுக்கு அப்பால் சமூக நலன் மற்றும் பொதுச் சேவை மனப்பான்மை - இம்மாதிரியான நடவடிக்கைகளில் ஈடுபடுவதன் வழி வலுப்படுத்த ஏதுவாகிறது. சிறந்த ஆசிரியர்கள் சீரிய நற்காரியங்களில் தங்களை ஈடுபடுத்திக் கொள்கிறார்கள். 63 ஆசிரியர்களைக் கொண்ட துன் அமினா தமிழ்ப்பள்ளியை தலைமையாசிரியர் திருமிகு. கெ. பூபாலன் பி.ஐ.எஸ் அவர்களின் சீரிய தலைமைத்துவத்தில் இயங்கி வருகிறது.

குறிப்பு: மேலே படத்தில் இடம் இருந்து வலம், ஆசிரியர் திரு சுலைமான் மொய்டீன், திருமிகு கெ. பூபாலன் பி.ஐ.எஸ் ( தலைமையாசிரியர் ), ஆசிரியர் திரு. லக்க்ஷ்மண ராவ்.

'சிந்தனை ஆற்றல்' கொண்ட மாணவர்களை உருவாக்குதல்

2005-05-21T10:55:00.000+08:00

தேசிய ரீதியிலான ஆசிரியர் தினக் கொண்டாட்டம் இவ்வாண்டு நீலாய், நெகிரி செம்பிலான் மாநிலத்தில் சிறப்பாக நடைபெற்றது. துணைப் பிரதமர் டத்தோ ஸ்ரீ நஜிப் துன் ரசாக் அவர்கள் அதிகாரப்பூர்வமாத் தொடக்கி வைத்தார். நாடு முழுவதும் இருந்து சுமார் 4,000 ஆசிரியர்கள் ஆசிரியர் தின விழாவில் கலந்து கொண்டனர்.

'சிந்தனை ஆற்றல்' மிக்க மாணவர்களின் படைப்பாக்கமும் செயல்திறனும் நாட்டிற்கு வருங்காலத்தில் முக்கியப் பங்களிப்பாகக் கருதப்படுவதால் அத்தகைய மாணவர்களை உருவாக்கும் சவாலை தற்போது ஆசிரியர்கள் எதிர்நோக்கியிருக்கின்றனர் என்று துணைப் பிரதமர் தமதுரையில் கூறினார்.

ஒரு சிறந்த மாணவனை கல்வி வழி உருவாக்குவது மட்டுமல்ல ஆசிரியரின் பொறுப்பு, மாறாக, எந்த பிரச்னையையும் மதிநுட்பம் கொண்டு சீர்தூக்கிப் பார்த்து ஆழ்ந்த சிந்திக்கும் ஆற்றல் கொண்டு செயல்படுத்தும் வல்லமை பெற்று நாட்டுப்பற்று மிகுந்த குடிமகனாய் உருவாக்கும் கடப்பாட்டையும் ஆசிரியர்கள் கொண்டிருக்கிறார்கள்.

இந்த இலக்கை அடைய ஆசிரியர்கள் இவ்வாண்டின் ஆசிரியர் தின கருப்பொருளான " தரமான ஆசிரியர்கள், மேன்மைக்கான வித்துகள்" என்பதை மனதில் சவாலாகக் கொண்டு பணியாற்றும்படி கேட்டுக்கொண்டார்.

மேலும் ஆசிரியர்களே மாணவர்களின் சிறந்த முன்னுதாரணமாகத் திகழும் பொறுப்பைக் கொண்டுள்ளனர். சிறந்த மாணவர்களைக் கல்வி கேள்விகளில் திறம்பட உருவாக்குவதில் இதுவரை ஆசிரியர்கள் சிறந்த நற்சேவையாற்றியுள்ளனர் என்று பாரட்டினார்.

ஆசிரியர்களின் அர்ப்பணிப்புக்கு ஈடாக தேர்ச்சிப்பெற்ற ஆசிரியர்களுக்கு பதவி உயர்வும் வழங்கப்படுகிறது என்றார் துணைப் பிரதமர்.

அந்நிகழ்வில் துணைப் பிரதமர் " ஆசிரியர்களின் பிள்ளைகளுக்கு அடுத்த ஆண்டு முதல் இலவச பாடப் புத்தகங்கள் இயல்பாகவே வழங்கப்படும்" என்று அறிவித்தார். இந்த அறிவிப்பு நாடு முழுதும் உள்ள சுமார் 3 லட்சத்து 20 ஆயிரம் ஆசிரியர்களுக்கு மன நிறைவை எற்படுத்துவதாக இருக்கும்.

ஆசிரியர் தினம்

2005-05-17T00:30:00.000+08:00

நேற்றுதான் பினாங்கிலிருந்து குளுவாங்கிற்கு வந்தேன். பள்ளிக்குச் செல்ல வேண்டும்; இன்று ஆசிரியர் தினம்! கைத்தொலை பேசியில் வாழ்த்துக் குறுந்தகவல்கள் வந்தவண்ணம் இருந்தன,அதில் ஒன்று இப்படி வந்தது ...,

"Without Teachers --days are "Sadday, Moanday,Tearsday, Wasteday, Thirstday, Fightday, Shatterday" so happy TEACHERS DAY!

இன்னொரு குறுந்தகவல்....."Bad teacher complains; Good teacher explains; Better teacher demonstrates, .."Best teacher motivates; Great teacher inspires...HAPPY TEACHER'S DAY ".

குளுவாங் பட்டணத்திலிருந்து சுமார் 28 கி.மீ தொலைவில் உள்ள ரெங்கம், தேசிய வகை தமிழ்ப்பள்ளி சென்றடைந்தேன். நான் அப்பள்ளியில் பணியாற்றும்போது இருந்த முன்னால் மாணவர்கள் ( தற்போது இடைநிலைப் பள்ளியில் பயில்கிறார்கள் ) என்னைச் சூழ்ந்து கொண்டு வாழ்த்துக்களையும் அன்பையும் தெரிவித்தனர். அவர்களைச் சந்தித்ததில் மகிழ்ச்சிதான்.

சக ஆசிரிய நண்பர்களும் சேர்ந்து குசலம் விசாரித்தனர். அவர்கள் அனைவருக்கும் 'ஆசிரியர் தின வாழ்த்துக்கள்' தெரிவித்தேன். பிறகு பள்ளி தலைமையாசிரியர் அவர்களைச் சந்தித்து என் வாழ்த்தினைக் கூறினேன். "இன்று ஆசிரியர் தினச்சிறப்பு கூட்டம் இருக்கிறது. தவறால் நீங்களும் கலந்து கொள்ளுங்கள், வாசு" என்று தலைமையாசிரியர் தெரிவித்தார்.

கூட்டத்தின் போது போட்டியில் கலந்து கொண்ட அனைத்து ஆசிரியர்களுக்கும் நினைவுப் பரிசு வழங்கப்பட்டது. நிகழ்வு ஏற்பாட்டுக்குழுத் தலைவர் திரு. முரளிஅவர்கள், தலைமையாசிரியருக்குப் 'பொன்னாடை' போற்றி சிறப்பு கௌரவிப்பு செய்தார். பள்ளி தலைமையாசிரியரும் குளுவாங் வட்டார தலைமையாசிரியர் மன்றத் தலைவர் உயர்திரு கெ.முனுசாமி அவ்ர்களின் அரிய முயற்சியால் ரெங்கம் தமிழ்ப்பள்ளி புதிய கட்டடத்துடன் கம்பீரமாகத் திகழ்கின்றது. பள்ளியின் வளர்ச்சிக்கு அரும்பாடுபட்ட அவருக்கு மிகச் சரியான கௌரவிப்பு என்றால் அது மிகையாகாது.

மூத்த ஆசிரியர்கள்( முன்னால் தலைமையாசிரியர்கள்) திருமதி. மகேஸ்வரி ஆசீர்வாதம், திரு. வெங்கடேசன் பிள்ளை, திரு.இராமமூர்த்தி அவர்களும் நிகழ்வில் கலந்து கொண்டு சிறப்பு சேர்த்தனர்.

பி.கு:-மேலே படத்தில்..ரெங்கம் தமிழ்ப்பள்ளியின் தலைமையாசிரியர் திருமிகு. கெ.முனுசாமி அவர்களுடன் மூத்த ஆசிரியை ( முன்னால் தலைமையாசிரியர் ) திருமதி மகேஸ்வரி ஆசீர்வாதம் அவர்கள்

பேரா மாநில - வளர்தமிழ் விழா 2005

2005-05-03T20:27:00.000+08:00

கடந்த சனிக்கிழமை ( 30.04.2005 ) பீடோர் இடைநிலைப்பள்ளியில் பேரா மாநில ரீதியில் நடைபெற்ற வளர்தமிழ் விழா 2005 - நிகழ்வில் கலந்து கொள்ளும் வாய்ப்பு கிடைத்தது என்பதை எதிர்பாரா சம்பவம் என எடுத்துக் கொள்ள வெண்டியதுதான்.

பேரா மாநில கல்வி இலாகாவின் ஆதரவோடு பத்தாங் பாடாங் மாவட்ட தொடக்க மற்றும் இடைநிலைப்பள்ளிகளின் தமிழ்மொழிப்பாடக் குழுவினர் ஏற்பாட்டில் போற்றத்தகுந்த வகையில் 'வளர்தமிழ் விழா - 2005' திகழ்ந்தது. இந்நிகழ்ச்சிக்கு மேலும் சிறப்பு சேர்க்கும் வண்ணம், பேரா மாநில அரசு ஆட்சிக்குழு உறுப்பினரும் மாநில ம.இ.காவின் தலைவருமாகிய மாண்புமிகு டத்தோ கோ.இராஜு அவர்களின் வருகையும் திறப்புரையும் திகழ்ந்தது.

அன்றைய நிகழ்வின் நிகழ்ச்சி நிரல் பின்வருமாறு:

(நேரம் - காலை)
8.00க்கு - பதிவு
8.30க்கு - சிற்றுண்டி
8.45க்கு - நீதிபதிககள் , போட்டியாளர்களுக்கான விளக்கவுரை
9.00க்கு - தமிழ் வாழ்த்து ( திரு.P.பிரகாஷ் - SJKT Tun Sambanthan, Bidor)
9.05க்கு - வரவேற்புரை : திரு.கி.இரவி பிபிடி ( ஏற்பாட்டுக்குழுத் தலைவர்)
9.10க்கு - தலைமையுரை : திரு.சா.சாமிகண்ணு ( மாநில கல்வி
இலாகா தமிழ்ப்பிரிவின் சிறப்பதிகாரி)
9.20க்கு - திறப்புரை : மாண்புமிகு டத்தோ கோ.இராஜு
9.30க்கு - போட்டிகள் ஆரம்பம் ( தொடக்க , இடைநிலைப்பள்ளி
மாணவர்களுக்கானது )
அ) மேடை பேச்சு ( த. நீதிபதி - திரு.M.முனியாண்டி )
ஆ) கட்டுரை வரைதல்( த. நீதிபதி - திரு.ச.முருகையா PPT )
இ) புதிர்ப் போட்டி ( த. நீதிபதி - திருமதி ஓவியச் செல்வி )
ஈ) கதை சொல்லுதல் ( த.நீதிபதி - குமாரி செம்பகம் )
10.30க்கு- இலக்கியவுரை : "செம்மொழி"
படைப்பு : இலக்கியவான் சீனி நைனா முகமது
12.00க்கு- நிறைவு உரை : துவான் சயிட் பின் மானாப்
( மாவட்ட கல்வி இலாகா அதிகாரி )
12.15க்கு- நன்றியுரை : திரு. கே.பெருமாள் ( பாத்தாங் பாடாங் மாவட்ட
தமிழ்மொழி - தொடக்கப் பள்ளி பாடக்குழுத் தலைவர் )
12.30க்கு - பரிசளிப்பு
1.00க்கு - மதிய உணவு.

திறப்புரை ஆற்றுகையில், மாண்புமிகு டத்தோ இராஜு அவர்கள்: 'தமிழ்ப்பள்ளிகளுக்குப் பிள்ளைகளை அனுப்புவது நமது கடமை' என்றும் தேசியப் பள்ளிகளுக்கு ( Sek. Kebangsaan ) தமிழ் மாணவர்களை அனுப்புவதால் பாதிப்பு இருக்கிறது' என்றும் வெளிப்படையாகக் கூறினார்.

ம.இ.காவின் தமிழ்ப்பள்ளிகளுக்கான மேம்பாட்டு வாரியம் வழி தமிழ்ப்பள்ளிகளின் வளர்ச்சிக்கு கட்சி ஆக்ககரமான நடவடிக்கைகளை மேற்கொண்டு வருவாதாகவும் கூறினார். இனி,தமிழ்ப்பளிகளின் கட்டடப் பிரச்னைகளைத் தீர்க்க 'தமிழ்ப்பள்ளியைக் கட்டுவதற்கு நாமே ஏற்பாடு செய்ய வேண்டும்' எனவும் கருத்துரைத்தார்.

நிகழ்ச்சி ஏற்பாட்டுக்குழுத் தலைவர்- திரு.கி.இரவி அவர்கள், 'தொடக்க மற்றும் இடைநிலைப்பள்ளி தமிழ் மாணவர்களின் தமிழ்மொழி வளம், தமிழ்மொழிப் பற்று, மொழியாளுகை, சிந்தனைத் ததிறனை வளப்படுத்தும் நோக்கத்தை' அடிப்படையாகக் கொண்டு இவ்விழா நடத்தப்படுவதாகக் கூறினார். பேரா மாநிலத்திலுள்ள 9 மாவட்டங்களைப் பிரதிநிதித்து மாணவர்கள் போட்டிகளில் கலந்து கொண்டனர். முதல் கட்டமாக மாவட்ட அளவில் ஏற்கனவே போட்டிகளில் கலந்து வெற்றி பெற்றவர்கள் - மாநில ரீதியில் போட்டியிட்டனர். அதே வேலையில், பல மாவட்டங்களிலுள்ள தமிழாசிரியர்களை ஒன்று கூட்டவும், சந்தித்து கலந்துரையாடவும் இவ்விழா வகை செய்கிறது என்றும் அவர் கருத்துரைத்தார்.

குறிப்பு: நிகழ்வு மிக நேர்த்தியாக வழிநடத்தப்பட்டது. வரவேற்பு மண்டபத்தில் தோரணமும், இரு தூண்களில் வாழை மரமும்

கட்டப்பட்டிருத்தது, தமிழ்க் கலாச்சாரத்தைப் பிரதிபலித்தது. ஏற்பாட்டாளர்களின் சீரிய

முயற்சிக்கு மனமார்ந்த வாழ்த்துக்களையும் பாராட்டுக்களையும் அன்புடன் தெரிவித்துக் கொள்கிறேன்.

எங்கள் ஜோரான ஜொகூர் மாநிலத்தில் இது போன்ற நிகழ்ச்சியை 'முத்தமிழ் விழா' வாகக் கொண்டாடுவோம். ஜொகூர் மாநிலத்தில் அதுவும் எங்கள் 'சா'ஆ' ஊர் ஆளை - எம் துறை சார்ந்த நண்பரை ( திரு. K. சந்திர மோகன் - பட்டதாரி ஆசிரியர்) சந்திப்பேன் என்று எண்ணவில்லை. மேலும், ஆசிரியர் பயிற்சிக் கல்லூரி ' senior' அன்பர்கள் சிலரை ( பட்டதாரி ஆசிரியர்கள் திரு. V.வேலாயுதம் -SJKT Slim River , திரு. S.தேவதாஸ் - SMK Dato Panglima, Perang Kiri, Perak ) சந்தித்து கலந்துரையாடியதும் மகிழ்ச்சி அளித்த கணங்களாகும். மேலும் ஆரம்பத்தில் நிகழ்ச்சி நடைபெறும் இடத்திற்கு அன்புடன் வழிகாட்டிய, ஆசிரியர் திரு.கா. தியாரன் -SJKT Ldg. Sg. Kruit, Batang Padang, அவர்களுக்கும் மனமார்ந்த நன்றி.

அவர்களுடனான 'தமிழ்ப்பள்ளி' பற்றிய கலந்துரையாடலை அடுத்த பதிவில்
எழுதுகிறேன். மீண்டும் சந்திப்போம்.

அன்புடன்,
எல்.ஏ.வாசுதேவன்,
USM,Penang.

தேசியப் பள்ளிகளில் தமிழ்

2005-04-27T12:31:00.000+08:00

தேசியப்பள்ளிகளில் தமிழ்-சீனமொழிப்பாடங்கள் போதிக்கப்படும் என்ற பிரதமரின் அறிவிப்பை ம.இ.கா தேசியத் தலைவர் டத்தோ ஷ்ரீ எஸ்.சாமிவேலு அவர்கள் கருத்துரைத்துள்ளார்:

"தேசியப் பள்ளிகளில் தமிழ் மற்றும் சீன மொழி பாடங்களைப் போதிப்பது நாட்டிலுள்ள பல்வேறு இன மக்களிடையே ஒற்றுமையுணர்வையும் புரிந்துணர்வையும் மேலும் வலுப்படுத்தும்"

நாட்டின் எதிர்கால வளர்ச்சிக்கு உதவும் வகையில் தூரநோக்குப் பார்வையுடன் எடுக்கப்பட்ட இம்முடிவை பெரிதும் வரவேற்பதாகவும், மஇகாவின் சார்பில் தனது மனமார்ந்த நன்றியைத் தெரிவித்துக் கொள்வதாகவும் அவர் அறிக்கை வெளியிட்டுள்ளார்.

ஆதிக்கு ஓர் அஞ்சலி

2005-04-27T01:06:00.000+08:00

" என் பெயரிலேயே
இறந்த பிறகும்
நான் உயிர்ப்பித்திருக்க -
என் எழுத்துக்கள்
ஒரு பத்துப்பேருக்காவது
பயன்படுமானால்
அதுவே என் வெற்றி!"

- ஆதிகுமணன் 20.4.1984ல் எழுதிய ஒரு முன்னுரையிலிருந்து.....

மலேசிய தமிழ்ப் பத்திதிக்கை வானில் முடிசூடா மன்னனாக விளங்கி கடந்த 28.03.2005 - நள்ளிரவு 12.30 மணிக்கு இயற்கை எய்தினார், இளைய தமிழவேள் ஆதிகுமணன்.

மலேசிய நண்பன் நாளிதழின் ஞாயிறு பதிப்பில் -"ஞானபீடம்" வழி இலட்சக்கணக்கான வாசகர்களின் இதயம் கவர்ந்த ஆதிகுமணன் மறைந்து சுமார் ஒரு மாத காலம் ஆகிவிட்டாலும், அவரைப் பற்றிய கவிதாஞ்சலி, இரங்கல் கூட்டம் என நாடு முழுதும் நடைபெற்று வருகின்றது.

நண்பன் பத்திரிக்கையில் ஆதி ஐயா பற்றி வாககர்களின் நினைவலைகள், மலேசியக் கவிஞர்களின் கவிதைகள் சில இங்கு தொகுக்கப்பட்டுள்ளது :

1."1984-ஆம் ஆண்டில் முதன் முதலாக நான் பத்திரிக்கையில் எழுதும்போது எனக்கு ஆறுதல் கொடுத்தவர். ஆக்கமும் ஊக்கமும் கொடுத்தவர்; தைரியம்
கொடுத்தவர்; நிறையப் படியுங்கள்; நிறைய எழுதுங்கள் என்று ஆலோசனை கூறியவர் திரு.ஆதி சார். இந்த மலேசிய மண்ணில் துணிச்சல் மிக்க பத்திரிக்கை ஆசிரியர் என்றால் அது ஆதிகுமணந்தான்.
அஞ்சா நெஞ்சம் படைத்தவர். இலக்கியத்துக்கு ஓர் இலக்கணமாகத் திகழ்ந்தவர். தமிழ் எழுத்துக்கு ஓர் அற்புதமான ஆசிரியர். "பார்வை"யின் வழி
பல மனங்களைக் கவர்ந்தவர். இவ்வளவு சீக்கிரத்தில் நம்மை விட்டுப் பிரிவார் என்று சிறிதும் எதிர்பார்க்கவில்லை."
- திருமதி. எம்.ஜெயா சம்பந்தன், செமினி.

2."தோல்வியில் துவண்டு போய் விடும் வாசகர்களை தட்டி எழுப்பி 'ஞானபீடம்' எனும் ஏணிப்படி வழி மேலே தூக்கிவிட்ட நீங்கள் கொஞ்சம் கூட 'பதில்களில்' களைத்துப் போய் நாங்கள் கண்டதில்லையே!
- கா.செல்வி, பூச்சோங்.

3. வாழும் வரலாறு - காரைக்கிழார்.

கதிருண்டு மதியுண்டு கார்மேக வளியுண்டு
ககனத்தின் வெளியு முண்டு
நதியுண்டு கரையுண்டு நடமாடும் அலையுண்டு
நாண்மீனும் நிறைய உண்டு
புதிருண்டு போனஎன் பொல்லாத வாழ்க்கையில்
புலம்பலும் மிகவே உண்டு
கதியுண்டு எனவந்து கைதந்த குமணாஉன்
கருணைமுகம் எங்கே நண்பா ?

இறப்பொன்றும் புதிதில்லை பிறப்பொன்றும் புதிதில்லை
இயற்கைதான் என்று சொல்வார்!
இறப்போடு பிறப்பிங்கே எல்லார்க்கும் வந்தாலும்
யாரிங்கே வாழ்வை வெல்வார் ?
சிறப்போடு நிலைபெற்ற சிலபேரின் அணியிலே
சேர்ந்த என் அருமை நண்பா
வரப்போடு நீர்பொல வடிகட்டிக் கொண்டேன்உன்
வரலாறு நெஞ்சில் வாழும்!

குறிப்பு: இளைய தமிழவேள் - ஆதிகுமணன் அவர்களின் மறைவு
ஈடுசெய்ய இயலாத இழப்பு! மலேசியத் தமிழர்களின்
இதயங்களில் என்றும் வாழ்கிறார்- தமிழ்ச் சோதியாக....!

நீண்ட இடைவேளை

2005-04-25T15:16:00.000+08:00

கனிந்த வணக்கம்.

நீண்ட இடைவேளைக்குப் பிறகு வலைப்பூவில் இணைகிறேன். தொடர்ந்து எழுத வேண்டும் என்ற ஆவல் நிறைய உள்ளது. கல்வி தொடர்பான வேலைகளில் மூழ்கி விட்டேன். தொடர்ந்து பரீட்சை காலம் வேறு வந்ததால் வலைப்பூவிலிருந்து சற்று ஓய்வு எடுத்துக் கொண்டேன். அனைவருக்கும் 'பார்த்திப' புத்தாண்டு வாழ்த்து கூறி சற்றே விடைபெறுகிறேன்.

அன்புடன்,
எல்.ஏ.வாசுதேவன்.

இறைவா! இதை என்னால் செய்யமுடியுமல்லவா?

2005-01-30T15:17:00.000+08:00

( ஸ்வஸ்தி வசனத்தை ஒட்டிய தியானமும், பிரார்த்தனையும் )
முதல் வசனத்தை அடிப்படையாகக் கொண்ட விளக்கவுரை:

இறைவா, நான் இந்த உலகைப் படைக்கவில்லை.
ஆயினும் நான் என்னை இதில் காண்கிறேன். இவ்வுலகில்
எத்தனை எத்தனையோ மக்கள் இருக்கின்றனர்.
அனைவரும் உன்னால் படைக்கப்பட்டவர் என்பதால்,
அவர்களுடன் எனக்கு ஓர் உறவு இருப்பதை நான்
உணர்கிறேன். இந்த உணர்வின் வெளிப்படையாக
அனைவரையும் வாழ்த்துகிறேன்.
அனைவருக்கும் என் நல்லுணைவை அனுப்புகிறேன்.

இறைவா! இதை என்னால் செய்யமுடியுமல்லவா?

இவ்வுலகில் அரசியலும், அரசியல்வாதிகளும்
என்னை பயமுறுத்துகின்றன.
ஆயினும், அரசாட்சியை நடத்துபவர்கள் வேண்டும்
என்பதை நான் உணர்கிறேன்.

அரசாள எவரும் இல்லை என்றால், எவ்விதமான
அராஜகம் தலை விரித்தாடும் என்பதை அறிகிறேன்.
ஆனால், தினந்தோறும் பத்திரிகைகளைப்
பார்க்கும்போது என்னால் வருத்தமடைவதைத்
தடுக்க் முடியவில்லையே! நான் என்ன செய்வது?
தேர்தலில் நிற்க நான் தகுந்தவனும் இல்லை,
தயாராகவும் இல்லை.
ஆனால், இறைவா, என்னால் ஒன்று செய்ய முடியும்,
என்னால் பிரார்த்தனை செய்ய முடியும்.

இறைவா! இதை என்னால் செய்யமுடியுமல்லவா?

(குறிப்பு : மேலேயுள்ள விளக்கவுரையானது முதல் ஸ்வஸ்தி வசனத்தின் ஒரு பகுதி மட்டுமே)

நன்றி : ஆர்ஷ வித்யா குருகுலம், ஆனைக்கட்டி.

பிரார்த்தனை !

2005-01-29T14:11:00.000+08:00

மக்களுக்கு நலம் உண்டாகுக. ஆள்பவர்கள் இந்த பூமியை நியாயமான மார்க்கத்தில் ஆளட்டும். சான்றோர்களுக்கு எப்பொழுதும் சுபம் உண்டாகட்டும். அனைத்து உயிர்களுக்கும் சுகமாக இருக்கட்டும்.
மேகங்கங்கள் காலம் தவறாமல் மழை பொழிய வேண்டும். பூமியானது அதிக தான்யங்களை அளிக்க வேண்டும். இந்த தேசமானது குழப்பங்கள் இன்றி இருக்க வேண்டும். சான்றோர்கள் பயமின்றி வாழ வேண்டும்.
அனைவரும் சுகமாக இருக்கட்டும். அனைவரும் நோயற்று ஆரோக்கியமாக இருக்கட்டும். அனைவரும் நன்மையையே காணட்டும். எவருமே துக்கத்தை அடையாமல் இருக்கட்டும்.
அநித்தியத்திலிருந்து என்னை ( ஞானத்தின் மூலம் ) நித்யத்திற்கு அழத்துச் செல்வாயாக. அறியாமை எனும் இருட்டிலிருந்து என்னை ஞானமெனும் ஒளிக்கு அழைத்துச் செல்வாயாக. பந்தமெனும் மரணத்திலிருந்து என்னை மோட்சமெனும் அழியா நிலைக்கு அழைத்துச் செல்வாயாக.
தோன்றுவதற்கு முன்பும் ப்ரஹ்மம் பூரணமாக இருந்தது. இவ்வுளகம் தோன்றியபின்னரும் அது பூரணமாக உள்ளது. பூரணத்திலிருந்து பூரணத்தை நீக்கினாலும் அது எப்பொழுதும் பூர்ணமாகவே உள்ளது. ஆதலால் அனைத்தும் பூர்ணமே.
இறைவா, இந்த ஆன்மீக மார்க்கத்தில் என்னிடமிருந்தே தோன்றக்கூடியதும், பிற உயிர்களின் மூலம் வரக்கூடியதும், இயற்கையின் சீற்றத்தினால் ஏற்படக்கூடியதுமான இடையூறுகளிலிருந்து எனக்கு சாந்தி உண்டாகட்டும்.

( தமிழாக்கம் - ஸ்வாமி தயானந்த ஸரஸ்வதி )

பினாங்கில் தைப்பூசத் திருவிழா

2005-01-26T20:32:00.000+08:00

பினாங்கு, ஜன.25

இவ்வாண்டு தைப்பூசத் திருவிழாவைக்காண, பினாங்கு ஸ்ரீ பால தண்டாயுத பாணி ஆலயத்திற்கு

ஆயிரக்கணக்கான பக்தர்கள் ஒன்று கூடினர். கோலாலம்பூர் - பத்துமலைக்கு அடுத்து மலேசியாவில் தைப்பூசத் திருவிழா என்றால் அது பினாங்கு மாநிலத்தில்தான் என்றால் மிகையாகாது.

முதல் நாள் அதிகாலை 5 மணிக்கெல்லாம் பினாங்கு ஸ்திரீட்டில் உள்ள கோவில் வீட்டில்

ஆயிரக்கணக்கில் பக்தர்கள் ஒன்று கூட, வெள்ளி ரத ஊர்வலம் புறப்பட்டது. கோவில் வீட்டிலிருந்து புறப்பட்ட வெள்ளி ரத ஊர்வலத்தில் ஐயாயிரத்திற்கும் மேற்பட்ட பக்தர்கள் வந்தனர்.

அர்ச்சனை செய்தவர்களில் இந்துக்கள் மட்டுமல்லாது சீனர்களும் அடங்குவர். வெளிநாட்டிலிருந்து வந்த சுற்றுப் பயணிகளும் தைப்பூசத் திருவிழாவைக் கண்டுகளித்தனர்.

வெள்ளி ரத ஊர்வலத்தின் போது அரசாங்க மற்றும் தனியார் நிறுவனங்களைச் சார்ந்தவர்கள் வழி நெடுகிலும் தண்ணீர்ப் பந்தல் அமைத்து சுவை நீர் மற்றும் அன்னதானம் வழங்கினர்.

பினாங்கு மாநிலத்திலுள்ள 'மலேசிய அறிவியல் பல்கலைக்கழக - இந்திய பணியாளர் சங்கமும் - மாணவர்களின் 'இந்திய பண்பாட்டுக் கழகமும்' இணந்து முதல் நாள் இரவு அன்னதானமும் மறுநாள் தண்ணீர் பந்தலில், சுவைநீரும் வழங்கினர்.

"ஒவ்வொரு ஆண்டும் இம்மாதிரியான தண்ணீர் பந்தல் ஏற்பாடு செய்து வருகிறோம்; அன்னதானமும் வழங்கி வருகிறோம். மக்கள் திரளாக வருகின்றனர்; இன்று இரவு ஏழரைக்கு அன்னதானம் தொடங்கினோம் - பதினொன்றரை வரை மக்கள் வரிசைப்பிடித்து நின்று உணவருந்திச் சென்றனர் " என்று இந்திய பணியாளர் சங்கத் தலைவர் திரு. முனியாண்டி அவர்கள் கருத்துரைத்தார். " பல்கலைக்கழக இந்து மாணவர்கள் பலர் மக்களுக்கு அன்னதானம் மற்றும் சுவைநீர் வழங்க உதவி புரிந்தனர் " என்று அவர் மேலும் தெரிவித்தார்.

" இவ்வாண்டு பினாங்கு தைப்பூசத்தில் கலந்து கொண்ட PMR, SPM & STPM மாணவர்களுக்கு கல்வி ஆலோசனை வழங்கி சிறப்பு செய்த - சக பல்கலைக்கழக மாணவர்கள் அனைவருக்கும் நன்றி கூறிக் கொள்கிறேன். இம்மாதிரியான புறப்பாட நடவடிக்கை,

குறிப்பாக பல்கலைக்கழக மாணவர்களுக்கு நல்ல அனுபவத்தையும் தலைமைத்துவத்தையும்

ஏற்படுத்துகின்றது!" என்று USM தண்ணீர் பந்தல் மாணவர் குழுத் தலைவர் சகோதரர் - பழனி உற்சாகத்துடன் கருத்துரைத்தார்.

பொது மக்களின் பாதுகாப்பை முன்னிட்டு பினாங்கில் போலீசார் தீவிர பாதுகாப்பில் இருந்தனர்.

2005 - புதிய கல்வி ஆண்டு பிறக்கிறது.

2005-01-02T21:25:00.000+08:00

2 ஜனவரி, 2005

நாட்டிலுள்ள 525 தமிழ்ப்பள்ளிகள் நாளை நாளை புதிய கல்விப் பருவம் துவங்குகிறது. பெரும்பாலான பள்ளிகளில் இன்றே புதிய மாணவர்களுக்கும் பெற்றோர்களுக்கும் விளக்கக் கூட்டம் பள்ளி நிர்வாகத்தினரால் நடத்தப்பட்டது.

ஜோகூரில், குளுவாங் தமிழ்ப்பள்ளியில் வழக்கம் போல் "வித்யாரம்பம்" - புதிய முதலாம் ஆண்டு மாணவர்களுக்காக சிறப்புப் பிரார்த்தனையுடன் நடைபெற்றது.

"இவ்வாண்டு குளுவாங் தமிழ்ப்பள்ளியில் 150 மாணவர்கள் முதலாம் ஆண்டில் பதிவு செய்துள்ளனர்" என்று பள்ளியின் மூத்த ஆசிரியர் திரு.ச.மணிவண்ணன் அவர்கள் தெரிவித்தார்.

"காலை 8.00 மணியளவில் பதிவு; 8.30 க்கு 'வித்யாரம்பம்' சமய சடங்குகளுடன் ஆரம்பம். தலைமையாசிரியர் 'தங்கத் தட்டில்', மஞ்சள் அரிசியில் அகரம் எழுத அனைத்து முதலாம் ஆண்டு மாணவர்களும் தங்கள் பெற்றோர்களின் துணையுடன் 'அகரம்' எழுதி கல்வி வித்தையை ஆரம்பித்தனர்" என்று ஆசிரியர் திரு.ச.மணிவண்ணன் அவர்கள் 'விவேகம்' வலைப்பூவுக்காக தொலைபேசி வழி தெரிவித்தார்.

இன்றைய நிகழ்வில் தொடர்ந்து பஜனைப் பாடல்களும் பாடப்பட்டது. குளுவாங் ரிவர் டெக்ஸ் குருக்கள் திரு தாமோதரன் அவர்களின் தலைமையில் தெய்வீகம் கமழ பள்ளி மண்டபத்தில் 2005- ஆண்டின் புதிய கல்விப் பருவம் துவக்கம் கண்டது.

அதனைத் தொடர்ந்து, புதிய மாணவர்களுக்குக் குழு விளையாட்டு, பாடல் மற்றும் ஆசிரியர்களுடன் அறிமுகம் - என்ற அங்கமும் இருந்தது. இறுதியாக,
பள்ளியின் பெற்றோர் ஆசிரியர் சங்கத் தலைவர் ( திரு. சுப்ரமணியம்) , பள்ளி தலைமை ஆசிரியர்( திரு. சண்முகம்), கல்விப் பிரிவு துணைத் தலைமையாசிரியர் ஆகியோரின் விளக்க உரையுடன் நிகழ்வு இனிதே நிறைவு கண்டது. இந்நிகழ்வில் மாணவர்கள் ( 120 ), ஆசிரியர்கள் ( 60 ) மற்றும் பெற்றோர் ( சுமார் 150 ) பேர் கலந்து கொண்டு சிறப்பு சேர்த்தனர்.

தகவல் : ஆசிரியர் திரு.ச. மணிவண்ணன்(குளுவாங் தமிழ்ப்பள்ளி)

இது போன்று நாளை முதலாம் ஆண்டில் காலடி வைக்கும் ( 525 பள்ளிகள்) அனைத்து மாணவர்களுக்கும் வாழ்த்து கூறி தமிழ்த்தாயின் அருளாசி பெற்று கல்வி கேள்விகளில் சிறந்திட இறைஞ்சுகிறேன். அதே வேளையில் புதிதாக ஆசிரியர் பணிக்கு வந்திருக்கும் ஆசிரியர்களுக்கும் அனைத்து தமிழாசிரியர்களுக்கும் இனிய புத்தாண்டு வாழ்த்துகள்!

அன்புடன்,
எல்.ஏ. வாசுதேவன்,
USM, Penang.

சொல்லுக்கும் செயலுக்கும் உள்ள சம்பந்தம்!

2004-11-25T13:27:00.000+08:00

டாக்டர் எம்.எஸ். உதய மூர்த்தி அவர்கள் எப்போதோ எழுதியது...(குமுதத்தில்)

சொல்லுக்கும் செயலுக்கும் ஒரு உறவு இருக்கிறது. அதை நாம் புரிந்து கொள்ளும் போது நாம் சொல்கிற வார்த்தை மந்திரம் போல் நிறைவேறும்.

ஒரு மனிதரிடம் பொய்யாக ஒரு வார்த்தையைத் தற்பெருமைக்காகவோ சமாதானத்திற்காகவோ சொல்கிறோம். சொல்லும் போதே நமக்குத் தெரியும் 'இதை நாம் செய்யப் போவதில்லை' என்று. இப்படிச் சொல்லிச் சொல்லி பழக்கப்படும் போது, 'சொல்லப்படுகிற வார்த்தைகளை செயல்படுத்த வேண்டியதில்லை' என்ற மனப் பழக்கத்தை நம் ஆழ்மனம் ஏற்றுக் கொள்கிறது. பிறகு ஒரு நாள் 'இதை இப்படிச் செய்வேன்' என்று சொல்லும்போது ஆழ்மனம் இதை ஏற்றுக் கொள்வதில்லை! "செய்ய வேண்டியதில்லை! நிறைவேற்றத் தேவையில்லை!" என்று பழைய பாதையில் செல்கிறது.

செய்ய வேண்டியதில்லை என்று அலட்சியப்படுத்தும் ஆழ்மனத்திற்கும் செய்து முடிக்க வேண்டும் என்ற நம் தீர்மானத்திற்கும் ஒரு போராட்டம் ஏற்படுகிறது. இதன் விளைவாக மனம் தடுமாறுகிறது.

"செய்யப் போவதைத்தான் பேசுகிறோம்" என்று ஆழ்மனம் நம்பும்போது, காரியத்தை நிறைவேற்ற ஆழ்மனம் நம்மை அறியாமல் செயல்படுகிறது. நம்மை செயல்பட உந்துகிறது. நமது இலட்சியம் நிறைவேறுகிறது.

மனத்திற்கும் செயலுக்கும் உறவில்லாதபோது மனத்தில் நம்பிக்கை இல்லை, ஈடுபாடு இல்லை. அந்த வேலையை செய்யத் தயாராயில்லை.

"செய்கிறேன்!" என்று சொல்லிவிட்டு செய்யாமலிருக்கும் போது ஆழ்மனத்தை நேர் எதிர்த் திசையிலொ அனுப்புகிறோம். நமக்குக் காரியம் ஆக வேண்டிய போதும் அது அந்த பழக்கம் காரணமாக நேர் எதிர்த் திசையில் செல்கிறது!"

சொல்லுக்கும் செயலுக்கும் உறவை ஏற்படுத்துங்கள்!

குறிப்பு : டாக்டர் எம்.எஸ்.உதய மூர்த்தி எழுதிய மனோதத்துவத் தொடர்களை பல ஆண்டுகளாக படித்து வருகின்றேன். அவருடைய முதல் புத்தகம் "எண்ணங்கள்" பலர் வாழ்வில் விளைபயன்மிக்க மாற்றங்களை ஏற்படுத்தியுள்ளது.

ஆசிரியர் தரம்

2004-11-16T15:20:00.000+08:00

தரமான ஆசிரியர்களின் பண்புகள் என்ன ?

பெரும்பாலும் ஆசிரியர் தரம் என்றவுடனேயே ஆசிரியர்களின் கல்வியறிவு அல்லது அவர்கள் பெற்றுள்ள சான்றிதழ்களின் அடிப்படையிலேயே நாம் இதை நோக்குவது இயல்பாகி விட்டது. எனினும், ஆசிரியர்களின் கல்வியறிவை மட்டும் வைத்து அவர்களின் தரத்தை நிர்ணயிப்பது பொருத்தமில்லாத ஒன்றாகும்.

ஆசிரியர் தரம் என்பது, அவர்கள் பெற்றுள்ள கல்வியறிவு, பணித்திறப் பயிற்சி, பணி தொடர்பான சிறப்புப் பயிற்சி, மனப்பான்மை, பொறுப்பேற்கும் தன்மை, முனைப்பு, பணியின் தரம், நோக்கு நிலை போன்றவற்றை அடிப்படையாகக் கொண்டே நிர்ணயிக்கப்பட வேண்டும்.

ஓர் ஆசிரியர் தரமான கற்றல் கற்பித்தலை வழங்க முடியும். ஒருவர் உயர்ந்த கல்வியறிவைப் பெற்றிருந்தாலும், அவருக்கு ஒரு நல்லாசிரியருக்கு இருக்க வேண்டிய மனப்பான்மை இல்லையெனில், அவர் தம் பணியினை சிறப்பாகச் செய்ய மாட்டார். இதனால் அங்கு தரமான கற்றல் கற்பித்தல் நடைபெற வழியில்லாமல் போய்விடும்.

இப்பண்புகளை எப்போதும் எப்போதும் பேணிக் காப்பது ஒரு ஆசிரியரின் கடமையாகும். இதில் எவையேனும் ஒரு பண்பிலேயோ அல்லது பல பண்புகளிலிலேயோ ஒருவர் குறையுடையவராக இருந்தால், அதில் ஏற்றம் காண முயற்சிக்க வேண்டும். அதுவே நல்லாசிரியரின் பண்பாகும்.

ஆசிரியர்கள் எப்போது புதிய புதிய செய்திகளைத் தெரிந்து கொள்வதை நிறுத்துகின்றார்களோ, அக்கணமே அவர்கள் ஆசிரியர் தொழிலைச் செய்யும் தகுதியை இழக்கின்றனர். ' When teachers stop being learner, they should immediately stop being teachers' என்று கல்வியாளர்கள் கூறுகின்றனர்.

( 1992-இல் கோலாலம்புரில், மலாயாப் பல்கலைக்கழகத்தில் ம.இ.காவின் கல்விக் குழுவின் ஏற்பாட்டில் நடைபெற்ற 2020 இலக்கை நோக்கித் தமிழ்ப்பள்ளிகள்: ஒரு தேசியக் கருத்தரங்கில் படைக்கப்பட்ட ஆய்வுக் கட்டுரையின் ஒரு பகுதி- படைப்பு : முனைவர் என்.எஸ்.இராஜேந்திரன் அவர்கள், UPSI பல்கலைக்கழகம் )

குறிப்பு : தற்போது முனைவர் என்.எஸ்.இராஜேந்திரன் அவர்கள் UNESCO-வின் அனைத்துலக கலை கலாச்சாரக் குழுவின் கல்வியாளர்களுக்கான

செயற்குழுவின் உறுப்பினராகத் தேர்வாகியுள்ளார் என்பது மலேசிய இந்தியர்களுக்குப் பெருமையளிக்கும் விசயமாகும். முனைவர் என்.எஸ் அவர்களுக்கு மலேசியத் தமிழாசிரியர்களின் சார்பில் மானமார்ந்த வாழ்த்துக்களைத் தெரிவித்துக் கொள்கின்றேன். )

மூவாரில்-மாநில அளவிலான "முத்தமிழ் விழா 2004"

2004-11-02T13:20:00.000+08:00

மலேசிய நாட்டிலுள்ள தமிழ்ப்பள்ளிகள் மொழிக்காக மட்டும் அல்ல என்பதை அவ்வப்போது நடைபெற்று வரும் கலை, இலக்கியம் மற்றும் சமயம் தொடர்பான நிகழ்ச்சிகள் மெய்ப்பித்து வருகின்றன.

பிற மாநிலங்களில் இயல், இசை, நாடகம் அடங்கிய முத்தமிழ் விழாக்கள் ஆங்காங்கே நடைபெற்று வந்தாலும், ஜோகூர் மாநிலத் தமிழ்ப்பள்ளிகள் தொடர்ந்து ஒவ்வொரு ஆண்டும் 'முத்தமிழ் விழா'வை வட்டாரம், மாநிலம் அளவில் நிகழ்த்தி வருவது தமிழுக்கு ஆற்றி வரும் மகத்தான காரியமாகும்.

நேற்றைய முன்தினம், ( 30.10.2004 - சனிக்கிழமை ) மூவார் பட்டினத்தில் உள்ள தமிழ்ப்பள்ளியில் மிகவும் கவரும் வகையில் ஜோகூர் மாநில ரீதியான 'முத்தமிழ் விழா 2004' நடைபெற்றது. ஜோகூர் மாநிலத் தலைமையாசிரியர் மன்றத்தினரால் நடைபெற்றுவரும் இவ்விழாவானது 12-வது அகவையைத் தொட்டுவிட்டது கண்டு எல்லோருக்கும் மகிழ்ச்சிதான். மாநில ம.இ.கா தொடர்புக்குழுத் தலைவரும் மாநில ஆட்சி மன்ற உறுப்புனருமாகிய மாண்புமிகு டத்தோ K.S.பாலகிருஷ்ணன் அவர்கள் நிறைவு விழாவில் கலந்து சிறப்பித்தார். இனி ஆண்டுக்குப் பத்தாயிரம் ரிங்கிட் நன்கொடை வழங்க இசைந்துள்ளது போற்றுதலுக்குரியது. அவர் தமதுரையில் மேலும் ஒரு வேண்டுகோள் விடுத்தார்.....அதாவது 'முத்தமிழ் விழா'வை அனைவரும் கண்டுகளிக்கும் வகையில் ஏற்பாடு செய்ய வேண்டும் என்பதேயாகும். தலைமையாசிரியர்களுக்கெல்லாம் இது 'தலையாயச் சவால்' என்பது என் கருத்து.

ஒவ்வொரு ஆண்டும் தமிழ்ப்பள்ளி மாணவர்கள் 'முத்தமிழ் விழா' போட்டிகளில் பங்கு கொள்கின்றனர். தமிழ்க் கவிதைப் போட்டி, பேச்சுப் போட்டி, புதிர்ப் போட்டி, திருக்குறள் கதை கூறும் போட்டி, இசைப் பாடல், நடனம் மற்றும் நாடகம் எனப் பற்பலக் கூறுகளில் மாணவர்கள் தங்கள் படைப்புகளை வெளிக்கொணரும் ஒரு களமாகத் திகழ்கிறது 'முத்தமிழ் விழா'. வட்டார ரீதியில் நடைபெற்ற போட்டிகளில் முதல்நிலை அடைந்தவர்கள் மாநில அளவில் இறுதிச் சுற்றில் பங்கேற்று வருகின்றனர்.

போட்டிக்கு முன் மாணவர்களைத் தேர்வு செய்வதிலிருந்து அவர்களுக்குப் பயிற்சி அளித்துத் தயார் படுத்துவதோடு மட்டுமல்லாமல், போட்டிக்குத் தேவையான துணைக் கருவிகள் மற்றும் உபகரணப் பொருட்களைத் தயாரிப்பதிலும் ஆசிரியர்கள் பெரும் சிரத்தை மேற்கொண்டு வருவது பாரட்டுதலுக்குரியது. போட்டிகளில் வெற்றி பெற்றால் மாணவர்களுக்கு மகிழ்ச்சி. மாணவர் பருவத்தில் அவர்கள் பெறும் அனுபவங்களில் மகத்தான

ஒன்றாக இது போன்ற நிகழ்வுகள் மனதில் பதியும். ஆசிரியர்களுக்கு ? உளப் பரினாமம் ஏற்படலாம்.....சக ஆசிரியர் நண்பர்களின் பாராட்டுகள் உற்சாகம்

ஊட்டலாம்.....இவை அவர்களின் பணிக்காலச் சுவடுகள்!

விழா ஏற்பாட்டுக் குழுவினர்க்கு மனமார்ந்த பாராட்டுக்கள்!

குளுவாங்கில் முத்தமிழ் விழா

2004-10-26T22:28:00.000+08:00

கனிந்த வணக்கம். தற்போது சற்றேரக்குறைய ஒரு மாத கால விடுமுறையில் இருக்கிறேன். எங்கள் ஜோரான ஜோகூர் மாநிலத்தில், குளுவாங் எனும் ஊரிலிருந்து எழுதுகிறேன்.

ஒவ்வொரு முறையும் விடுமுறைக்கு வரும் போது, தற்செயலாக சில நிகழ்ச்சிகளில் கலந்து கொள்வது இயல்பாகிவிட்டது. திட்டமிட்ட சில காரியங்களும் உண்டு. அதைப் பற்றி பிறகு குறிப்பிடுகிறேன். எல்லாமே தமிழ், தமிழ்ப்பள்ளி, தமிழாசிரியர்கள் மற்றும் அவை சார்ந்த தொழில் நுட்பம் பற்றியதுதான்.

பினாங்கிலிருந்து குளுவாங்கிற்கு வந்த மறுநாள் ( 23.10.2004) குளுவாங், ஹஜி மானான் தமிழ்ப்பள்ளியில் பத்து பகாட், குளுவாங், மெர்சிங் ஆகிய மூன்று வட்டாரத்தைச் சார்ந்த தமிழ்ப்பள்ளி மாணவர்களின் படைப்புகள் போட்டிகளாக முத்தமிழ் விழாவில் நாடைபெற்றது. 'முத்தமிழ் விழா' எனும் இந்நிகழ்ச்சி ஆண்டு தோறும் தலைமையாசிரிகளின் மன்றத்தால் ஏற்பாடு செய்யப்படும் ஒரு தமிழ்ப் பண்பாட்டு நிகழ்ச்சியாகும். இதே போன்று ஜோகூரில் பிற மாவட்டங்களிலும் போட்டிகள் நடைபெறுகின்றன. ஒவ்வொரு மாவட்டங்களில் முதல் நிலை பெற்ற குழுவோ அல்லது மாணவரோ மாநில முத்தமிழ் விழாவில் கலந்து கொள்வர். அது அனைத்து போட்டிகளுக்கும் ( இசைப்பாடல், திருக்குறள், கதை கூறுதல், கவிதை, கணினி வரைகலை,புதிர், நடனம், நாடகம் போன்றவை ) இறுதிச்சுற்றாகும்.

எம்மை கணினி வரைகலை போட்டிக்கு நீதிபதியாக்கினார் விழா ஏற்பாட்டுக் குழு தலைவரும், பத்து பகாட், குளுவாங், மெர்சிங் வட்டாரத் தலைமையாசிரியர் மன்றத் தலைவர் உயர்திரு. கெ.முனுசாமி அவர்கள். அடியேன் கேட்டுக்கொண்டதற்கிணங்க அன்றைய நிகழ்வின் நிறைவுக்கு முந்திய அங்கமாக 'தமிழ் மொழியும் பண்பாடும் - ஒரு கண்ணோட்டம்' எனும் கருப்பொருளைக் கொண்ட ஒரு பல்லூடகப் படைப்பும் காண்பிக்கப்பட்டது. அது, தமிழ் செம்மொழி அங்கிகாரம் கிடைக்கப்பெற்ற பின் எழுந்த உத்வேகத்தின் பிரதிபலிப்பு என்றுதான் சொல்வேன்.

தமிழ் ஆர்வம், உணர்வுமிக்க தமிழாசிரியர்கள் ஒலி ஒளி காட்சி முடிவுற்றதும் எமக்கு வாழ்த்து தெரிவித்தனர். அவர்களுக்கும் வாய்ப்பு வழங்கிய தலைமையாசியர் மன்றத் தலைவருக்கும் என் மனமார்ந்த நன்றியைத் தெரிவித்துக் கொள்கிறேன்.

(பயணம் தொடரும் ..)

மன அழுத்தத்தைப் போக்குங்கள்!

2004-10-18T11:00:00.000+08:00

மன நெருக்கடி அல்லது உளைச்சல் காரணமாக உடலில் ஏற்படும் தளர்ச்சி அல்லது தேய்மானந்தான் மன அழுத்தமாகிறது. இது உடலில் அல்லது உளவியல் காரணமாக உண்டாகலாம். மன அழுத்தத்தைப் போக்கவே முடியாதா ? அழுத்தத்தை நம்மால் முறியடிக்க முடியும்! அதுமட்டுமின்றி, அதனை நமக்கு சாதமாகப் பயன்படுத்தவும் முடியும்.

சரி, என்ன செய்யலாம் ? முதலில் மனநிலைக்கு ஏற்ப வேலை செய்யவும். எந்த வேலையிலும் முழு ஈடுபாடுடன் செயலாற்றவும். பிடிக்காத வேலையை வேண்டா வெறுப்பாகச் செய்தால் கண்டிப்பாக மன அழுத்தம் ஏற்படும். எதிலும் அபாயம், அனுகூலம் என்ற இரண்டும் இருக்கும். நாம் அணுகுவதில்தான் நமக்கு அபாயம் ஏற்படுமா அல்லது அனுகூலம் ஏற்படுமா என்று தெரியும். எனவே, எந்த வேலையையும் சவாலாக எடுத்துக் கொண்டு நாம் அணுகினால்தான் நமக்கு வெற்றி நிச்சயம்.

சிந்தனையை மாற்றவும். கடும் மன அழுத்தத்தில் இருக்கும் போது அந்த மனநிலையில் இருந்து விடுபட வேறு சிந்தனை உங்களுக்கு உதவுமானால் உடனே உங்கள் சிந்தனையை மாற்றுங்கள்.

நல்ல சிந்தன தேவை. நிச்சயமற்ற நிலை பற்றி உணரும் போது வெற்றி அல்லது கடந்த கால சிந்தனைகள் பற்றி நினைத்துப் பாருங்கள். நம் முயற்சி தோற்றுவிடுமோ என்று எப்போதும் எதிர்மறையாக சிந்திக்கக் கூடாது.

உடலுக்கு அவ்வப்போது ஓய்வு கொடுப்பது போல் மனதுக்கும் ஓய்வு தேவை. கடும் வேலைக்கிடையே கடற்கரையில் சுகமாகப் படுத்து ஓய்வு எடுப்பது போலவோ, உல்லாசப் பூங்காவில் குழந்தைகளுடன் மகிழ்ச்சியாய் விளையாடுவதைப் போலவோ நினைத்துப் பார்த்தாலே மனதுக்குப் புதுத் தெம்பு கிடைக்கும்.

நல்ல உடற்பயிற்சி, நாட்டியம், இசையை ரசிப்பது, நகைச்சுவையை விரும்வது, வெந்நீரில் குளிப்பது, நீர்வீழ்ச்சியில் நீராடல் போன்றவை மூலமும் மன அழுத்தத்தைக் குறைக்கலாம்.

இறுதியாக, எதற்கும் கவலை வேண்டாம்! மகிழ்ச்சியாக இருந்தாலே மன அழுத்தம் குறைந்துவிடும்.

குறிப்பு : சில நேரங்களில் யாரையாவது வாய்க்கு வந்தபடி திட்டினாலோ, அல்லது சுத்தமாக அழுதாலோ மன அழுத்தம் குறைகிறதாம் ! எப்படி வசதி?

உளவியல்,பயிற்றியல் துறைகளில் புதிய செல்நெறிகள் - பகுதி 4

2004-10-15T16:59:00.000+08:00

கருத்தாக்க கற்றல் அணுகுமுறைகள்

1.ஆசிரியர் கேள்விகளையும் பிரச்சினைகளையும் முன்வைத்தல். மாணவர்களே சுயமாக விடை காண வழிகாட்டுதல்.

2. மாணவர்களே கேள்விகளை உருவாக்குதல்.

3. குழுவாகச் செயல்படுதல். சகாக்களைத் துணையாகக் கொள்ளுதல்.

4. முன் அனுபவம், முன் அறிவோடு புதிய கருத்துகளை உருவாக்குதல்.

5. உயர்நிலை சிந்தனைத் திறனைப் பயன்படுத்துதல்.

புரிந்து கொள்ளுதலை எவ்வாறு கற்பிக்கலாம் ?

விளக்கம் அளித்தல், பயிற்சி செய்வித்தல், தேர்வு நடத்துதல் மட்டும் புரிந்து கொள்ளுதலைக் கற்பிக்கும் அணுகு முறை அல்ல. புரிந்து கொள்ளுதலைக் கற்பிக்க தேவைப்படும் ஆறு முதன்மைக் கூறுகள்:-

1. சிந்தனைத் திறனை மையமாகக் கொண்ட ஒரு நீண்ட கால கற்றல் முறையை உருவாக்குதல்.

2. ஆண்டு முழுவதும் மதிப்பீடு செய்யும் முறையை அமல்படுத்துதல்.

3. வளமான சான்றுகளுடன் கற்றலை ஆதரித்தல்.

4. நடைபெறும் மாற்றங்களையும் முன்னேற்றங்களையும் கவனத்தில் கொள்ளுதல்.

5. பயிலும் துறையில் மாணவர்களை முழு ஈடுபாடடையச் செய்தல்.

6. கருத்துப் பெயர்ப்புகளுக்காகக் கற்பித்தல்.

பரிந்துரைகள் :-

1. பள்ளியிலும் பள்ளிக்குப் புறத்தேயும் தம் சகாக்களுடன் இணைந்து பணியாற்றும் வாய்ப்பை வழங்குதல்.

2.ஆசிரியர் மேற்கொள்ளும் செய்முறையை மேம்படுத்த தலைமையாசிரியரின் ஆலோசனையையும் ஆதரவையும் பெறுதல்.

3. ஆசிரியர் கையாளும் புதிய அணுகுமுறைகளைப் பற்றித் தலைமையாசிரியரைத் தவிர்த்துப் பிறர் கருத்துகூறுதல்.

4. ஆதரவு பெறுவதற்கும் புதிய கருத்துகளை உருவாக்குவதற்கும் ஆசிரியர்கள் சமூகத்தின் அங்கமாக இருத்தல்.

5. நடைபெறும் மாற்றங்களுக்கு ஏற்ப கற்பித்தல் அணுகுமுறைகளைப் பரிசோதனை செய்துபார்க்க வாய்ப்பு வழங்குதல்.

6. இவ்வாறு செய்தால் ஆசிரியர் கற்பிக்கும் பாடத்தைப் பற்றிய புதிய கருத்துகள் உருவாகலாம். அவருடைய பங்களிப்பில் மாற்றம் ஏற்படலாம்.

7. பங்களிப்பிலும் செயல்பாடுகளிலும் ஏற்படும் மாற்றங்களில் ஆசிரியர்கள் முழுமையாக ஈடுபடுத்திக் கொள்ள போதுமான அவகாசம் அளித்தல்.

8. ஆசிரியர் பணித்த மேம்பாட்டைக் கற்றலின் மையப் பகுதியாக நெறிபடுத்துதல்.

9. பணித்திற மேம்பாடு நீண்ட கால அடிப்படையில் செயலாக்கம் பெற அரசும் மக்களும் ஆதரவு வழங்குதல்.

முடிவுரை

ஆசிரியர்கள், சமுதாயத்திடமிருந்து பல்வகையான சவால்களையும் எதிர்ப்பார்ப்புகளையும் எதிர்நோக்குகிறார்கள். ஆசிரியர் பயிற்சியில் அறிந்த அணுகுமுறைகளுக்கு மாறாக புதிய முறையில் கற்பிக்க அவர்கள் வற்புறுத்தப்படுகிறார்கள். உயர்நிலை சிந்தனைத் திறனை கற்பித்தலில் இணைத்துக் கொள்ளக் கேட்டுக் கொள்ளப்படுகிறார்கள். தேர்வுக்கு அதிமுக்கியத்துவம் அளிக்கும் அதே வேளையில் கருத்தாக்க முறையைப் பயன்படுத்திப் புரிந்து கொள்ளுதலைக் கற்பிக்க கட்டாயப்படுத்துகிறார்கள். இந்தக் கட்டுப்பாடுகளையும் சவால்களையும் ஆசிரியர்கள் சந்தித்தே ஆகவேண்டும். ஆசிரியர்கள் தொழிலுக்குத் தேவையான அறிவையும் திறன்களையும் நிறைவாகப் பெற வேண்டும். சாதாரண அறிவையும் ஆற்றலையும் பெற்ற ஒருவராக அல்லாமல் சிறப்புத்தன்மை வாய்ந்த ஒருவராக அவர்கள் திகழ வேண்டும்.

குறிப்பு: கட்டுரையாளர்..முனைவர் என்.எஸ்.இராஜேந்திரன் அவர்கள்.

இடைவேளை..

2004-10-15T16:49:00.000+08:00

கனிந்த வணக்கம்.
அன்பு வாசகர்களே... கடந்த ஒரு மாத காலமாக அடியேன் வலைப்பதிவு செய்ய இயலாமைக்கு மிகவும் வருந்துகிறேன். கல்வி தொடர்பான வேலை மற்றும் இதர தவிர்க்க இயலாத பொதுநல ஈடுபாடு இவை யாவும் எம்மைச் சற்று பின்னடைவு செய்து விட்டது!

இனி சரி செய்யும் காலம்.

மீண்டும் வருவேன்,

நன்றி,
வாசுதேவன் இலட்சுமணன்.

உளவியல், பயிற்றியல் துறைகளில் புதிய செல்நெறிகள் -3

2004-09-02T00:28:00.000+08:00

புரிந்து கொள்ள கற்பித்தல்

புரிந்து கொள்லுதல் என்றால் என்ன? தெரிந்த அறிவை ஒப்புவித்தல், அதனைச் செய்து காட்டுதல் மட்டும்தானா? புரிந்து கொள்ளுதல் என்பது வெறும் அறிந்து வைத்திருப்பதும் மட்டுமல்ல. அதனையும் மிஞ்சி ஒன்றைப் பற்றி விளக்க வேண்டும், அதற்காண சான்றுகளைத் திரட்டி வர வேண்டும், உரிய எடுத்துக்காட்டுகளைக் கொண்டு வர வேண்டும், பொதுமைக் கருத்துகளை உருவாக்க வேண்டும், கருதுகோடல்களைப் பயன்படுத்த வேண்டும், பகுப்பாய்வு செய்ய வேண்டும். இப்படிப் பல்வேறு ஆற்றல்களைச் செய்து காட்ட வேண்டும்.

கற்றல் கற்பித்தலில் தொழில் நுட்பத்தைப் பயன்படுத்த வேண்டும்.

ஆசிரியர் தகவல் தொடர்பு தொழில் நுட்பம் வழங்கும் பல்வேறு வளங்களைப் பயன்படுத்தும் திறமைபெற்றவராக இருக்க வேண்டும். தகவல் தொடர்பு தொழில் நுட்பத்தை கற்பித்தலில் ஒரு கருவியாகப் பயன்படுத்த வேண்டும். இதற்கு ஆசிரியர்களிடையே தகவல் தொழில் நுட்பத்தைப் பற்றி சார்பான எண்ணம் இருக்க வேண்டும்.

குறிப்பு :

பகுதி 3கட்டுரையாளர்:

இணைபேராசிரியர் முனைவர்என்.எஸ்.இராஜேந்திரன்Ph.D,

சுல்தான் இட்ரிஸ் கல்விப்பல்லைக்கழகம்.

உளவியல், பயிற்றியல் துறைகளில் புதிய செல்நெறிகள் -2

2004-09-02T00:07:00.000+08:00

கருத்தாக்க முறை

கருத்தாக்கம் என்பது மக்கள் எவ்வாறு கற்கிறார்கள் என்பதை விளக்கும் ஒரு கொட்பாடாகும். மக்கள் சுயமாகவே உலகைப் புரிந்து கொள்கிறார்கள். உலகைப் பற்றிய அறிவைப் பெறுகிறார்கள். இவ்வாறு செய்வதற்கு அவர்களுடைய முன்னறிவும் முன் அனுபவமும் பெரும் பங்காற்றுகின்றன. ஒவ்வொருவருடைய அறிவாற்றல் பெருக்கத்திற்கும் அவரே காரணமாக அமைகிறார்.

வகுப்பறையில் மேற்கொள்ளப்படும் பல்வேறு பயிற்று முறைகளே கருத்தாக்க கற்றல் நடைபெற உதவுகின்றன. பரிசோதனை முறை, பிரச்சினைகளுக்குத் தீர்வு காணும் முறை முதலிய அணுகு முறைகள் மாணவர்கள் ஒன்றைப் பற்றி அதிக அறிவு பெறுவதற்கு வழி வகுக்கின்றன.

குறிப்பு : பகுதி 2

கட்டுரையாளர்:இணைபேராசிரியர் முனைவர்என்.எஸ்.இராஜேந்திரன்Ph.D,

சுல்தான்இட்ரிஸ்கல்விப்பல்லைக்கழகம்.

மாசய் - தமிழ்ப்பள்ளியில் 'வலைப்பூ' அமைக்கும் பயிலரங்கு

2004-08-16T02:40:00.001+08:00

இடம் : மாசாய் தமிழ்ப்பள்ளி

நாள்: 13.08.2004

நிகழ்வு :தமிழ்ப்பள்ளி ஆசிரியர்களுக்கு தமிழ் வலைப்பூ அமைக்கும் வழிகாட்டிக் கருத்தரங்கு.

ஏற்பாடு : தெமெங்கொங் இபுறாஹீம் ஆசிரியர் பயிற்சிக் கல்லூரி ( MPTI ) - விரிவுரையாளர்கள்.

( i) திருமிகு. சேதுபதி (ii) திருமிகு. சண்முகம் (iii) திருமிகு. ஜேசுடாஸ்

கனிந்த வணக்கம். முதலில், ஏற்பாட்டுக் குழு ஒருங்கிணைப்பாளர் - கல்லூரி விரிவுரையாளர் திருமிகு. சேதுபதி அவர்களுக்கு மனமார்ந்த நன்றியைத் தெரிவித்துக் கொள்கிறேன்.அவருடைய முயற்சியால் எமக்கு இப்பயிலரங்கை வழிநடத்த வாய்ப்பு கிடைத்தது. 'தகவல் தொடர்பு தொழில் நுட்பத்தில் வலைப்பூவும் மின் தமிழும்' எனும் தலைப்பில் பயிலரங்கு நடைபெற்றது. இது முதல் முயற்சி; சிறியஅளவில் ஏற்பாடு செய்யப் பட்டிருந்தது. ஜொகூர் வட்டாரத்தைச் சார்ந்த 26தமிழ்ப்பள்ளி ஆசிரியர்கள் பங்கேற்றார்கள்;பயனடைந்தார்கள்.

அவர்களுக்கு தமிழில்'யூனிகோட்' முறையில் எளிய வழியில் weblog -வலைப்பூ அமைப்பது பற்றி பயிலரங்கு நடைபெற்றது.

கலந்து கொண்ட ஆசிரியர்கள் செய்முறை பயிற்சியிலும் ஈடுபட்டனர்; பலர் வெற்றிகரமாக முதல் தமிழ் வலைப்பதிவு செய்தனர்.

நல்லதொரு துவக்கம். தமிழ்ப்பள்ளி ஆசிரியர்கள் இதன்வழி தங்களை தகவல் தொழில் நுட்பத் துறையில் இன்னும் ஈடுபாடு காட்ட ஒரு வாய்ப்பு ஏற்படும் என்று கருதுகின்றேன்.

அன்புடன்,

எல்.ஏ. வாசுதேவன்,

பல்லூடகத் தகவல் தொடர்பு தொழில் நுட்பம்,

மலேசிய அறிவியல் பல்கலைக்கழகம்.

பி.கு : கலந்து பயனடைந்த ஆசிரியர்கள் தங்கள் வலைப்பூவை எவ்வாறு கற்றல் கற்பித்தல் மற்றும் ஆசிரியர் பணி தொடர்பான சிந்தனைக்களமாக்குவது பற்றி ஆழ்ந்து யோசிக்குமாறு அன்புடன் விழைகின்றேன்.

திறம்படக் கற்றல் (Mastery Learning)

2004-08-11T23:52:00.000+08:00

திறம்படக் கற்றல் என்பது கல்வித் துறையில் பல காலங்களாக வழங்கிவருகின்ற ஒரு முறைதான். திறம்படக் கற்றல் ( Mastery Learning ) என்பதுகற்பித்தலைப் பற்றிய ஒரு கோட்பாடு - Mastery learning is a philosophy abaout teaching. தகுந்த முறையில் அதே நேரத்தில் ஏற்புடைய சரியான வழிகளைப்பின்பற்றி கற்பித்தால் அனைத்து மாணவர்களும் ஆசிரியர் போதிக்கும் பாடங்களைமுழுமையாகப் பெற்றுக் கொள்ள முடியும் என்பதே இக்கொள்கையின் முதன்மையானகூற்றாகும்.

திறம்படக் கற்றலின் வெற்றி மாணவர்கள் எந்த அளவுக்குக் கற்றலில் ஊக்குவிக்கப்படுகிறார்கள் என்பதிலும், எந்த அளவுக்குத் தேவையான பொழுது' கற்றல் சிக்கலை எதிர்நோக்குகின்ற காலத்தில்' பிரச்னைகளைக் களைய உதவப்பட்டிருக்கிறார்கள் என்பதைப் பொறுத்தே அமைகின்றது என்று கல்வியாளர்கள் கருதுகின்றனர்.

திறம்படக் கற்றலில் ஆசிரியரின் கற்பித்தல் அணுகுமுறை, பேச்சுமுறை, கட்டளை முறை,விளக்கும் பாங்கு, கற்பிக்கும் பாங்கு, கற்றலில் சிக்கலை எதிர்நோக்கும் மாணவர்களுக்கு உடனுக்குடன் வழங்கும் உதவி, திறம்படக் கற்றலுக்குத்தேவையான கால அவகாசம், ஆசிரியரின் தெளிவான கற்பித்தல் நோக்கம்,கற்பித்தல் விளைவு முறை( feed back ) குறைநீக்கல் முறை( corrective procedures )போன்றவை மாணவர்களின் அடைவுநிலை வேறுபாட்டிற்கு முக்கியக் காரணங்களாகவிளங்குகின்றன. இவற்றுள் உன்னதமான கற்றல் நடைபெற " கற்பித்தல் விளைவு அறிதல்"( feed back ), குறைநீக்கல் முறையும் ( corrective procedures ) முக்கியப் பங்குவகிக்கின்றன.

கடந்த இருபது ஆண்டுகளில் திறம்படக் கற்றல் முறையைப் பற்றிச் செய்யப்பட்டஆய்வுகளிலிருந்து தெள்ளெனத் தெரிவது யாதெனில்,ஒரு பள்ளியில் நல்லகற்றல் சூழல் இருந்தால், கற்றலில் தனிமனித வேறுபாடு அர்த்தமற்றதாகிறது அதாவது பூஜ்யத்தை நோக்கிச் செல்கின்றது என்றும், பொருத்தமில்லாத சூழலில் அதிகப் பெரும்பான்மையான வேறுபாடு தோன்றுகின்றது என்பதுமே ஆகும்.

குறிப்பு:

தமிழ்ப்பள்ளிகளில் திறம்படக் கற்றல் முறை அறிமுகப்படுத்தப்பட்டு பலஆண்டுகள் ஆகின்றன என்பது ஒருபுறமிருக்க, தகுந்த கற்றல் சூழல் அமைந்திருக்கின்றதா? என்பதே தலையாயக் கேள்வி.

ஆசிரியர்கள், தலைமை ஆசிரியர்கள் கருத்து தெரிவிக்கலாமே!

இருப்பதை வைத்துக்கொள்..இல்லாத்தை உபயோகி!

2004-08-11T01:40:00.000+08:00

கவிதை:

இருபத்துநாலு கால்கள் கொண்ட
சக்கரம் செய்கிறோம்
உபயோகிப்பதோ நடுவில் உள்ள வெற்றிடத்தை,
களிமண்ணால் பானை செய்கிறோம்
உபயோகிப்பதோ வெற்றிடத்தை,

கதவுகளும் ஜன்னல்களும் வைத்து வீடு கட்டுகிறோம்
உபயோகிப்பதோ உள்ளே உள்ள வெற்றிடத்தை,

எனவே
எது இல்லையோ அதை உபயோகி
எது இருக்கிறதோ அதன் நன்மைகளைப்
பெற்றுக்கொள்.

விளக்கம்:

இல்லாத உலகம் ஒன்று இருக்கிறது. அதைப் புரிந்துகொள்; அதை உபயோகிஎன்கிறார் ஞானி லாட்சு. சுருக்கமாகச் சொன்னால், எண்ணங்களை நாம்பார்க்க முடிவதில்லை.

ஆனால்,அதைத்தான் நாம் உபயோகிக்கிறோம்.இல்லாத உலகம்;பார்க்க முடியாத உலகம். இருபத்துநாலு கால்கள் வைத்துச் சக்கரம் செய்கிறோம். எப்படிச் சக்கரம்உருளுகிறது..? நடுவிலே இருக்கும் வெற்றிடத்தில்தான் அச்சைக் கோக்கிறோம்.அந்த வெற்றிடத்தை உபயோகிக்காவிட்டால் சக்கரம் உருளாது.

களிமண்ணால் ஆன பானை செய்கிறோம்.. எங்கே சோறு பொங்குகிறோம்? பானையின்உள்ளே இருக்கும் வெற்றிடத்தில். டம்ளர் என்ற அமைப்பில் தண்ணீர் குடிக்கிறோம்.. எங்கேதண்ணீர் நிற்கிறது? உள்ளே இருக்கும் வெற்றிடம்தான் நமக்கு உதவுகிறது.

ஜன்னல்களும் கதவுகளும் சுவர்களும் வைத்து வீடு கட்டுகிறோம். எங்கே படுக்கிறோம்?எங்கே விருந்தினர்களை வரவேற்கிறோம் ? எல்லாம் அந்த ஹாலில், சமயலறையில்...அந்த வெற்றிடத்தில்தான்.

குறிப்பு : டாக்டர் எம்.எஸ்.உதயமூர்த்தி அவர்களின் "வாழ்க்கை வெளிச்சம்" எனும் நூலிலிருந்து.

வாழ்க்கை பற்றிய சிந்தனை முத்துக்கள் !

2004-07-25T00:26:00.000+08:00

வாழ்க்கை ஒரு சொர்க்கம் அதில் காலடி பதியுங்கள்

வாழ்க்கை ஒரு பள்ளி அதில் கல்வி பயிலுங்கள்

வாழ்க்கை ஒரு காதல் அதை அனுபவியுங்கள்

வாழ்க்கை ஒரு பரிசு அதைப் பெற்றுக் கொள்ளுங்கள்

வாழ்க்கை ஒரு பாடல் அதைப் பாடிவிடுங்கள்

வாழ்க்கை ஒரு வனப்பு அதன் புகழ் பாடுங்கள்

வாழ்க்கை ஒரு சவால் அதை சமாளியுங்கள்

வாழ்க்கை ஒரு சாகசம் அதில் துணிவு காட்டுங்கள்

வாழ்க்கை ஒரு கடமை அதை செய்து முடியுங்கள்

வாழ்க்கை ஒரு வாய்ப்பு அதைப் பயன்படுத்துங்கள்

வாழ்க்கை ஒரு வழிகாட்டி அதைப் பின்பற்றுங்கள்

வாழ்க்கை ஒரு பயணம் அதை தொடருங்கள்

வாழ்க்கை ஒரு வாக்குறுதி அதைக் காப்பாற்றுங்கள்

வாழ்க்கை ஒரு தெய்வீகம் அதைப் புரிந்துகொள்ளுங்கள்

பி.கு :வாழ்க்கைக் கவிதை வாசிப்போம்!

வானம் வரைக்கும் யோசிப்போம்!

நல்லாசிரியருக்குரிய குணநலன்கள்!

2004-07-19T13:10:00.000+08:00

நல்லாசிரியர் என்று யாரைக் குறிக்கிறோம்? சமூகத்தில் இயல்பாகவே ஆசிரியர்களுக்கு தனி மதிப்பு உண்டு. ஆசிரியர் நல்லாசிரியர் ஆகும் போது சிறப்புமதிப்பு வழங்கப்படுகிறது. முதலில் வழங்குபவர்கள் மாணாக்கர்களே மாணவர்களின் வழிபெற்றோர்களுக்கும் தெரிய வரும்போது நல்லாசிரியர்களின் நன்மதிப்பு சமூக அங்கீகாரம்பெற்று விடுகின்றது.

சரி, நல்லாசிரியருக்குறிய குணநலன்கள் எப்படி இருக்க வேண்டும் ?

முதலில், அவர் மாணவர் நலனுக்காகப் பாடுபடுபவராயிருத்தல் வேண்டும். வகுப்பறையின்உள்ளேயும் வெளியேயும் மாணவர்களுக்கு எவை நன்மை பயக்கும் விசயங்கள் என்று தீர்மாணித்து அதற்காகப் போராடுபவரே நல்லாசிரியர் தகுதிக்கு உரியவவர் ஆவார். ஆசிரியரின் எந்த முடிவும் மாணவர்களிடன் பாதிப்பை ஏற்படுத்தும் என்பதனை விழிப்புணர்ந்துமிகச் சரியான, மாணவர்களின் உயர்வுக்குச் சாதகமான முடிவுகள் எடுக்கும் தீர்க்கச் சிந்தனை படைத்தவராயிருத்தல் வேண்டும். நல்லாசிரியர் இயல்பாகவே தன்னலமற்றவராவார். அவர்எப்போதுமே மாணவர்களுக்குத் தான் முன்னுரிமை வழங்குவார்.

இரண்டாவது, நல்லாசிரியர் என்பவர் மற்றவரை மதிக்கும் நற்பண்பு உடையவர். அவர்கள்தங்கள் வகுப்பு மாணவர்களை மதிக்கிறார்கள்;

வகுப்பறையில் மாணவர்களின் செயலூக்கங்களையும் நிர்வாகத்தையும் மதிக்கிறார்கள். அதோடு மட்டுமல்லாமல் பெற்றோர்களையும், சமூக அங்கத்தினரையும்மதிக்கிறார்கள். கற்றல் கற்பித்தல் நடவடிக்கைக்கு உரிய தரத்தை சுயமதிப்பிட்டு தங்கள் துறையில் நிபுணத்துவம் பெறுகிறார்கள்.

மூன்றாவது யாதெனில், நல்லாசிரியர் தொடர்ந்து கற்கிறார். பொதுவாக தம்மைச் சுற்றி நடைபெறும்அனைத்துத் துறைகளிலும் ஓரளவு விசயஞானம் பெற்றவராயிருக்கிறார். அவர் தொடர்ந்து தம் துறையைச்சார்ந்த நூலகளை வாசித்து காலத்துக்கேற்பத் தயார்நிலையில் இருக்கிறார். அறிவுசார்ந்த விசயங்களில்ஆழ்ந்த ஈடுபாடு காட்டுகிறார்.

நான்காவது, நல்லாசிரியர் ஒரு நல்ல உரையாளராகவும் திகழ்கிறார். ஒரு கருத்தை சபையறிந்து நன்கு விளக்கும்ஆற்றல் மிக்கவராவார். அதே சமயத்தில், அவர் மற்றவர்களின் கருத்துக்களையும் நன்கு கேட்கிறார். மாணவராகட்டும் பெற்றோராகட்டும் அவர்கள் சொல்வதை நன்கு உள்வாங்கிக் கொள்கிறார். பிறகு சமயோசித உத்தியில் பிரச்னைகளுக்குவழி காண்கிறார்.

இறுதியாக, கற்றல் தொடர்ந்து நிகழ மாணவர்களே பொறுப்பேற்க வேண்டும் எந்தனை வலியுறுத்துகிறார்.நல்லாசிரியர், மாணவர்களின் 'கற்றல் நோக்கங்கள் ' அடைவதற்கு அவர்களுடன் இணைந்தே செயல் திட்டங்கள்வகுக்கிறார். அவற்றை விவேகமான முறையில் செயல்படுத்தி 'கற்றல் இலக்கு ' அடைவதற்கு மாணவர்களுக்கு எப்போதும் உதவுகிறார்.

பி.கு : தமிழ்ப்பள்ளி ஆசிரியர்கள் நல்லாசிரியர்களா..? ஒவ்வொரு ஆசிரியரும் சுயமதிப்பீடு செய்ய வேண்டும்!

எண்ணங்களும் நம் குணங்களும் !

2004-07-15T19:29:00.000+08:00

" மனிதன் தன் இதயத்தின் ஆழத்தில் எந்த எண்ணத்தைக் கொண்டிருக்கின்றானோ அதே போல் ஆவான் " என்பது முதுமொழி. அது முழு மனித வாழ்வையும் தழுவி நிற்கிறது.அதைவிட, வாழ்வின் எல்லா அம்சங்களையும் தொட்டு, அவன் வாழ்வில் ஏற்படும் ஒவ்வொரு நிலைமைக்கும் ஒவ்வொரு சூழ்நிலைக்கும் காரணமாகிறது. ஒரு மனிதன் அவன் எண்ணுவதைப் போல ஆகிறான் என்பது வார்த்தைக்கு வார்த்தை உண்மை;அவனது எண்ணங்களின் மொத்த வடிவம்தான் அவனது குணம்.

ஒரு சிறு செடி, விதையில்லாமல் எப்படி துளிர்ந்து எழுவதில்லையோ அதுபோல மனிதனது ஒவ்வொரு செயலும் அவனது எண்ணம் என்கிற மறைந்து கிடக்கும் விதைகளில்லாமல் கிளம்புவதில்லை. அந்த எண்ண விதைகள் இல்லாமல் செயல் நேர்ந்திருக்க முடியாது.

திடீரென்று -- தானாக விளைந்த செயல் என்று சொல்லும் எல்லா செயல்களுக்கும் இது
பொருந்தும். திட்டமிடாது நேர்ந்த செயலும், நன்கு திட்டமிட்டு செயல்பட்ட காரியமும் எண்ண விதைகளிலிருந்து தான் வந்திருக்கின்றன.

செயல் எண்ணங்களின் மலர். இன்பமும் துன்பமும் அதன் கனிகள். ஆகவே, தான் வளர்த்த
தோட்டத்திலிருந்து தான், இனிப்பான அல்லது கசப்பான கனிகளை அவன் அறுவடை செய்கிறான்."

பி.கு : "வாழ்க்கையை அமைக்கும் எண்ணங்கள்" எனும் நூலிலிந்து.....மூலம் - ஜேம்ஸ் ஆலன்; தமிழாக்கம் --> டாக்டர் எம்.எஸ். உதயமூர்த்தி.